अनेकदा सत्ताधारी पक्षाला विरोधी पक्षाची मदत लागते, त्यासाठी आम्ही तयार: देवेंद्र फडणवीस

आपली शहरं ही वाढती आहेत, त्यामुळे शहरांच्या समस्यांही वाढत असतात. त्यामुळे आपण शांत बसून चालत नाही असा सल्ला देवेंद्र फडणवीसांनी नाशिक मनपा प्रशासनाला दिला. 

Devendra Fadanvis

नाशिक : राज्यकारभार करताना अनेकदा सत्ताधारी पक्षाला विरोधी पक्षाची मदत लागते, त्यासाठी आम्ही तयार आहोत असं वक्तव्य विधानसभेचे विरोधी पक्षनेते देवेंद्र फडणवीस यांनी केलं आहे. ते नाशिकमध्ये परिवहन बससेवा लोकार्पण कार्यक्रमात बोलत होते. त्यावेळी राज्याचे अन्न व पुरवठा मंत्री छगन भुजबळ आणि माजी मंत्री गिरीश महाजन उपस्थित होते. 

मनपाने बस चालू केल्यानं माझ्या दारापाशी, माझ्या मतदारसंघात बस अली पाहिजे असा हट्ट नगरसेवक धरतात. कारण त्यामुळे मतं मिळतात. मीही तेच केलं, पण मनपाने असा निर्णय घेतल्याने हा त्रास वाढतो असं देवेंद्र फडणवीस म्हणाले. 

देवेंद्र फडणवीस पुढे म्हणाले की, कोरोना काळात सर्वच परिवहन वाहतूक व्यवस्था तोट्यात गेल्या. तोट्यात जाणारी बस मनपाला परवडणार का? डिझेल खूप महाग झाले आहे. त्यामुळे डिझेल बस बंद करा आणि त्या ठिकाणी इथॉनॉल आणा असं केंद्रीय मंत्री नितील गडकरी सांगतात. 

आपली शहरं ही वाढती आहेत, त्यामुळे शहरांच्या समस्यांही वाढत असतात. त्यामुळे आपण शांत बसून चालत नाही असा सल्लाही देवेंद्र फडणवीसांनी नाशिक मनपा प्रशासनाला दिला. 

राज्याचे अन्न व पुरवठा मंत्री छगन भुजबळ देवेंद्र फडणवीस यांना उद्देशून म्हणाले की, "तुमचं नागपूर, पुणे खूप जोरात आहे. पण आमचे नाशिक हळूहळू प्रगती करणारे शहर आहे. नागपुरला सर्व स्कुटर फिरतात, आमच्याकडे स्कुटीवर फिरतात त्यामुळे बससेवा चा उद्देश सफल होतो की नाही शंका आहे."

ट्विटरमुळे एका मंत्र्यांवर गदा आली असं वाचलं, खरं-खोटं माहीत नाही. आधुनिक तंत्रज्ञानाचा फटका असा बसतो अशी कोपरखळी भुजबळांनी रविशंकर प्रसाद यांच्या राजीनाम्यावरुन मारली.

महत्वाच्या बातम्या :