भूमाफियांकडून कोरोना काळात केलेल्या 9 हजारहून अधिक अनधिकृत बांधकामांवर पालिकेची कारवाई

सरासरी काढल्यास दर महिन्याला सरासरी 796 तर दररोज 26 अनधिकृत बांधकामे उभारण्यात आल्याचे चित्र समोर येते

corona

मुंबई : मुंबईत मार्च 2020 पासून कोरोनाचा प्रादुर्भाव वाढला. आजही कोरोना नियंत्रणात असला तरी प्रादुर्भाव कायम आहे. पालिका यंत्रणा कोरोनाशी दोन हात करण्यात व्यस्त राहिल्याने दुसरीकडे या संधीचा लाभ उठवून काही भूमाफियांनी गेल्या वर्षभरात अनधिकृत बांधकामे सुसाट वेगाने उभारल्याचे पालिकेनेच माहितीच्या अधिकारात आरटीआय कार्यकर्ते शकील शेख यांना दिलेल्या उत्तरात उघडकीस आले आहे. 

25 मार्च 2020 ते 28 फेब्रुवारी 2021 या कालावधीत मुंबई महापालिकेकडे 24 प्रभागात अनधिकृत बांधकामांबाबत एकूण 13 हजार 325 तक्रारी प्राप्त झाल्या असून त्यापैकी 3 हजार 767 तक्रारी या दुबार स्वरूपाच्या असल्याने प्रत्यक्षात अनधिकृत बांधकामांची संख्या 9 हजार 558 एवढी आहे. याबाबतची सरासरी काढल्यास दर महिन्याला सरासरी 796 तर दररोज 26 अनधिकृत बांधकामे उभारण्यात आल्याचे चित्र समोर येते.

कुर्ला येथे सर्वाधिक 2002 अनधिकृत बांधकामे ; फक्त 52 प्रकरणात कारवाई 

पालिकेने दिलेल्या माहितीनुसार, सर्वाधिक अनधिकृत बांधकामे कुर्ला येथे आहेत. या विभागात अनधिकृत बांधकामांबाबत 3 हजार 251 तक्रारी प्राप्त झाल्या असून त्यापैकी 1 हजार 249 तक्रारी दुबार असल्याने अनधिकृत बांधकामांची संख्या 2002 एवढी आहे. मात्र याउलट फक्त 52 प्रकरणात अनधिकृत बांधकामांवर कारवाई करण्यात आली आहे. त्यामुळे अत्यंत कासवगतीने अनधिकृत बांधकामांवर कारवाई करण्यात येत असल्याचे सांगत शकील यांनी तीव्र नाराजी व्यक्त केली आहे.

9558 पैकी केवळ 466 अनधिकृत बांधकामांवर कारवाई 

मुंबईतील 24 प्रभागात अनधिकृत बांधकामांची संख्या ही 9 हजार 558 एवढी असून पालिकेच्या अतिक्रमण निर्मूलन पथकाने त्यापैकी केवळ 466 अनधिकृत बांधकामांवर कारवाई केल्याची माहिती समोर आली आहे. त्यामुळे आरटीआय कार्यकर्ता शकील यांनी पालिकेच्या या मंदगतीने सुरू असलेल्या कारवाईबाबत संताप व्यक्त केला आहे. एकीकडे कंगना सारख्या अभिनेत्रींच्या अनधिकृत बांधकामांबाबत पालिका जाणीवपूर्वक कारवाई करते व प्रकरण कोर्टात गेल्यास खासगी वकिलांवर लाखो रुपये उधळते. तर मग या भूमाफियांचा अनधिकृत कामांवर कारवाई करताना पालिकेच्या संबंधित अधिकार्यांच्या हाताला लकवा मारतो का ? असा सवाल त्यांनी उपस्थित केला आहे.

       वार्ड        अनधिकृत      कारवाई
                      बांधकामे 
 
        ए                24                 1
        बी             182                  2
       सी             389                  24 
         डी             78                  15
         ई               436                0
   एफ/उत्तर          90                 9
    एफ/ दक्षिण     214               3
    जी/ उत्तर          150              7
    जी/दक्षिण         122            15
     एच/ पूर्व           232           11
    एच/ पश्चिम        429            21
    के/पूर्व               395           33
     के/पश्चिम          302            58
      एल                 2002          52
     एम/पूर्व             1174           8
     एम/ पश्चिम        678            33
      एन                   240             4
     पी/ उत्तर            342            62
     पी/दक्षिण           233            4
     आर/उत्तर           505            14
      आर/दक्षिण        314            75
      आर/ मध्य          196            4
     एस                     552            8
       टी                     240            3   
          
     एकूण                9558        466