प्रवासादरम्यान सामानाची अदलाबदल झाली, स्वतःची बॅग शोधण्यासाठी पठ्ठ्याने ‘इंडिगो’ची वेबसाईटच हॅक केली!

Indigo Website Hack :  नंदन यांनी सांगितले की, ज्या प्रवाशासोबत त्यांची बॅग बदलली होती, ते त्यांच्या घराजवळच राहत होते. नंदनने त्यांच्याशी संपर्क साधून बॅगा बदलल्या.

Varanasi_Flight

Indigo Website Hack :  विमान प्रवासादरम्यान प्रवाशांचे सामान हरवण्याच्या किंवा बदलण्याच्या समस्या अनेकदा ऐकायला मिळतात. अशा परिस्थितीत प्रवासी कस्टमर केअर सेंटरला फोन करतात. परंतु, बहुतांश प्रकरणांमध्ये ग्राहक सेवा केंद्रे प्रवाशांचे प्रवाशांचे समान परत करू शकत नाहीत, त्यानंतर प्रवाशांना रिकाम्या हातीच परतावे लागते. अशाच एका प्रकरणात प्रवाशाने असं काही केलं की, ज्याचा कोणी विचारही करू शकत नाही. या प्रवाशाने आपले सामान शोधण्यासाठी चक्क एअरलाईन्सची वेबसाईटच हॅक केली.

सॉफ्टवेअर इंजिनिअर नंदन कुमार पाटणा ते बंगळुरू इंडिगोच्या विमानाने प्रवास करत होते. प्रवास संपवून ते घरी पोहोचले, तेव्हा त्यांच्या पत्नीने ती बॅग पाहिली आणि सांगितले की, ही बॅग तुमची नसून, दुसऱ्याची आहे. नंदनची बॅग दुसऱ्या प्रवाशाच्या बॅगसोबत बदली झाली होती.

कस्टमर केअरला दिली माहिती

नंदन यांनी इंडिगोच्या कस्टमर केअरला बॅग बदलण्याबाबत माहिती दिली. मात्र, कस्टमर केअर सेंटरने नंदनला त्याच्या बॅगेची माहिती दिली नाही. आता बॅग हरवल्याची आणि नंतर ती सापडल्याची संपूर्ण घटना नंदनने ट्विटरवर सांगितली आहे.

विमानतळावरून घरी आल्यानंतर नंदनने बॅग पत्नीच्या ताब्यात दिली. बायकोने सांगितले की, या बॅगेला कुलूप नाही. ही बॅग दुसऱ्याची आहे. यानंतर, जेव्हा एअरलाईनच्या ग्राहक सेवेकडून कोणतीही मदत मिळाली नाही, तेव्हा त्याने इंडिगोची वेबसाइट हॅक करण्याचा विचार केला.

एअरलाईनची वेबसाईट केली हॅक

यावेळी नंदनने वेबसाईटचे डेव्हलपर कन्सोल उघडून नेटवर्क लॉग रेकॉर्ड तपासले. काही वेळाने त्याला ज्या प्रवाशाकडून त्याची बॅग बदलण्यात आली होती, त्याची माहिती मिळाली. त्यांना नेटवर्क रीस्पाँसद्वारे प्रवाशाचे संपर्क तपशील मिळाले.

नंदन कुमार यांनी ‘इंडिगो’ला दिल्या सूचना!

नंदन यांनी सांगितले की, ज्या प्रवाशासोबत त्यांची बॅग बदलली होती, ते त्यांच्या घराजवळच राहत होते. नंदनने त्यांच्याशी संपर्क साधून बॅगा बदलल्या. बॅग मिळाल्यानंतर नंदन कुमार यांनी विमान कंपनीला ग्राहक सेवा सुधारण्याची गरज असल्याचे सुचवले. कंपनीला आयव्हीआर सर्व्हिस सुधारणे तसेच, ग्राहकांचा डेटा लीक होऊ नये म्हणून आधी वेबसाईट सिक्युअर करणे आवश्यक असल्याचे त्यांनी कंपनीला सुचवले आहे.

महत्वाच्या बातम्या : 

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha