पिंपरी-चिंचवडमध्ये 128 जागांसाठी 758 उमेदवार रिंगणात

पुणे: पिंपरी-चिंचवड महापालिकेच्या निवडणूक आखाड्यात 128 जागांसाठी 758 उमेदवार रिंगणात उतरले आहेत. शेवटच्या दिवशी तब्बल 480 उमेदवारांनी अर्ज मागे घेतले. या निवडणुकीसाठी तब्बल 2 हजार 388 अर्ज आले होते. त्यापैकी 1 हजार 239 उमेदवार निवडणुकीसाठी पात्र ठरले, तर 143 अर्ज बाद  झाले होते. त्याशिवाय छाननीत एकाच उमेदवाराने केलेले दोन ते तीन अर्जही बाजूला काढण्यात आले. या छाननी अंती एकूण 1 हजार 239 उमेदवार निवडणूक आयोगाच्या नियमानुसार पात्र ठरले होते. त्यानंतर दि. 6 आणि 7 फेब्रुवारीपर्यंत अर्ज मागे घेण्याची मुदत देण्यात आली होती. त्यानुसार एकूण 480 जणांनी माघार घेतली. त्यामुळे आजअखेर अंतिम उमेदवार यादी तयार झाली. ज्यामध्ये 758 उमेदवार पिंपरी-चिंचवडच्या 2017 च्या महापालिका निवडणुकीत आपले नशीब आजमावणार आहेत.