पनवेल लवकरच महानगरपालिका

पनवेल : पनवेल महानगरपालिका स्थापन करण्यासाठी नगरविकास विभागाने मुख्यमंत्री देवेंद्र फडणवीस यांच्याकडे पाठवलेल्या प्रस्तावावर मुख्यमंत्र्यांनी स्वाक्षरी केली असून, शुक्रवारपर्यंत महापालिकेची अधिसूचनाही विधी व न्याय खात्यामार्फत काढण्यात येणार आहे.   पनवेल महापालिकेत 68 गावांचा समावेश   पनवेलसह लगतच्या 68 गावांचा समावेश करून नवीन महापालिका स्थापन करण्यात यावी, असा प्रस्ताव एमएमआरडीएने राज्य सरकारला पाठवला होता. कोकण विभागीय आयुक्तांनी ही महापालिका स्थापन करण्यास हिरवा कंदील दाखविला होता. त्यानंतर आता मुख्यमंत्र्यांनी प्रस्तावावर स्वाक्षरी केल्याने महापालिका स्थापन करण्याचा मार्ग मोकळा झाला आहे.   राज्यातील 27 वी महापालिका   पनवेल नगरपालिकेसह लगतच्या 68 गावांचा महानगरपालिकेत समावेश असणार आहे. पनवेल महापालिका राज्यातील 27 वी महापालिका असेल. तर मुंबई महानगर प्रदेशामधील ही नववी महापालिका ठरणार आहे.   चार नियोजन प्राधिकरणं   या नव्या महापालिकेत एमएमआरडीए, सिडको, नवी मुंबई विमानतळ प्राधिकरण आणि एमआयडीसी ही चार नियोजन प्राधिकरणे आहेत. नवी मुंबईचे विमानतळ हे या नव्या महापालिकेच्या हद्दीत येत नाही.   नव्या पनवेल महापालिकेचे वैशिष्ट्यं:  

• नगरपालिका व गावांची लोकसंख्या - 5 लाख 95 हजार
• महापालिका क्षेत्रात 90 टक्के नोकरीदार-व्यावसायिक
• महापालिका क्षेत्रात 10 टक्के कृषिक्षेत्र
• नव्या पनवेल महापालिकेचे क्षेत्र 1700 हेक्टर

  महाराष्ट्रातील एकूण महापालिका:   मुंबई महानगर प्रदेश

1. बृह्नमुंबई
2. ठाणे
3. कल्याण-डोंबिवली
4. नवी मुंबई
5. मिरा-भाईंदर
6. उल्हासनगर
7. वसई-विरार
8. भिवंडी-निजामपूर

  पश्चिम महाराष्ट्र

9. पुणे
10. पिंपरी-चिंचवड
11. सोलापूर
12. सांगली-मिरज-कुपवाड
13. कोल्हापूर

  उत्तर महाराष्ट्र

14. नाशिक
15. मालेगाव
16. अहमदनगर
17. धुळे
18. जळगाव

  मराठवाडा

19. औरंगाबाद
20. नांदेड-वाघाळा
21. लातूर
22. परभणी

  विदर्भ

23. नागपूर
24. अमरावती
25. अकोला
26. चंद्रपूर

  नवी महापालिका

27. पनवेल