सीएएविरोधात परभणीतील दोन नगरपरिषदांमध्ये ठराव संमत, भाजपचा एक नगराध्यक्ष, एक उपनगराध्यक्ष निलंबित

देशात एकीकडे सीएए आणि एनआरसीवरुन वातावरण तापलेलं असताना भाजपच्या ताब्यातल्या नगर पालिकेनं असा ठराव मंजूर केला आहे. विशेष म्हणजे भाजपचे नगराध्यक्ष विनोद बोराडे यांनीच खुद्द सीएए विरोधी ठराव मांडला.

परभणी : सीएएविरोधात नगरपरिषदेत ठराव करणाऱ्या परभणीतील दोन नगराध्यक्षांवर भाजपनं निलंबनाची कारवाई केली आहे. पालम नगरपरिषदचे नगराध्यक्ष बाळासाहेब गणेश रोकडे आणि सेलू नगर परिषदेचे उपनगराध्यक्ष विनोद बोराडे यांना पक्षातून निलंबित केल्याची घोषणा प्रदेशाध्यक्ष चंद्रकांत पाटील यांनी केली आहे. केंद्र सरकारनं लागू केलेल्या नागरिकत्व दुरुस्ती कायदा अर्थात सीएए आणि राष्ट्रीय नागरिक नोंदणी अर्थात एनआरसीविरोधात भाजपचीच सत्ता असलेल्या सेलू आणि पालम नगरपरिषदेत ठराव मंजूर करण्यात आला होता. 28 फेब्रुवारीच्या परभणीच्या सेलू नगरपरिषदेच्या सर्वसाधारण सभेत हा ठराव संमत झाला आहे. सेलू नगरपालिकेत भाजपची सत्ता असताना आता तिथेच सीएए आणि एनआरसी विरोधात ठराव झाला आणि तो संमतही झाला. सदस्यांशी चर्चा करून तो 28 पैकी 26 अशा मताधिक्क्यानं पारितही झाला. त्यामुळे या निर्णयाची सध्या जिल्हाभर चर्चा आहे. नगराध्यक्ष विनोद बोराडे हे भाजप आमदार मेघना बोर्डीकर यांचे कट्टर समर्थक मानले जातात. त्यांच्या या निर्णयामुळे मेघना बोर्डीकर देखील अडचणीत येऊ शकतात. विशेष म्हणजे 28 पैकी 26 नगरसेवकांनी या ठरावावर स्वाक्षऱ्या केल्या होत्या. केवळ शिवसेनेचे नगरसेवक मनीष कदम आणि आशा दिशागत यांनी पक्षाची भूमिका पक्षश्रेष्ठींना विचारून मग आपली भूमिका मांडणार असल्याचे सांगून स्वाक्षऱ्या केल्या नाहीत. महत्त्वाचे म्हणजे हा ठराव घेतल्याचे अत्यंत गुप्त ठेवण्यात आले होते. बोराडेंचा नुकताच फडणवीसांच्या उपस्थितीत भाजप प्रवेश सेलू नगरपालिकेचे नगराध्यक्ष विनोद बोराडे यांचे एक हाती वर्चस्व आहे. विनोद बोराडे आमदार मेघना बोर्डीकर तथा त्यांचे वडील रामप्रसाद बोर्डीकर यांचे कट्टर समर्थक आहेत. त्यांनी विधानसभा निवडणुकीच्या अगोदर झालेल्या महाजनादेश यात्रेत देवेंद्र फडणवीस यांच्या उपस्थितीत आपल्या अठरा नगरसेवकांसह भाजपमध्ये प्रवेश केला होता. दुसरीकडे पालम नगर पंचायतीमध्ये शहर विकास आघाडीची सत्ता आहे. तर भाजपकडे पालममधील उपनगराध्यक्ष पद आहे. पालम नगर पंचायतीमध्येही 2 मार्चला अर्थसंकल्पीय सर्वसाधारण सभा झाली होती. या सभेतदेखील सीएए विरोधात ठराव घेण्यात आला. यामुळे भाजपाचे उपनगराध्यक्ष बाळासाहेब गणेश रोकडे यांच्यावरदेखील कारवाई करण्यात आली आहे. भारतीय जनता पक्षाने सीएएविरोधात ठराव घेऊन त्याचं समर्थन केल्यामुळे रोकडे यांनाही निष्कासित केलं आहे. भारतीय जनता पक्षाचे प्रदेशाध्यक्ष चंद्रकांत पाटील यांनी याबाबत अधिकृत पत्र काढत दोघांवर निलंबनाची कारवाई केली आहे.