Sindhudurg News : शालेय शिक्षण मंत्री दीपक केसरकर (Deepak Kesarkar) यांच्या मतदारसंघात त्यांनी न केलेल्या कामांचा बॅनर लावण्यात आला आहे. दीपक केसरकर यांच्या सावंतवाडी (Sawantwadi) मतदारसंघात वेंगुर्लेमधील (Vengurla) पाट परुळे भागात त्यांना विरोध करणारे बॅनर (Banner) लागले आहेत. त्यावर 'भाई आता खरंच पुरे झालं, थांबा आता', अशा आशयाचे बॅनर दिपक केसरकर यांच्या विरोधात गावकऱ्यांनी लावले आहेत. हे बॅनर सध्या जिल्ह्याच्या राजकारणात चर्चेचा विषय बनवला आहे. दीपक केसरकर यांच्याबद्दल गावकऱ्यांनी न केलेल्या कामांचा या बॅनरवर पाढाच वाचला आहे. सध्या हे बॅनर सोशल मीडियावर देखील व्हायरल होत आहे.
शिक्षण मंत्र्यांच्या मतदारसंघात त्यांनी न केलेल्या कामांचा बॅनर
भाई आता खरंच पुरे झालं, थांबा आता... पाच वर्षांत तुम्ही आम्हाला तोंडही दाखवलं नाही. आतापर्यंत आले नाही त्यामुळे यापुढेही येऊ नका कोपरापासून तुम्हाला हात जोडतो, अशा आशयाचा मजकूर असलेलं बॅनर शिक्षण मंत्री दिपक केसरकर यांच्या मतदारसंघात लावण्यात आले आहेत. केसकर यांच्याबद्दल त्यांनी न केलेल्या कामांचा या बॅनरवर पाढाच वाचला आहे. सध्या हे बॅनर सोशल मीडियावर देखील व्हायरल होत आहे.
दिपक केसरकरांचा बॅनर सोशल मीडियावर व्हायरल
मालवणी बोलीभाषेतून या बॅनवरील सर्व मजकूर लिहिण्यात आला आहे. लावण्यात आलेले हे बॅनर सध्या चर्चेचा विषय बनले आहे. मात्र हे बॅनर खरंच गावकऱ्यांनी लावले की विरोधकांनी असा प्रश्नही निर्माण झाला आहे. कारण बॅनवर फक्त केसरकरांनी न केलेल्या कामांचाच पाढा वाचण्यात आला आहे.
बॅनरमध्ये काय लिहिलं?
प्रिय दिपकभाई,
म्हापण, पाट-परुळे, भोगवे, चिपी ही गावांची नावा आठवतत काय ओ? कशी आठावतीत? 5 वर्षा सरली तुमका हय येवन. इसारल्या असताल्यात. आमीय इसारललो तुमी आमचे 15 वर्षा आमदार आसास ते.
मागच्या निवडणुकीत इल्लास तेव्हा आमच्च्या दोन एक हजार बेरोजगार पोरा-पोरींचे बायोडाटा घेवचो मोठो कार्यक्रम केल्लास. तेंका चिपीच्या ईमानतळार नोकरे लायतलास म्हणुन सांगलास. 5 वर्षात एकाकय नोकरी काय गावाक नाय पण असले येकयेक गजाली सांगुन आमची मता मात्र घेतलास.
तेच्या आधी पर्यटनमंत्री म्हणान हाऊसबोटी, वॉटरस्पोर्टसब, स्थानिकांका हॉटेला घालुक अनुदान, पर्यटनांतसुन रोजगार असले गजाल्यो मारल्यात. आम्ही खुष झाल्लो, मता घातली. पण तुमचे हाऊसबोटी काय आमच्या दर्यात पोचाक नाय.
आमच्या शेजारचा मालवण मात्र ह्याच गोष्टीनी विकसित झाला, पर्यटनात जगाच्या नकाशार लागला. आमी मात्र सगळा आसान थयच रवलो. तुमचे गजाली आयकत. आणि आजुनय तुमका संधी व्हयी म्हणतास??
भाई, 5 वर्षात जसा आमका तोंड दाखयक येवक नाय तशे हेच्या पुढेय येव नकात. आता कोपरापासुन हात जोडुन सांगतव तुमका... भाई, आता खराच पुरे झाला,थांबा आता, असा मजकूर मालवणी भाषेतून यावर लिहिण्यात आला आहे.