30 नोव्हेंबर पासून राज्यातील साखर कामगार बेमुदत संपावर

राज्य सरकारने कामगारांच्या मागण्याच्या बाबतीत सकारात्मक भूमिका घेतली नाही,तर बेमुदत आंदोलन चालूच राहील,असा इशारा राज्य साखर कामगार युनियनचे सचिव प्रदीप शिंदे यांनी दिला आहे.

सांगली : पगार वाढ व सातवा वेतन लागू करण्याच्या मागणीसाठी राज्यातले साखर कामगार हे येत्या 30 नोव्हेंबर पासून बेमुदत संपावर जाणार आहेत. दीड लाख साखर कामगार या आंदोलनात उतरणार असल्याची माहिती साखर कामगार युनियनच्या कडून देण्यात आलेली आहे. गेल्या चौदा महिन्यांपासून राज्यातल्या साखर कामगारांचे करार प्रलंबित आहेत. राज्य सरकार आणि साखर संघाकडे कामगारांच्या विविध मागण्यांसाठी पाठ पुरावा करण्यात येत आहे.

साखर कामगारांच्या मागण्यांकडे आतापर्यत दुर्लक्ष करण्यात येत आहे. राज्यात साखर कारखानदारांची सत्ता आल्यावर किमान कामगारांना न्याय मिळेल,अशी अपेक्षा होती.मात्र राज्य सरकारने कामगारांच्या मागण्या त्याबाबतीत दुर्लक्ष करण्याची भूमिका घेतली,असा आरोप कामगार युनियनकडून करण्यात आला आहे. त्यामुळे आता कामगारांच्या समोर आंदोलन करण्याशिवाय पर्याय नसल्याने येत्या 30 नोव्हेंबर रोजी पहाटे चार वाजल्यापासून राज्यातल्या सर्व साखर कारखान्याचे कामगार बेमुदत संपावर जातील आणि कारखाने बंद पडतील,असं महाराष्ट्र राज्य साखर कामगार युनियन कडून जाहीर करण्यात आले आहे.

सांगलीमध्ये राज्याच्या कामगार युनियनच्या कार्यकारिणीची बैठक पार पडली आणि यामध्ये हा निर्णय घेण्यात आलेला आहे. त्यामुळे साखर हंगाम सुरू होताना शेतकरी संघटनेच्या आंदोलना बरोबर साखर कारखानदारांना कामगारांच्या आंदोलनालाही सामोरे जावे लागणार आहे. राज्य सरकारने कामगारांच्या मागण्याच्या बाबतीत सकारात्मक भूमिका घेतली नाही,तर बेमुदत आंदोलन चालूच राहील,असा इशारा राज्य साखर कामगार युनियनचे सचिव प्रदीप शिंदे यांनी दिला आहे.