राज्यात घडलं ते दुर्देवी, सर्वात मोठा पक्ष विरोधी पक्षात बसलाय : राज ठाकरे

ठाण्यात आयोजित एका कार्यक्रमात राज ठाकरे यांनी विविध विषयांवर भाष्य केलं. त्यांनी कलेच्या सध्याच्या स्थितीवर वेगळ्या अंगाने देखील चर्चा केली. यावेळी ते आपल्या व्यंगचित्राच्या कलेवर बराच वेळ बोलले.

ठाणे: सध्याचं राजकारण हे बटबटीत आहे म्हणण्यापेक्षा ते विचित्र आहे, असं म्हणावं लागेल. कारण सध्या एकासोबत निवडणुका लढवायच्या दुसऱ्यासोबत सत्ता स्थापन करायची. आज सर्वात मोठा पक्ष विरोधी विरोधी पक्षात बसला आहे, हे दुर्देवी आहे, अशी टीका मनसे अध्यक्ष राज ठाकरे यांनी केली. ठाण्यात आयोजित महाराष्ट्र टाइम्सच्या कार्यक्रमात त्यांची मुलाखत अंबरीश मिश्र यांनी घेतली. त्यावेळी ते बोलत होते. यावेळी राज ठाकरे यांनी विविध विषयांवर भाष्य केलं. सोबतच त्यांनी कलेच्या वेगळ्या अंगाने देखील चर्चा केली. यावेळी ते आपल्या व्यंगचित्राच्या कलेवर बराच वेळ बोलले. ते म्हणाले की, मला राजकारण बटबटीत वाटतं. मी अपघाताने राजकारणात आलो. राजकारणाचा अर्थ निवडणुकांच्या पलीकडे आहे, असं ते म्हणाले. यावेळी त्यांनी विरोधी पक्षनेते देवेंद्र फडणवीस यांनाही टोला लगावला. फडणवीस हे साडे तीन शहाण्यांपैकी एक होते, असं ते म्हणाले. तर पंडित नेहरु हा माणूस मोठा होता. त्य चांगल्या इन्स्टिट्यूट उभ्या केल्या, असं राज ठाकरे म्हणाले. राज ठाकरे म्हणाले की, मी एका दैनिकात काम करत होतो. मात्र एके दिवशी मला संपादकांनी सांगितलं की, पवार साहेबांवर व्यंगचित्र काढायचं नाही. असं सांगितल्यावर मी त्याच दिवशी नोकरी सोडली, असं ते म्हणाले. मला निवडणुकीचे निकाल लागले त्यावेळी बरं वाटलं. कारण पक्षांतर करणाऱ्या अनेकांना लोकांनी धडा शिकवला, असंही ते म्हणाले. परदेशातल्या गोष्टी महाराष्ट्रात आल्या पाहिजेत, असं ते म्हणाले. आपण राजकारणात मुलांना आणू शकतो, पण समोर असलेल्या लोकांनी स्वीकारले पाहिजे. त्यांना आपण लोकांवर लादू शकत नाही, असंही राज ठाकरे म्हणाले.

बीकेसी उभे राहिले तेव्हा एक रचना केली गेली. मग तेव्हा तिथे शिवाजी पार्क सारखे मैदान का उभे नाही करू शकले, असंही राज ठाकरे म्हणाले. 14 वर्षात अख्खं रामायण घडलं. आपल्याकडं मात्र केवळ 14 वर्षात बांद्रा-वरळी सी लिंक बांधला गेला, अशी खोचक टीका त्यांनी केली.