नियम मोडणाऱ्या, कचरा करणाऱ्या मुंबईकरांवर 10 हजार कॅमेरांची नजर

कुणाच्या नकळत अगदी गुपचूप रस्त्याच्या कडेला कचरा टाकत असाल, डेब्रीजचा डंपर रिकामा करत असाल, नाल्यात कचरा फेकत असाल, तर सावध व्हा. कारण, तुमच्यावर बिग बॉसची नजर असणार आहे.

मुंबई : मुंबईकरांनो, आता मुंबईत कोणताही नियम मोडताना दहा वेळा विचार करा. कारण मुंबईतल्या रस्त्यांवर आता कुठेही साधा कचरा जरी टाकला तरी तुमच्यावर करडी नजर ठेवली जाणार आहे. मुंबई स्वच्छ आणि दुर्घटनामुक्त करण्याच्या दृष्टीने मुंबई महापालिका 500 ठिकाणी सीसीटीव्ही बसवणार आहे. तर, राज्य सरकारही निर्भया फंडातून वाढीव पाच हजार सीसीटीव्ही कॅमेरे लावणार आहे.

कुणाच्या नकळत अगदी गुपचूप रस्त्याच्या कडेला कचरा टाकत असाल, डेब्रीजचा डंपर रिकामा करत असाल, नाल्यात कचरा फेकत असाल, तर सावध व्हा. कारण, तुमच्यावर बिग बॉसची नजर असणार आहे.

मुंबईभर मुंबई पोलिसांचे पाच हजार डोळे सिसीटीव्हीच्या रुपाने सध्या मुंबईवर नजर ठेऊन आहेत. पण, हे पाच हजार डोळे मुंबईतल्या प्रत्येक घडामोडीवर बारकाईने लक्ष ठेवायला अपुरे पडत आहेत. त्यासाठी आता वाढीव साडेपाच हजार सिसीटीव्ही सज्ज होणार आहेत. त्यामुळे मुंबईकरांवर 10 हजार 500 कॅमेरांची नजर असणार आहे. केंद्र सरकारच्या निर्भया फंडातून 5 हजार तर मुंबई महापालिकेच्या खर्चातून 500 सिसीटीव्ही शहरात बसवले जाणार आहेत.

मुंबई पोलिसांकडून बसवले जाणारे सीसीटीव्ही हे गुन्हेगारी आणि वाहतुकीवर नियंत्रण ठेवण्याच्या दृष्टीने महत्त्वाचे आहेत. त्याचा फारसा उपयोग मुंबई महापालिकेला होत नाही. त्यामुळेच आता मुंबई महापालिकेकडून इस्त्रायलच्या धर्तीवर व्हिडीओ अॅनालिटिक्स टूल हे आधुनिक तंत्र असणारे सिसीटीव्ही बसवले जाणार आहेत.

व्हिडीओ अॅनालिटिक्स टूल म्हणजे काय? या टूलद्वारे (कॅमेराद्वारे) झाड कोसळणे, इमारत पडणे, आग लागणे, पूरस्थिती निर्माण होणे, अवैधरित्या रस्ते-नाल्यांमध्ये कचरा आणि डेब्रीज टाकणे, चेंगराचेंगरीची परिस्थिती निर्माण झाल्यास या घटनांचे तात्काळ नोटीफिकेशन पालिकेच्या आपत्कालीन कक्षाला प्राप्त होतील. परिणामी संबंधित यंत्रणांना लगेच कळवले जाईल.

मुंबईच्या आप्तकालीन नियंत्रण कक्षाने शहरातील अशी काही ठिकाणं निवडली आहेत, ज्या ठिकाणी वारंवार डेब्रिज किंवा कचरा टाकला जातो. तसेच पावसाळ्यात नेहमी पाणी साचणाऱ्या ठिकाणांचीही यात निवड करण्यात आली आहे. यामुळे मुंबई स्वच्छ आणि दुर्घटनामुक्त ठेवण्यासाठी या 500 सीसीटीव्हींची मदत मुंबई महापालिका प्रशासनाला होणार आहे.