Prakash Mahajan : ज्यांच्याविरोधात मोर्चा काढला, गोपीनाथ मुंडेंचं डोकं फुटलं, तेच आज भाजपसोबत, महाजनांचं 'मॉडर्न' भाजपवर टीकास्त्र
Prakash Mahajan On Gopinath Munde : गोपीनाथ, तू भाजपच्या नादी लागू नकोस. काँग्रेसमध्ये जा, मुख्यमंत्री होशील असा सल्ला आपल्या वडिलांनी दिला होता अशी आठवण प्रकाश महाजन यांनी सांगितली.
छत्रपती संभाजीनगर : गोपीनाथ मुंडे यांनी जळवळीतून उभा केलेला पक्ष हा आता प्रोफेशनल झाला आहे. विशेष म्हणजे त्यांचे शिष्य समजल्या जाणाऱ्या देवेंद्र फडणवीसांनी पक्षाची ही अवस्था केली याची खंत आहे असं वक्तव्य मनसेचे नेते प्रकाश महाजन यांनी केलं. ज्यांच्याविरोधात मोर्चा काढला तेच आज भाजपसोबत सत्तेत आहेत असंही ते म्हणाले. भाजपचे दिवंगत नेते गोपीनाथ मुंडे यांच्या 11 व्या स्मृतीदिनानिमित्त त्यांनी माध्यमांशी संवाद साधला. त्यावेळी महाजन यांनी भाजपच्या धोरणावर जोरदार टीका केली.
प्रकाश महाजन म्हणाले की, "पूर्वी चळवळीत काम करणारे लोक भाजपमध्ये आणले जायचे. गोपीनाथ मुंडे हे स्वतः चळवळीतून आलेले नेते होते. तसेच चळवळीतील सर्वच नेत्यांशी त्यांचे संबंध चांगले होते. आज भारतीय जनता पक्षाची अवस्था पाहिल्यावर खंत वाटते. आता भ्रष्टाचारातून भाजपात एन्ट्री मिळते. अशोक चव्हाण, अजित पवार , छगन भुजबळ यांच्यासारखे अनेक लोक आज भाजपसोबत आहेत. संभाजीनगरमध्ये सार्वजनिक सिंचन घोटाळ्यासंदर्भात एक मोर्चा निघाला होता. त्यात गोपीनाथ मुंडे यांचं डोकं फुटलं होतं. ज्याच्या विरोधात तो मोर्चा निघाला होता त्या नेत्याच्या बाजूला आज देवेंद्र फडणवीस बसतात हे दुर्दैव आहे. संघर्षाच्या वेळी अनेक लोक भाजपसोबत होते. पण सत्ता आल्यानंतर ते कुठेच नाहीत. त्यामुळे भाजप आता प्रोफेशनल पक्ष झाला आहे."
Prakash Mahajan On Gopinath Munde : गोपीनाथ... काँग्रेसमध्ये जा, मुख्यमंत्री होशील
प्रकाश महाजन म्हणाले की, "आमचे वडील हे काँग्रेसचे आणि नेहरुंच्या विचारसरणीतील. गोपीनाथ मुंडे आमच्याकडे आले की पहिला त्यांना भेटायचे. त्यावेळी आमचे वडील त्यांना म्हणायचे की गोपीनाथ, तू यांच्या नादी लागू नकोस. तू काँग्रेसमध्ये जा, मुख्यमंत्री होशील. पण दुर्दैवाने गोपीनाथ मुंडे हे मुख्यमंत्रिपदापासून फक्त एकच पाऊल मागे राहिले. "
सुरुवातीपासून आव्हानाला सामोरं जायचा स्वभाव होता. त्यांनी कधीही आव्हानाला पाठ दाखवली नाही असं प्रकाश महाजन म्हणाले.
एका मोठ्या नेत्याचा फडणवीसांना विरोध होता
गोपीनाथ मुंडे यांच्यासबंधी एक आठवण सांगताना प्रकाश महाजन म्हणाले की, गोपीनाथ मुंडे यांच्या मृत्यूच्या आदल्या रात्री एक बैठक झाली होती. त्यात मी महाराष्ट्रात आलो नाही तर आपण देवेंद्र यांच्या पाठीशी उभा राहू असं गोपीनाथ मुंडे म्हणाले होते. त्यावेळी एका मोठ्या नेत्याचा देवेंद्र फडणवीसांच्या नावाला विरोध होता. पण गोपीनाथ मुंडे यांनी ते काही ऐकलं नाही. आज त्या घटनेचे साक्षीदार आहेत.
महत्त्वाच्या बातम्या
