हॉस्पिटलने बिलासाठी अडवलं, कल्याणमध्ये नगरसेवकाने कोरोनामुक्त आजींना थेट उचलून आणलं!

कोरोनामुक्त रुग्णाला शिवसेना नगरसेवकाने हॉस्पिटलमधून उचलून आणल्याचा प्रकार कल्याणमधील श्रीदेवी रुग्णालयात घडला आहे. बिलासाठी अडवणूक केल्याने नगरसेवक महेश गायकवाड आक्रमक झाले.

कल्याण : कोरोनावर मात केलेल्या एका आजीबाईंना हॉस्पिटलने बिलासाठी थांबवून ठेवल्याचा प्रकार कल्याणमध्ये समोर आला. यानंतर शिवसेनेच्या नगरसेवकाने थेट पीपीई किट घालत हॉस्पिटलमध्ये प्रवेश केला आणि या आजीबाईंना उचलून बाहेर आणलं.

कल्याण पूर्वेत राहणाऱ्या या आजीबाईंना कोविड-19 झाल्याने त्या 14 दिवसांपूर्वी कल्याणच्या श्रीदेवी हॉस्पिटलमध्ये दाखल झाल्या होत्या. दाखल होताना त्यांना 70 ते 80 हजार रुपये बिल होईल, असं सांगण्यात आलं, त्यानुसार त्यांनी 80 हजार रुपये भरलेही. मात्र डिस्चार्ज देताना त्यांना पीपीई किटचे 49 हजार आणि कचऱ्याची विल्हेवाट लावण्याचे अतिरिक्त पैसे असे वाढीव 70 ते 80 हजार रुपये मागण्यात आले. हे पैसे दिल्याशिवाय डिस्चार्ज देता येणार नसल्याचं सांगत त्यांची अडवणूक करण्यात आली.

ही बाब त्यांच्या कुटुंबीयांनी शिवसेनेचे कल्याण पूर्वेतील नगरसेवक महेश गायकवाड यांना सांगताच महेश गायकवाड यांनी हॉस्पिटलमध्ये जाऊन तिथल्या प्रशासनाशी बोलण्याचा प्रयत्न केला. मात्र हॉस्पिटलने आपल्याशी हुज्जत घातल्याचा आरोप गायकवाड यांनी केला. त्यानंतर संतापलेल्या गायकवाड यांनी थेट पीपीई किट अंगावर चढवला आणि चौथ्या मजल्यावर दाखल असलेल्या या आजीबाईंना थेट उचलून हॉस्पिटलबाहेर आणलं. यानंतर पोलिसांनी घटनास्थळी धाव घेतली. शिवसेनेची आक्रमक भूमिका आणि पोलिसांच्या मध्यस्थीमुळे अखेर हॉस्पिटल प्रशासन नरमलं. मात्र तरी देखील 40 हजार रुपये आकारण्यात आल्याचा आरोप नगरसेवक महेश गायकवाड यांनी केला.

महेश गायकवाड हे कल्याणमधले शिवसेनेचे आक्रमक नगरसेवक म्हणून ओळखले जातात. काही दिवसांपूर्वी मनसेच्या अविनाश जाधव यांच्या अटकेनंतर पालकमंत्री एकनाथ शिंदे यांना मनसैनिकांनी मोठ्या प्रमाणात ट्रोल केलं होतं. त्यांना आक्रमक भाषेत उत्तर देणारा गायकवाड यांचा व्हिडीओही बराच गाजला होता.