पदाभार स्विकारल्यानंतर अशोक चव्हाणांचा पहिला फोन लेकीला लक्ष्मी मानणाऱ्या 'त्या' पित्याला
काँग्रेसचे वरिष्ठ नेते आणि सार्वजनिक बांधकाममंत्री अशोक चव्हाण यांनी मंत्रालयातील कार्यालयात जाऊन आपला पदभार स्विकारला. आपल्या पदाचा कार्यभार स्विकारल्यानंतर चव्हाण यांनी पहिला फोन लाडक्या लेकीच्या पित्याला केला.
मुंबई : मुंबई : राज्याचे सार्वजनिक बांधकाम मंत्री अशोक चव्हाण यांनी आज मंत्रालयातील कार्यालयात आपला पदाभार स्विकारून कामकाजास प्रारंभ केला. त्यानंतर अशोक चव्हाणांनी पदाभार स्विकारल्यानंतर पहिला फोन लेकीला लक्ष्मी मानून तिच्या पावलांनी आपल्या गाडीची पूजा करणाऱ्या पित्याला लावला. या पित्याचा व्हिडीओ टिकटॉकवर व्हायरल होत आहे.
अशोक चव्हाण यांनी कालच त्यांच्या व्हॉट्स अॅपवर आलेला एक टिकटॉकचा व्हिडीओ ट्वीट केला होता. मूळ कोल्हापूर जिल्ह्यातील रहिवाशी असलेल्या नागेश पाटील यांचा हा व्हिडीओ होता. त्यांनी दोन आठवड्यांपूर्वी नवीन वाहन खरेदी केले होते. त्या वाहनाची पूजा करताना त्यांनी आपल्या दोन वर्षीय मुलीचे पाय कुंकवात बुडवून लक्ष्मीची पावले म्हणून त्यांची छाप नव्या गाडीच्या बोनेटवर उमटवली होती.
मोबाईलवर हा VDO नजरेस पडला. मन भरून आलं. खूप कौतूक वाटलं त्या पित्याचं जो आपल्या नव्या गाडीची पूजा मुलीच्या पदस्पर्शाने करतोय. दोन मुलींचा बाबा असल्याने बाप-लेकीचं नातं काय असतं, त्यातील ओलावा काय असतो, याची मला जाणीव आहे. या बाप-लेकीला भेटायला मला नक्कीच आवडेल! pic.twitter.com/eDYBdBLfFk
— Ashok Chavan (@AshokChavanINC) January 7, 2020
लेकीवरील अपार प्रेम व्यक्त करणारा हा व्हिडीओ अशोक चव्हाण यांच्या हृदयाला स्पर्श करून गेला. त्यांनी आपल्या ट्वीटर आणि फेसबुकवर हा व्हिडीओ शेअर करून एक पिता म्हणून आपल्या भावनादेखील व्यक्त केल्या. अशोक चव्हाण यांनी ट्वीट करताना लिहिलं आहे की, 'मोबाईलवर हा व्हिडीओ नजरेस पडला. मन भरून आलं. खूप कौतूक वाटलं त्या पित्याचं जो आपल्या नव्या गाडीची पूजा मुलीच्या पदस्पर्शाने करतोय. दोन मुलींचा बाबा असल्याने बाप-लेकीचं नातं काय असतं, त्यातील ओलावा काय असतो, याची मला जाणीव आहे. या बाप-लेकीला भेटायला मला नक्कीच आवडेल.'
लेकीला लक्ष्मी मानून तिच्या पदस्पर्शाने नवीन गाडीची पूजा करणाऱ्या पित्याचा VDO मी काल शेअर केला होता. हा VDO बनवणारे नागेश पाटील यांचा नंबर मला रात्री मिळाला. मी आजच मंत्रालयातून कामकाजास सुरूवात केली व पहिला फोन त्यांनाच केला.https://t.co/tjJsJi6X6J https://t.co/gzS9fdrZCn pic.twitter.com/Ruom75wtvB
— Ashok Chavan (@AshokChavanINC) January 8, 2020
अशोक चव्हाण यांची ट्विटर व फेसबुकवरील ही पोस्ट चांगलीच व्हायरल झाली. हा टिकटॉक व्हिडीओ तयार करणारे नागेश पाटील यांच्यापर्यंतही ती पोहोचली. रात्री उशिरा त्यांनी ट्विटरवरून चव्हाण यांचे आभार व्यक्त केले. चव्हाणांनी सकाळी तो ट्वीट पाहिला. सार्वजनिक बांधकाम मंत्री म्हणून मंत्रालयातील कार्यालयात बसण्याचा आज त्यांचा पहिलाच दिवस होता. कार्यालयात पूजा करून स्थानापन्न झाल्यानंतर अशोक चव्हाण यांनी पहिला फोन नागेश पाटील यांनाच लावला.
माझ्यासारख्या छोट्याशा गावच्या माणसाचं व माझ्या मुलीचं कौतुक केल्याबद्दल व हा विडिओ वेळात वेळ काढून पाहिल्याबद्दल अनेक धन्यवाद साहेब. नागेश पाटील 9168355060 Sir please small call for my brother as soon as possible..???????????????????? pic.twitter.com/q2oVQJmUvW
— Umesh@mutal (@Umeshmutal716) January 7, 2020
नागेश पाटील हे वाहनचालक असून, ते पुण्याला खासगी नोकरी करतात. चव्हाण यांच्या ट्वीटला रात्री उशिरा उत्तर दिल्यानंतर सकाळीच त्यांचा फोन आल्याने ते देखील भारावून गेले होते. नागेश पाटील यांच्याशी केलेल्या संभाषणात चव्हाण यांनी या व्हिडीओ मागील भावनेचे कौतूक केले. त्यांच्या कुटुंबाची विचारपूस केली आणि कोल्हापूर किंवा पुण्याला आल्यावर नक्की भेटू, असे आश्वासनही दिले.
महत्त्वाच्या बातम्या
