पत्रकार जे. डे हत्याकांड खटल्याच्या निकालाची तारीख ठरली!

जेष्ठ पत्रकार ज्योर्तिमय डे यांनी गुन्हेगारी जगतावर लिहिलेल्या पुस्तकामुळे अंडरवर्ल्ड डॉन छोटा राजनने त्यांना ठार केले, असा दावा करणारं आरोपपत्र सीबीआयने विशेष न्यायालयात सादर केलं होतं.

मुंबई : मुंबई सत्र न्यायालयात सुरु असलेल्या पत्रकार जे. डे हत्याकांड खटल्याचा निकाल 2 मे रोजी देणार असल्याचं कोर्टानं जाहीर केलं आहे. जेष्ठ पत्रकार ज्योर्तिमय डे यांनी गुन्हेगारी जगतावर लिहिलेल्या पुस्तकामुळे अंडरवर्ल्ड डॉन छोटा राजनने त्यांना ठार केले, असा दावा करणारं आरोपपत्र सीबीआयने विशेष न्यायालयात सादर केलं होतं. 11 जून 2011 रोजी जे. डे यांची पवई येथे गोळ्या घालून हत्या करण्यात आली. ही हत्या छोटा राजनच्या सांगण्यावरून झाल्याचा दावा करत मुंबई पोलिसांच्या गुन्हे शाखेने पत्रकार जिग्ना वोरा, सतीश काल्या, अभिजित शिंदे, अरुण डाके, सचिन गायकवाड, अनिल वाघमोडे, निलेश शेंडगे, मंगेश अगनावे, विनोद असरानी, पॉलसन जोसेफ व दिपक सिसोडीया यांना अटक केली. त्यांच्याविरोधात आरोपपत्रही दाखल केले होते. छोटा राजनविरोधात महाराष्ट्रात 70 गुन्ह्यांची नोंद आहे. यामध्ये जे. डे यांच्या हत्येचाही समावेश आहे. राजनचा ताबा सीबीआयकडे असल्याने हे प्रकरण तपासासाठी सीबीआयकडे हस्तांतरीत करण्यात आले व तशी माहिती न्यायालयाला देण्यात आली. विशेष मोक्का न्यायाधीश एस. एस. अडकर यांच्यासमोर हा खटला चालवण्यात आला. महत्त्वाचे म्हणजे या हत्येचा तपास करणाऱ्या गुन्हे शाखेच्या यादीत साक्षीदार असलेला रवी राम हा सीबीआयच्या आरोपपत्रात आरोपी आहे. रामने राजनच्या सांगण्यावरुन 20 परदेशी सिमकार्ड पुरवल्याचा सीबीआयचा आरोप आहे. तसेच जे. डे यांची माहिती राजनला दिल्याचा आरोप असलेली पत्रकार जिग्ना वोरा व राजन यांच्यात झालेले संभाषणही सीबीआयच्या आरोपपत्रात आहे. फॉरेंसिक लैबने या दोघांच्या आवाजाचे नमुने तपासले असून संभाषणातील आवाज त्यांचाच असल्याचा अहवाल दिला आहे. आरोपपत्रात राजनसह इतर आरोपींवर हत्या, हत्येचा कट, शस्त्र प्रतिबंधक कायदा व मोक्का अंतर्गत आरोप ठेवण्यात आला आहे. या आरोपपत्रात 41 साक्षीदारांचे जबाब आहेत.