मुंबईतील जीएसटी भवनमध्ये अग्नितांडव, अग्निशमन दलाच्या 20 गाड्या घटनास्थळी

माझगाव परिसरात असलेल्या जीएसटी भवनच्या नवव्या मजल्यावर आग लागली आहे.

मुंबई : मुंबईतील माझगाव परिसरात असलेल्या जीएसटी भवनच्या आठव्या मजल्यावर भीषण आग लागली आहे. अग्निशमन दलाच्या 20 ते 22 गाड्या घटनास्थळी रवाना झाल्या असून आगीवर नियंत्रण मिळवण्याचे प्रयत्न सुरु आहेत. उपमुख्यमंत्री अजित पवार वाय बी सेंटरमधील राष्ट्रवादी काँग्रेसची बैठक सोडून घटनास्थळी रवाना झाले आहेत. जीएसटी भवनच्या नव्या इमारतीला ही आग लागली आहे.

सुरुवातील मुंबई अग्निशमन दलाला लेव्हव 3 चा म्हणजेच गंभीर स्वरुपाची आगीचा कॉल देण्यात आला होता. परंतु  ही लेव्हल 4 ची आग असल्याचं अधिकाऱ्यांनी जाहीर केलं.  त्यामुळे अग्निशमन दलाच्या 20 हून जास्त गाड्या, वॉटर टँकर आणि सहा अॅम्ब्युलन्स घटनास्थळी पोहोचल्या आहेत. धूर जास्त असल्याने अग्निशमन दलाच्या जवानांना आगीवर नियंत्रण मिळवण्यात अडचणी येत आहेत. सुमारे 100 जवान आग आटोक्यात आणण्यासाठी कार्यरत आहेत.

धूर येत असल्याचं समजताच इमारतीमधील कर्मचारी बाहेर पडल्याची माहिती इथे काम करणारे कर्मचारी सुशांत खोब्रागडे यांनी दिली. आगीत कोणीही अडकले नसल्याचं समोर येत आहे. तसंच इमारतीमधील बहुतांश साहित्य लाकडी असल्याने आग झपाट्याने पसरत आहे. इमारतीमध्ये जीएसटीसंदर्भातील अनेक महत्त्वाची कागदपत्रे आहेत. आगीमध्ये ती जळून खाक झाल्याची भीती वर्तवली जात आहे. स्पार्किंग झाल्याने आग लागल्याचं कळतं.

दरम्यान, आगीची माहिती मिळताच उपमुख्यमंत्री आणि अर्थमंत्री अजित पवार घटनास्थळी पोहोचले आहेत. इथे ते घटनास्थळाची पाहणी करुन माहिती घेत आहेत. मुंबईतील वाय बी सेंटरमध्ये शरद पवार यांच्या नेतृत्त्वाखाली राष्ट्रवादीची बैठक सुरु होती. यावेळी आगीची माहिती मिळताच अजित पवार बैठक सोडून घटनास्थळी दाखल झाले.

इथे बघ्यांची गर्दी वाढली आहे. सुरक्षेच्या दृष्टीने इमारतीपासून दूर राहण्याचं आवाहन अग्निशमन दल आणि पोलिसांनी केलं आहे.