'हर्र बोला हर्र'च्या जयघोषात शिवयोगी सिद्धेश्वरांचा अक्षता सोहळा संपन्न

सनई चौघडे, भक्‍तीगीतांचा मंजुळ स्वर , 'भक्‍तलिंग हर बोला हर'च्‍या जयघोषात ग्रामदैवत शिवयोगी श्री सिद्धेश्‍वराच्‍या योगदंडाचा प्रतिमात्मक विवाह सोहळा आज दुपारी साडेबारा वाजता पार पडला.

सोलापूर : सनई चौघडे, भक्‍तीगीतांचा मंजुळ स्वर , 'भक्‍तलिंग हर बोला हर'च्‍या जयघोषात ग्रामदैवत शिवयोगी श्री सिद्धेश्‍वराच्‍या योगदंडाचा प्रतिमात्मक विवाह सोहळा आज दुपारी साडेबारा वाजता पार पडला. हजारो भाविकांनी या अक्षता सोहळ्याला उपस्थित राहून हा विवाह सोहळा आपल्या डोळ्यांत साठवून ठेवला. महाराष्ट्र, कर्नाटक आणि आंध्र प्रदेशातील भाविक अक्षता सोहळ्यासाठी एकत्र आले होते. श्री सिद्धेश्वरांनी त्यांच्या विवाह सोहळ्याच्या मगलाष्टका त्यांनी स्वतःच रचल्या होत्या. या मंगलाष्टकांच्या मानकऱ्यांनी मंगलाष्टका पठण करून विवाह सोहळा संपन्न झाला. यंदा दरवर्षीपेक्षा दोन तास लवकर विवाह सोहळा सुरु झाला. दरम्यान या सोहळ्याला सहकारमंत्री सुभाष देशमुख, पालकमंत्री विजय कुमार देशमुख आणि माजी केंद्रीय मंत्री सुशीलकुमार शिंदे, आमदार प्रणिती शिंदे, खासदार शरद बनसोडे, खासदार अमर साबळे यांच्यासह अनेक मान्यवरांनी हजेरी लावली होती. सकाळी आठ वाजता मानाचे सात नंदीध्वज हिरेहब्बू वाड्यात जमा होऊन विधिवत पूजेनंतर विवाह सोहळ्यासाठी रवाना झाले. मिरवणुकीच्या मार्गावर साडेतीन किलोमीटर लांबीची रांगोळी काढण्यात आली होती. श्री सिध्देश्वरांची सेवा करण्यासाठी संस्कार भरतीच्या माध्यमातून 15 राज्यातील लोक रांगोळीच्या पायघड्या काढण्यासाठी सोलापुरात येतात. या पायघड्यांना स्पर्श करीत दुपारी 12 वाजता मानाचे नंदीध्वज विवाहाचे ठिकाण असलेल्या सम्मती कट्ट्याजवळ पोहचले.