प्रदीप पूर्णेकर मृत्यू प्रकरण! माजी महापौर मिनाक्षी शिंदेंना चौकशीला बोलावणार? सुत्रांनी दिली महत्वाची माहिती

प्रदीप पूर्णेकर ( Pradeep Purnekar) हत्या प्रकरणी एक महत्वाची अपडेट समोर आली आहे. ठाणे महापालिकेच्या माजी महापौर मिनाक्षी शिंदे यांना लवकरच चौकशीला बोलवण्याची शक्यता आहे.

Pradeep Purnekar death case

Source : Getty Images

Pradip Purnekar Case News :  ठाण्याच्या मानपाडा परिसरातील ठाकरे गटाचे विभागप्रमुख प्रदीप पूर्णेकर ( Pradeep Purnekar)  यांची गोळ्या झाडून निर्घृण हत्या (Murder news) करण्यात आली होती. या घटनेनंतर परिसरात तणावाचं वातावरण पाहायला मिळत आहे. अशातच या प्रकरणी एक महत्वाची अपडेट समोर आली आहे. ठाणे महापालिकेच्या माजी महापौर मिनाक्षी शिंदे यांना लवकरच चौकशीला बोलवण्याची शक्यता आहे. सुत्रांनी याबाबतची माहिती दिली आहे. 

मिनाक्षी शिंदे यांचे पती राजेंद्र शिंदे यांची चौकशी सुरु 

आज मिनाक्षी शिंदे यांचे पती राजेंद्र शिंदे यांची चौकशी सुरु आहे. गेल्या 7 तास चौकशी सुरु आहे. मिनाक्षी शिंदे यांच्यामुळे जिवाला धोका आहे असं जाहीररित्या अनकेदा प्रदिप पुर्णेकर बोलले होते. तर, पुर्णेकरांच्या हत्येनंतर या हत्येमागे मिनाक्षी शिंदे आणि त्यांचे पती राजा शिंदे यांचा हात असल्याचा आरोप पुर्णेकर परिवाराने केला होता.  

प्रदीप पूर्णेकर यांची 29 सप्टेंबरला रात्री झाली होती हत्या

प्रदीप पूर्णेकर यांची 29 सप्टेंबरला रात्री साडेनऊच्या सुमारास मनोरमा नगरमधील त्यांच्या कार्यालयात हत्या झाली होती. पाच मारेकऱ्यांनी कार्यालयात घुसून प्रदीप पूर्णेकर यांच्यावर गोळ्या झाडल्या होत्या आणि त्यांच्यावर कोयत्याने वार करुन त्यांना ठार मारले होते. याप्रकरणात पूर्णेकर कुटुंबाने ठाण्याच्या माजी महापौर मिनाक्षी शिंदे आणि त्यांचे पती राजेंद्र शिंदे यांच्यावर गंभीर आरोप केले होते. राजकीय वैर आणि स्थानिक पातळीवर वर्चस्वाच्या लढाईतून मिनाक्षी शिंदे आणि राजेंद्र शिंदे यांनीच प्रदीप पूर्णेकर यांना सुपारी देऊन संपवले, असा दावा पूर्णेकरांच्या कुटुंबाने केला होता. संजय राऊत आणि आदित्य ठाकरे यांनी पोलीस ठाण्यात ठिय्या मांडल्यानंतर पोलिसांकडून पुरवणी एफआयआरमध्ये राजेंद्र शिंदे आणि मिनाक्षी शिंदे यांच्या नावाचा समावेश केला होता. मात्र, या दोघांविरोधात कोणतीही ठोस कारवाई झाली नव्हती. परंतु, आता राजेंद्र शिंदे यांना चौकशीला बोलावल्याने आणि पूर्णेकर यांच्या मारेकऱ्यांसमोर बसवून त्यांची चौकशी होत असल्याने पोलिसांच्या हाती एखादा महत्त्वाचा दुवा लागल्याची शक्यता वर्तविली जात आहे.  

प्रदीप पूर्णेकर हत्या प्रकरणात मुख्य आरोपी संतोष कनजिया उर्फ टल्ली आणि आरोपी अमित जयकिशन सिंग उर्फ पपलू या दोघांना काहीवेळापूर्वीच ठाणे खंडणी विरोधी पथक गुन्हे शाखा येथे चौकशीसाठी आणण्यात आले. क्राईम ब्रांचकडे सध्या हत्येत सहभागी पाचही आरोपी अटकेत आहेत. त्यांना देखील समोरासमोर बसवून उलट तपासणी करण्यात आली. या चौकशीत समोर आलेले मुद्दे घेऊन आज राजेंद्र शिंदे यांना चौकशीला बोलावण्यात आले होते. त्यानंतर आता  आरोपी आणि राजेंद्र शिंदे यांची आता समोरासमोर चौकशी सुरू आहे.