वरळीत लिफ्ट कोसळून दोन जणांचा मृत्यू, एका आठवड्यात मुंबईत दुसरी घटना

Mumbai News Update : मुंबईतील वरळीत लिफ्ट कोसळून दोन जणांचा मृत्यू झालाय. एका आठवड्यात मुंबईतील ही दुसरी घटना आहे.

two people died in mumbai worli elevator collapse

मुंबई : विक्रोळी येथे लिफ्ट कोसळून एका कामगाराचा मृत्यू झाल्याची घटना ताजी असतानाच आज वळीत देखील अशीच एक घटना घडलीय. वरळीत लिफ्ट कोसळून दोन जणांचा मृत्यू झालाय. वरळीतील अविघ्न हाऊस मायानगर येशील इमारतीत ही घटना घडलीय. 19 मजल्याची ही इमारत असून पोलिस आणि फायर ब्रिगेडचे अधिकारी घटनास्थळी दाखल झाले आहेत. इमारतीच्या आवारात लिफ्ट कोसळल्यानंतर परिसरात एकच खळबळ उडाली.  
 
मिळालेल्या माहितीनुसार 19 मजली या इमारतीचं बांधकाम पूर्ण झालं होतं. परंतु, लिफ्ट बसवण्याचं काम सुरू होतं. त्याचवेळी ही घटना घडली आहे. लिफ्टमध्ये आणखी काही लोक अडकले आहेत की नाही याबाबत अद्याप माहिती मिळालेली असून पोलिसांनी घटनास्थळी मदत कार्य सुरू केलं आहे. 

अशी घडली घटना 

वरळीतील अविघ्न टॉवरमध्ये दोन व्यक्ती लिफ्ट ट्रॉलीच्या सहाय्याने काच पुसण्याचं काम करत असताना लिफ्ट कोसळली. यावेळी या लिफ्ट ट्रॉलीवर काम करत असलेले दोघे जण सोळाव्या मजल्यावरून लिफ्टसह खाली कोसळले. घटनेनंतर स्थानिक नागरिकांनी दोघांनाही तात्काळ जवळच्या रुग्णालयात उपचारासाठी दाखल केले. परंतु, उपचारदर सुरू असताना दोघांचाही मृत्यू झाला. 

आठवड्यातील दुसरी घटना 

लिफ्ट कोसळून कामगारांचा मृत्यू होण्याची आठवड्यातील ही दुसरी घटना आहे. या पूर्वी 4 जानेवारी 2023 रोजी मुंबईतील विक्रोळी येथील सिद्धिविनायक सोसायटीची पार्किंग लिफ्ट कोसळून एका कामगाराचा मृत्यू झाला होता. शिवम जैस्वाल असं मृत्यू झालेल्या कामगाराचं नाव होतं. लिफ्टचा ढाच्या कोसळल्यानंतर जैस्वाल यांना दीड तासांनंतर त्यातून बाहेर काढण्यात आले होते. परंतु, जैस्वाल हे गंभीर जखमी झाल्यामुळे त्यांचा उपचारादरम्यान मृत्यू झाला.  
 
विक्रोळी येथे  श्री सिद्धिविनायक को-ऑपरेटिव्ह या सोसायटीची 23 माळ्यांची इमारत आहे. या सोसायटीच्या पार्किंग लिफ्टचे काम सुरू होते. काम सुरू असतानाच पार्किंग लिफ्टचा ढाचा 23 व्या मजल्यावरून खाली कोसळला. यावेळी चार कामगार लिफ्टचे काम करत होते. त्यावेळी यातील एका कामगाराचा मृत्यू झाला होता. तर दोघांना बाहेर काढण्यात यश आले होते. दरम्यान, श्री सिद्धिविनायक को-ऑपरेटिव्ह या सोसायटीचे बांधकाम हे अनधिकृत करण्यात आल्याचा आरोप स्थानिक नागरिकांनी केला होता. परवानगी नसताना इमारतीच्या लिफ्टचे बांधकाम सुरू होते. आम्ही याबाबतचे स्ट्रक्चर देखील मागण्याचा प्रयत्न केला. परंतु, आम्हाला याबातची कोणतीच माहिती देण्यात आली नाही. याबाबत आम्ही तक्रारी देखील केल्या आहेत असे स्थानिकांनी म्हटले होते. 

महत्वाच्या बातम्या