Sanjay Shirsat On Prithviraj Chavan : आतापर्यंत तुम्ही गोट्या खेळत होता का? संजय शिरसाट यांचा पृथ्वीराज चव्हाणांना सवाल
Sanjay Shirsat : शिंदे सरकारच्या धास्तीमुळे हे पोपट आता बोलायला लागले असल्याचे देखील शिरसाट म्हणाले आहेत.
नाशिक : मराठा आरक्षणाच्या (Maratha Reservation) मागणीवरून सरकारवर टीका करणाऱ्या माजी मुख्यमंत्री पृथ्वीराज चव्हाण (Prithviraj Chavan) यांना शिंदे गटाचे आमदार संजय शिरसाट (Sanjay Shirsat) यांनी प्रत्युत्तर दिले आहे. राज्यात आमचे सरकार असते तर आत्तापर्यंत मराठा आरक्षणाचा मुद्दा मार्गी लावला असता, असे चव्हाण म्हणाले होते. त्यांच्या याच टीकेला उत्तर देतांना, "आतापर्यंत तुम्ही गोट्या खेळत होता का?," असा खोचक टोला शिरसाट यांनी चव्हाणांना लगावला आहे.
पृथ्वीराज चव्हाणांच्या टीकेला उत्तर देतांना शिरसाट म्हणाले की, "मराठा आरक्षणाच्या मागणीसाठी गेली 40 वर्षे मराठा समाज भांडत आहे. तेव्हा तुम्ही झोपले होते का? मुख्यमंत्री होते ना? आतापर्यंत तुम्ही गोट्या खेळत होते का? असे शिरसाट म्हणाले. तर, लखवा मारलेले मुख्यमंत्री असं शरद पवार तुम्हाला म्हणायचे, तुम्ही काय शिकवतायत. शिंदे सरकारच्या धास्तीमुळे हे पोपट आता बोलायला लागले असल्याचे देखील शिरसाट म्हणाले आहेत.
पृथ्वीराज चव्हाण काय म्हणाले?
"मी मुख्यमंत्री असताना सहकार क्षेत्रात घेतलेल्या निर्णयामुळे 2014 मध्ये राष्ट्रवादी काँग्रेसने आमचं सरकार पाडलं. जर त्यावेळी आमचं सरकार पडलं नसतं तर आम्ही नक्कीच मराठा आरक्षण टिकवलं असतं. मला खात्री आहे की माझं सरकार जर पडलं नसतं, तर आम्ही दोघे राष्ट्रवादी काँग्रेस आणि काँग्रेस आम्ही एकत्रित निवडणुकीला सामोरे गेलो असतो आणि 2014 मध्ये भाजपऐवजी आमचेच सरकार आले असते", असं पृथ्वीराज चव्हाण म्हणाले.
उद्धव ठाकरेंवर हल्लाबोल...
दरम्यान, उद्धव ठाकरे यांनी केलेल्या टीकेला देखील संजय शिरसाट यांनी उत्तर दिले आहे. "अडीच वर्षात घरात बसणारे आज मुख्यमंत्र्यांची लाज काढतायत हे दुर्दैव, हा मोठा विनोद आहे. अवकाळी पाऊस येणार म्हणजे छत्री धरायची होती का? , यांना शेतीतील काही कळत नाही. मुख्यमंत्री एकनाथ शिंदे यांनी कालच पंचनामे करण्याचे आदेश दिले आहेत. अनेक मंत्री आज बांधावर आहेत. एक दिवस आमचे मंत्री प्रचाराला गेले तर यांना त्रास होतो आणि हे अडीच वर्षात घरात बसले होते. यांना ना शेतकऱ्याचा कळवळा, ना आरक्षणाच्या प्रश्नावर घेणं देणं आहे. फक्त टोमणे मारणे हा तुमचा स्वभाव झाला आहे. मुख्यमंत्र्यांचा आदर करायला शिका, काम न करता लोकं आपल्या पाठीशी आहेत हे त्यांचं स्वप्न भंग होणार आहे. आगामी लोकसभा, विधानसभेत त्यांची जागा पहायला मिळेल, असेही शिरसाट म्हणाले.
राज्यातील आमचं सरकार व्हीसीवर नाही, शेतात आहे. सर्वसामान्य शेतकऱ्यांना माहिती आहे की, सरकार आमच्या पाठीशी आहेत. आम्हाला आमच्या राज्याचा लावलौकीक देशात वाढवायचा आहे. चौकट तोडून आम्ही काय करू शकतो हे देशाने बघितले. पण, तुम्ही जे राज्य चालवले हे जनतेने बघितले आहे, असेही शिरसाट म्हणाले.
भुजबळांवर निशाणा...
मराठा कुणबी प्रमाणपत्र नोंदी शोधण्यासाठी सरकराने गठीत केलेली शिंदे समिती तत्काळ रद्द करण्याची मागणी ओबीसी नेते तथा अन्न, नागरी पुरवठा व ग्राहक संरक्षण मंत्री छगन भुजबळ यांनी केली आहे. यावरून शिरसाट यांनी भुजबळ यांच्यावर निशाणा साधला आहे. शिंदे समितीबाबतचा निर्णय कॅबिनेटमध्ये झालेला आहे. त्याची अमलबजावणी शिंदे समिती करते आहे. त्यामुळे ही समिती बरखास्त करायची की नाही हे कॅबिनेट ठरवेल, मुख्यमंत्री निर्णय घेतील. त्यामुळे त्यांच्यासमोर मागणी करायची ना?, असा टोला शिरसाट यांनी भुजबळांना लगावला आहे.
प्रकाश आंबेडकरांच्या दंगल वक्तव्यावर प्रतिक्रिया
वाद पेटू नये या भूमीकेत सरकार आहे. जाती-जातीत भांडण होऊ नये या भूमिकेत सरकार काम करते आहे. सरकार अलर्ट मोडमध्ये आहे. कोणत्याही समजाचे घटक दंगल करणाच्या प्रयत्न करणारे असतील, तर त्यांना रोखल्याशिवाय राहणार नाही मग तो कोणीही असेल, असेही शिरसाट म्हणाले.
इतर महत्वाच्या बातम्या:
Before You Go
Priyanka Gandhi On CJP Protest : पोलिसांच्या ताब्यातून सुटका, प्रियांका गांधींची पहिली प्रतिक्रिया
महत्त्वाच्या बातम्या
