Drought Relief Maharashtra : दुष्काळाची पाहणी करण्यासाठी केंद्रीय पथक राज्यात दाखल; प्रशासनाकडून सादरीकरण, शेतकऱ्यांना लवकरच दिलासा मिळणार
Central Team Visit Drought Maharashtra : खरीप हंगामातील दुष्काळ, पिण्याचे पाणी, पिकांच्या नुकसानीची प्रत्यक्ष पाहणी करण्यासाठी केंद्राचे विशेष पथक 8 ते 11 ऑक्टोबर दरम्यान राज्याच्या दौऱ्यावर आले आहे.
मुंबई : राज्यातील खरीप हंगामातील दुष्काळी परिस्थिती (Maharashtra Drought) आणि पिकांच्या झालेल्या नुकसानीची प्रत्यक्ष पाहणी करण्यासाठी केंद्र सरकारचे आंतरमंत्रालयीन पथक गुरुवारी (8 ऑक्टोबर) महाराष्ट्राच्या दौऱ्यावर दाखल झाले आहे. 8 ते 11 ऑक्टोबर दरम्यान होणाऱ्या या चार दिवसीय दौऱ्यात केंद्रीय पथक राज्यातील विविध जिल्ह्यांमध्ये जाऊन दुष्काळी परिस्थिती, पिण्याच्या पाण्याची उपलब्धता, पिकांचे नुकसान आणि जनावरांच्या चाऱ्याची स्थिती यांचा प्रत्यक्ष आढावा घेणार आहे.
सह्याद्री अतिथीगृहावर प्रशासनाकडून सविस्तर सादरीकरण
मुंबईत आगमन झाल्यानंतर सह्याद्री अतिथीगृह येथे राज्याचे मुख्य सचिव राजेश अग्रवाल यांच्या प्रमुख उपस्थितीत उच्चस्तरीय बैठक पार पडली. या बैठकीत राज्य सरकारच्या विविध विभागांच्या सचिवांनी राज्यातील दुष्काळाची भीषणता केंद्रीय पथकासमोर मांडली.
टंचाई आणि मजुरांचे प्रश्न: पावसाच्या कमतरतेमुळे निर्माण झालेली पाणीटंचाई, टँकर्सची गरज, शेतमजुरांचे प्रश्न आणि संभाव्य स्थलांतर याकडे मुख्य सचिवांनी लक्ष वेधले.
अल निनोचा फटका: मदत व पुनर्वसन विभागाच्या अपर मुख्य सचिव विनिता वेद-सिंगल यांनी 'अल निनो'मुळे हवामानावर झालेला परिणाम आणि पिकांच्या नुकसानीची तांत्रिक आकडेवारी सादर केली.
जिल्हानिहाय पीक नुकसान: कृषी विभागाचे सचिव परिमल सिंह आणि आयुक्त सुरज मांढरे यांनी जिल्हानिहाय पिकांच्या नुकसानीची वस्तुनिष्ठ माहिती दिली.
पिण्याचे पाणी आणि जनावरांच्या चाऱ्याची स्थिती
यंदा पावसाचे प्रमाण कमी झाल्याने राज्यातील अनेक भागांत पिण्याच्या पाण्याची आणि जनावरांच्या चाऱ्याची गंभीर समस्या निर्माण झाली आहे. पाणीपुरवठा विभागाचे अपर मुख्य सचिव पराग जैन यांनी सध्या टँकरद्वारे सुरू असलेल्या पाणीपुरवठ्याची माहिती दिली. तसेच पशुसंवर्धन आयुक्त डॉ. किरण पाटील यांनी आगामी सात महिन्यांसाठी जनावरांच्या चाऱ्याच्या आवश्यकतेचा आणि संभाव्य परिस्थितीचा आढावा केंद्रीय पथकासमोर मांडला.
11 ऑक्टोबरला मुंबईत होणार अंतिम चर्चा
राज्य सरकारने सादर केलेल्या माहितीच्या आणि पुराव्यांच्या आधारे केंद्रीय पथकाने प्रत्यक्ष पाहणीसाठी जिल्हे आणि ठिकाणे निश्चित केली आहेत. केंद्रीय पथकातील अधिकारी विविध गटांमध्ये विभागून राज्यातील दुष्काळग्रस्त भागांना भेटी देतील आणि स्थानिक अधिकारी व शेतकऱ्यांशी संवाद साधतील. प्रत्यक्ष पाहणी पूर्ण केल्यानंतर हे पथक मुंबईत परतणार असून 11 ऑक्टोबर रोजी दुष्काळी मदत आणि उपायांबाबत राज्य सरकारसोबत अंतिम सविस्तर चर्चा करणार आहे.
या बैठकीस महसूल विभागाचे अपर मुख्य सचिव विकास खारगे, ग्रामविकास विभागाचे सचिव डॉ. चंद्रकांत पुलकुंडवार, पर्यावरण विभागाच्या सचिव जयश्री भोज यांच्यासह केंद्रीय पथकातील सदस्य आणि राज्यातील संबंधित विभागांचे वरिष्ठ अधिकारी उपस्थित होते.
ही बातमी वाचा:
महत्त्वाच्या बातम्या
