Mumbai Metro: आता कल्याण-डोंबिवलीवरुन थेट गाठता येणार नवी मुंबई; मेट्रो-12 मुळे तासांचा प्रवास मिनिटांत होणार शक्य
Mumbai Metro 12: मेट्रो 12 प्रकल्प नवी मुंबई मेट्रोला जोडण्यात येणार असल्याने कल्याण-डोंबिवली-तळोजा-नवी मुंबई प्रवास आता सुकर होणार आहे.
Kalyan-Taloja Mumbai Metro: कल्याण-डोंबिवलीवरुन नवी मुंबईला जाणाऱ्या प्रवासांचा प्रवास आता सुकर होणार आहे. MMRDAने मेट्रो मार्गिकेबद्दल मोठी घोषणा केली आहे. प्रवाशांचा प्रवास अधिक जलद आणि सुखकर होण्यासाठी मेट्रो 12 (Metro 12) आणि नवी मुंबई (Navi Mumbai) मेट्रो आता जोडण्यात येणार आहे. मुंबई महानगर प्रदेश विकास प्राधिकरणाने (MMRDA) मेट्रो 12 आणि नवी मुंबई मेट्रो जोडण्यासाठी मेट्रो 12 च्या डिझाइनमध्ये बदल करण्याचा निर्णय घेतला आहे.
कल्याणवरुन थेट नवी मुंबई गाठणं होणार शक्य
कल्याणमधून नवी मुंबईला प्रवास करणाऱ्यांचा प्रवास आता आरामदायी होणार आहे. या मार्गादरम्यान राहणाऱ्या प्रवाशांना MMRDAने मोठा दिलासा दिला आहे. दोन मेट्रो मार्गिका एकमेकांशी जोडल्याने प्रवाशांचा वेळ वाचणार आहे. येत्या काही वर्षांत मेट्रो मार्गिकेचं काम पूर्ण होईल.
दोन मेट्रो मार्ग एकमेकांना जोडण्याचं काम सुरू
मेट्रो 12 ला नवी मुंबई मेट्रोशी जोडण्यासाठी मेट्रो 12च्या मार्गावर जवळपास 700 मीटरचा विस्तार करण्यात येणार आहे. हा मेट्रो मार्ग वाढवून MMRDA तळोजाजवळील मेट्रो 12 आणि नवी मुंबई मेट्रोला जोडण्याची योजना बनवत आहे. त्यानुसार, कल्याण ते तळोजा दरम्यान मेट्रो 12 कॉरिडॉर बांधण्यात येणार आहे. तर नवी मुंबईतील बेलापूर ते पेंढार दरम्यान मेट्रो कॉरिडॉर यापूर्वीच बांधण्यात आला आहे.
नव्याने काढणार निविदा
मेट्रो 12 कॉरिडॉरची पायाभरणी काही वर्षांपूर्वी पंतप्रधान नरेंद्र मोदी यांच्या हस्ते करण्यात आली होती. 20.75 किलोमीटर लांबीच्या मेट्रो 12 प्रकल्पांचे बांधकाम सुरू करण्यापूर्वी निविदा देखील मागवण्यात आल्या होत्या. सुमारे 5,865 कोटी रुपयांच्या मेट्रो प्रकल्प बांधकामासाठी अनेक कंपन्यांनी स्वारस्य दाखवले होते आणि निविदा दाखल केल्या होत्या. मात्र मेट्रो 12 मार्गिका नवी मुंबई मेट्रोला जोडण्याच्या प्रस्तावामुळे पुर्वीच्या डिझाइनमध्ये बदल करण्यात आला आहे. त्यामुळे एमएमआरडीएला पुर्वीची निविदा रद्द करावी लागली. एमएमआरडीएच्या एका वरिष्ठ अधिकाऱ्याने दिलेल्या माहितीनुसार, मेट्रोच्या नवीन डिझाइनसह नवीन निविदा लवकरच काढण्यात येईल.
कल्याणवरुन नवी मुंबईला प्रवास करणाऱ्यांना होणार फायदा
आजच्या घडीला कल्याण-डोंबिवलीसह आसपासच्या परिसरात राहणाऱ्या नागरिकांना नवी मुंबईत येण्यासाठी रेल्वे किंवा रस्तेमार्ग हा एकच पर्याय आहे. कल्याणवरुन लोकलने नवी मुंबईत यायचे झाल्यास प्रथम ठाण्याला यावे लागते आणि तिथून ट्रेन बदलून नवी मुंबईला जाता येते. तर, रस्ते मार्गाने यायचे झाल्यास किमान एक-दीड तासांचा वेळ लागतो. त्यामुळे हे दोन्ही मेट्रो मार्ग जोडल्याने तासांचा प्रवास अगदी काही मिनिटांत पूर्ण करता येणार आहे.
मेट्रो 12 मेट्रो 5 कॉरिडॉरला जोडणार
दुसरीकडे, ठाणे-भिवंडी-कल्याण दरम्यान प्रस्तावित मेट्रो 5 कॉरिडॉरलाही मेट्रो 12 जोडण्यात येणार आहे. त्यामुळे ठाणे, भिवंडी, कल्याण, डोंबिवली, तळोजा, बेलापूर आणि नवी मुंबईदरम्यान दररोज प्रवास करणाऱ्या हजारो नागरिकांचा वेळखाऊ आणि वेदनादायी प्रवास भविष्यात सुखकर होणार आहे.
हेही वाचा:
महत्त्वाच्या बातम्या
