कोल्हापूरच्या संभाजीराजेंचा उदयनराजेंना पाठिंबा!

साताऱ्यातील राष्ट्रवादीचे खासदार उदयनराजे यांना खंडणीच्या गुन्ह्यात अटक होण्याची शक्यता असताना आता खासदार संभाजीराजे छत्रपती हे उदयनराजेंच्या समर्थनासाठी मैदानात उतरले आहेत. उदयनराजेंच्या प्रत्येक अडचणीत कोल्हापूर छत्रपती घराणे त्यांच्या सोबत असल्याचे संभाजीराजेंनी फेसबुकवरील पोस्टमधून सांगितले.

मुंबई : साताऱ्यातील राष्ट्रवादीचे खासदार उदयनराजे यांना खंडणीच्या गुन्ह्यात अटक होण्याची शक्यता असताना आता खासदार संभाजीराजे छत्रपती हे उदयनराजेंच्या समर्थनासाठी मैदानात उतरले आहेत. उदयनराजेंच्या प्रत्येक अडचणीत कोल्हापूर छत्रपती घराणे त्यांच्या सोबत असल्याचे संभाजीराजेंनी फेसबुकवरील पोस्टमधून सांगितले. संभाजीराजेंची फेसबुक पोस्ट

“काल रात्री छत्रपती उदयनराजे भोसले यांच्याशी माझी चर्चा झाली.ज्या अडचणीचा ते सामना करत आहेत त्या अडचणीत कोल्हापूर छत्रपती घराणे पुर्णपणे त्यांच्यासोबत आहे. कुठल्याही संकटाचा सामना कसा करायचा हे छत्रपती घराण्याला चांगल माहित आहे. संकट ही आम्हाला नवीन नाहीत.लवकरच ते यामधून बाहेर येतील याचा मला पूर्ण विश्वास आहे.” -छत्रपती संभाजीराजे

याआधी राष्ट्रवादीचे आमदार जितेंद्र आव्हाड आणि काँग्रेसचे खासदार राजीव सातव यांनीही उदयनराजेंचं समर्थन केले होते. काय आहे प्रकरण? लोणंद येथील सोना अलाईज कंपनीचे मालक राजकुमार जैन यांना खंडणीसाठी धमकावल्या प्रकरणी उदयनराजे भोसलेंवर गुन्हा दाखल करण्यात आला होता. त्यांच्यासोबत तब्बल 15 जणांवर गुन्हा दाखल करण्यात आला होता. त्यापैकी 9 जणांना अटकही करण्यात आली आहे. उदयनराजे यांनी याप्रकरणी अटकपूर्व जामिनासाठी अर्जकेला होता. पण हायकोर्टानं त्यांचा जामीन अर्ज फेटाळून लावला. त्यामुळे आता उदयनराजे स्वत: पोलीस ठाण्यात हजर होणार का? हे पाहणं महत्त्वाचं ठरणार आहे. याच पार्श्वभूमीवर शुक्रवारी रात्री उदयनराजे यांनी हजारो समर्थकांसह साताऱ्यात जोरदार एंट्री केली. यावेळी मोठ्या प्रमाणात समर्थक रस्त्यावर उतरल्याचं दिसून आले. पदयात्रेदरम्यान आमदार शिवेंद्रराजे यांनी उदयनराजे भोसले यांचीही धावती भेट घेत विचारपूस केली. या भेटीने अनेकांच्या भुवया उंचावल्या असून सध्या चर्चेला उधाण आलं आहे.