शिक्षकांना वरिष्ठ आणि निवड श्रेणी प्रशिक्षणासंदर्भात महत्वाची बातमी; शिक्षक भारतीच्या मागणीला यश
तांत्रिक अडचणींमुळे ज्यांनी उशिरा प्रशिक्षण सुरू केले आहे त्यांना प्रशिक्षण सुरु झाल्यापासून 45 दिवसांपर्यंत मुदतवाढ दिली आहे
Mumbai News : 31 जुलैपर्यंत वरिष्ठ श्रेणी आणि निवड श्रेणी प्रशिक्षण पूर्ण करता येणार असल्याबाबतचे परिपत्रक महाराष्ट्र राज्य शैक्षणिक संशोधन परिषदचे संचालक यांनी जाहीर केले. यानुसार 52,551 प्रशिक्षणार्थी यांनी आतापर्यंत प्रशिक्षण पूर्ण केले असून उर्वरित सर्वांनी 31 जुलैपर्यंत वरिष्ठ श्रेणी आणि निवड श्रेणी प्रशिक्षण पूर्ण करता येणार असल्याच्या स्पष्ट सूचना करण्यात आलेल्या आहेत. 23 आणि 24 जुलै रोजी ऑनलाईन प्रशिक्षण प्रणाली बंद राहणार आहे तसेच तांत्रिक अडचणींमुळे ज्यांनी उशिरा प्रशिक्षण सुरू केले आहे त्यांना प्रशिक्षण सुरु झाल्यापासून 45 दिवसांपर्यंत मुदतवाढ दिली आहे, असंही परिपत्रकात नमूद केले आहे, अशी माहिती शिक्षक भारतीचे कार्याध्यक्ष सुभाष मोरे यांनी दिली आहे.
वरिष्ठ आणि निवड श्रेणी प्रशिक्षणाचे स्वाध्याय जमा करण्यासाठी 15 ऑगस्टपर्यंत मुदत वाढवून मिळावी आणि प्रशिक्षणार्थींना दिलासा द्यावा याबाबत आमदार कपिल पाटील आणि शिक्षक भारतीच्या वतीने महाराष्ट्र राज्य शैक्षणिक संशोधन परिषदचे संचालक यांना पत्र पाठवण्यात आले होते.
वरिष्ठ श्रेणी आणि निवडश्रेणी प्रशिक्षणाच्या अभ्यासक्रमात प्रशिक्षणार्थींना दिलेल्या मोड्युल (प्रकरणे) ची संख्या जास्त आहे. व्हिडिओंची संख्या आणि व्हिडिओ पाहण्यासाठी लागणारा वेळ खूप जास्त आहे. PDF चे वाचन, व्हिडिओचे निरीक्षण करून स्वाध्याय हस्ताक्षरात लिहिणे व लिहिलेल्या स्वाध्यायांचे PDF अपलोड करणे यासाठी 15 जुलै 2022 पर्यंतचा दिलेला कालावधी खूप कमी पडत आहे. शिक्षकांना शालेय कामकाज करून प्रशिक्षणाचे दररोज चार ते पाच तास कामकाज करणे यासाठी पुरेसा वेळ मिळालेला नाही.
दि. 01 जून 2022 पासून राज्यात इन्फोसिस स्प्रिंग बोर्ड APP च्या माध्यमातून वरिष्ठ आणि निवड श्रेणीचे सेवांतर्गत प्रशिक्षण सुरू आहे. 15 जूनपासून शाळा सुरू झाल्या आहेत. राज्यात सेतू अभ्यासक्रम आणि जूलै महिन्यातील स्कॉलरशिप परीक्षेची तयारी सुरू आहे. या सर्व पार्श्वभूमीवर वरीष्ठ व निवड श्रेणी प्रशिक्षणाचे स्वाध्याय जमा करण्यासाठी मुदतवाढ मिळाल्यामुळे प्रशिक्षणार्थींना मोठा दिलासा मिळाला आहे.
महत्त्वाच्या बातम्या
ट्रेंडिंग न्यूज
