नाशिक : येवल्यात (yeola) मराठा आंदोलक आणि मंत्री छगन भुजबळ (Chhagan Bhujbal) यांच्या समर्थकांमध्ये जोरदार राडा झाला. रविवारी मनोज जरांगे पाटील (Manoj Jarange Patil) येवल्यात शिवसृष्टीला भेट देण्यासाठी आले. त्यावेळी मराठा आंदोलक आणि भुजबळांचे समर्थक आमनेसामने आले. भुजबळ समर्थनार्थ व मराठा आंदोलक यांच्यात जोरदार घोषणाबाजी झाली. आता शिवसृष्टी स्वयंसेवक, आंदोलक कार्यकर्ते अशा एकूण 44 जणांविरुद्ध येवला शहर पोलीस ठाण्यात गुन्हा दाखल करण्यात आला आहे.
याबाबत अधिक माहिती अशी की, मराठा नेते मनोज जरांगे पाटील हे काल येवला दौऱ्यावर आहेत. मनोज जरांगे यांनी येवल्यात आल्यानंतर भारतरत्न डॉ. बाबासाहेब आंबेडकर यांना अभिवादन केलं. यानंतर त्यांना येवल्यात शिवसृष्टी उभारण्यात आली असल्याची माहिती मिळाली. त्यामुळे मनोज जरांगे पाटील शिवसृष्टी उभारलेल्या ठिकाणी शिवाजी महाराजांना वंदन करण्यासाठी आले. मनोज जरांगे यांनी शिवसृष्टीला भेट दिल्यानंतर ते आपल्या सभास्थळाच्या दिशेला निघाले. पण यावेळी अचानक मराठा कार्यकर्ते आणि मंत्री छगन भुजबळ यांचे समर्थक आमनेसामने आले. यावेळी दोन्ही बाजूने एकमेकांच्या विरोधात जोरदार घोषणाबाजी करण्यात आली. त्यामुळे परिसरात तणावाचं वातावरण निर्माण झालं.
मराठा आंदोलकांचा आरोप
पोलिसांनी हस्तक्षेप केल्यानंतर मराठा कार्यकर्ते आक्रमक झाले. यावेळी मराठा कार्यकर्त्यांनी शिवसृष्टीसमोर ठिय्या मांडला. मनोज जरांगे पाटील हे काल येवल्यात आले होते. ते येवल्यात आले तेव्हा त्यांनी डॉ. बाबासाहेब आंबेडकर यांना अभिवादन केलं. यानंतर छत्रपती शिवाजी महाराजांना पुष्पहार अर्पण करण्यासाठी आम्ही इथे आलो. जरांगे पाटील यांनी छत्रपती शिवरायांना पुष्पहार अर्पण केला. यानंतर आम्ही परतत असताना भुजबळांच्या काही समर्थकांनी शिवाजी महाराजांच्या प्रांगणात जरांगे पाटील यांच्याबाबत अपशब्द वापरले, अशी प्रतिक्रिया मराठा आंदोलकांनी दिली होती.
मराठा आंदोलकांचा रास्ता रोको
मराठा आंदोलक ठिय्या मांडल्यानंतर प्रचंड आक्रमक झाले. काही मराठा कार्यकत्यांनी रास्ता रोको केला. मराठा आंदोलकांनी मनमाड नगर राज्य मार्गावरील विंचूर चौफुलीवर रास्ता रोको केला. भुजबळ समर्थकांनी मराठा कार्यकर्त्यांना शिवीगाळ केल्याचा आरोप करत आंदोलकांनी रास्ता रोको सुरू केला. मराठा आंदोलकांच्या आंदोलनामुळे वाहनांच्या लांबच लांब रांगा लागल्या होत्या. यावेळी मराठा समर्थकांनी जोरदार घोषणाबाजी केली.
44 जणांविरोधात गुन्हा दाखल
रात्री उशिरा मनोज जरांगे पाटील यांनी आंदोलकांना रास्ता - रोको मागे घेण्याचे आवाहन करण्यात आल्यानंतर आंदोलन मागे घेण्यात आले होते. यानंतर शिवसृष्टी स्वयंसेवक, आंदोलक कार्यकर्ते व इतर अशा 40 ते 44 जणांविरुद्ध येवला शहर पोलीस ठाण्यात गुन्हा दाखल करण्यात आला. वाहतुकीस अडथळा, सार्वजनिक उपद्रव, जमाव गोळा करणे, तसेच पोलिसांनी सूचना देवूनही अपर जिल्हाधिकारी यांच्या आदेशाचे उल्लंघन केल्याने गुन्हा दाखल करण्यात आला आहे.
आणखी वाचा