Mahesh Tutorials Shut down: मोठी बातमी: महेश ट्युटोरियल्स क्लासच्या शाखा धडाधड बंद, विद्यार्थ्यांकडून लाखो रुपये फी घेतली अन् 10 जुलैला गाशाच गुंडाळला

Mahesh Tutorials Shut down: महेश ट्युटोरियल्स ही मुंबईतील नामांकित क्लासेसपैकी एक होती. अचानक क्लास बंद झाल्याने विद्यार्थी आणि पालकांना मोठा धक्का बसला आहे.

Mahesh Tutorials Shut down

Source : ABP Live

Mahesh Tutorials Shut down: गेल्या काही वर्षांपासून मुंबई, पुणे आणि अन्य शहरांमध्ये प्रचंड गाजावाजा असणाऱ्या आणि विद्यार्थ्यांना परीक्षेत चांगले गुण मिळवण्याची हमी देणारी नामांकित कोचिंग संस्था एम.टी. एज्युकेअर लिमिटेडने (महेश ट्युटोरिल्स) अचानक आपल्या सर्व शाखा बंद करण्याचा सपाटा लावला आहे. महेश ट्युटोरियल्स गेल्या काही वर्षांपासून खासगी कोचिंग देणारी (Coaching Classes) संस्था म्हणून प्रचंड लोकप्रिय होती. बारावी, नीट परीक्षा, जेईई, विविध स्पर्धा परीक्षा आणि सीबीएसई व आयसीएससी या मंडळांच्या आठवी ते दहावीच्या विद्यार्थ्यांमध्ये महेश ट्युटोरियल्स क्लास (Mahesh Tutorials) लोकप्रिय होता. या क्लासमध्ये प्रवेश घेतला की आपल्या पाल्याला चांगले गुण हमखास मिळणार, अशी खात्री पालकांना असायची. त्यामुळे अनेक पालक लाखो रुपये फी भरुन आपल्या मुलांना या क्लासेसमध्ये टाकायचे. त्यामुळे गेल्या काही वर्षांमध्ये फक्त मुंबईपुरता मर्यादित असलेल्या महेश ट्युटोरियल्सचा पसारा राज्यभरात पसरला होता. गेल्या 38 वर्षांपासून ही संस्था शैक्षणिक क्षेत्रात कार्यरत आहे. साहजिकच इतकी लोकप्रिय संस्था अचानक बंद झाल्याने अनेकांना आश्चर्याचा धक्का बसला आहे. (Mumbai news)

प्राथमिक माहितीनुसार, महेश ट्युटोरियल्सने विद्यार्थी आणि पालकांना कोणतीही पूर्वसूचना न देता आपल्या क्लासच्या शाखा बंद केल्या आहेत. त्यासाठी संस्था दिवाळखोरीत निघाल्याचे कारण देण्यात आले आहे. 7 जुलैला महेश ट्युटोरियल्सच्या सर्व शाखा चालकांची तातडीची बैठक बोलावण्यात आली होती. त्यानंतर 10 जुलैपासून महेश ट्युटोरियल्सच्या राज्यातील सर्व शाखा तात्काळ प्रभावाने बंद करण्याचा निर्णय घेण्यात आला. यापैकी मुंबईतील विद्यार्थ्यांना अरिहंत अ‍ॅकॅडमीने सामावून घेण्याची तयारी दर्शविली आहे. मात्र, अनेक विद्यार्थ्यांची यंदाच्या वर्षीची फी अगोदरच भरली असल्याने या पैशांचे काय होणार, असा प्रश्न आता पालकांना पडला आहे. 

महेश ट्युटोरियल्सच्या सर्व शाखा अचानक बंद झाल्याने पालक क्लासमध्ये फोन करत आहेत. मात्र, सर्व शाखांवरील दूरध्वनी बंद येत आहेत. काही ठिकाणी फोन वाजत असला तरी कोणी उत्तर देत नाही. मुलुंड येथून सुरु झालेल्या महेश ट्युटोरियल्सच्या राज्यभरात तब्बल 60 शाखा होत्या. यापैकी 40 शाखा या मुंबई महानगर क्षेत्रात होत्या.

Why Mahesh Tutorials Shut down: महेश ट्युटोरियल्स क्लास बंद का झाला?

महेश ट्युटोरियल्स क्लासेस दिवाळखोरीत निघाल्यामुळे बंद करण्यात आल्याची माहिती समोर येत आहे. गेल्या दोन वर्षांपासून याबाबतची प्रक्रिया सुरु होती. 30 सप्टेंबर 2025 रोजी झालेल्या लेखापरीक्षणात (ऑडिट) संस्थेतील अनियमिततेविषयी गंभीर प्रश्न उपस्थित करण्यात आले होते. कंपनीवर सध्या 32.33 कोटी रुपयांचे थकित कर्ज आहे. तसेच काही वादग्रस्त कॉर्पोरेट गॅरंटीचे दायित्त्व आहे. 

आणखी वाचा