सरकारविरोधात 'निंदा प्रस्ताव'; विरोधी पक्षनेते विजय वडेट्टीवारांचे विधानसभा अध्यक्षांना पत्र
Vijay Wadettiwar : यावर आता विधानसभा अध्यक्ष काय निर्णय घेतात हे पाहणं महत्वाचे असणार आहे. तर, दुसरीकडे याच मुद्यावरून वडेट्टीवार आक्रमक होण्याची शक्यता आहे.
नागपूर : राज्यात अवकाळी पाऊस (Unseasonal Rain) , दुष्काळ (Drought) आणि शेतकऱ्यांच्या प्रश्नावर दोन दिवस चर्चा होऊन देखील सरकारने उत्तर दिले नाही. चर्चा झाल्यावर सबंधित मंत्र्यांनी उत्तर देणे अपेक्षित असतांना दुसऱ्या आठवड्याचे कामकाज संपूनही सरकारने उत्तर न दिल्याने विरोधी पक्षनेते विजय वडेट्टीवार (Vijay Wadettiwar) यांनी सरकार विरोधात निंदा व्यंजक प्रस्तावाची नोटीस दिली आहे. तर, विधानसभा अध्यक्षांकडे सरकार विरोधात प्रस्ताव मांडण्याची सूचना केली आहे. त्यामुळे यावर आता विधानसभा अध्यक्ष काय निर्णय घेतात हे पाहणं महत्वाचे असणार आहे. तर, दुसरीकडे याच मुद्यावरून वडेट्टीवार आक्रमक होण्याची शक्यता आहे.
वडेट्टीवारांच्या पत्रात काय म्हटले आहे?
अतिवृष्टी, दुष्काळ व अवकाळीमुळे उद्ध्वस्त झालेल्या शेतकन्यांना तातडीने मदत करण्याबाबत 11 डिसेंबर रोजी सभागृहात महाराष्ट्र विधानसभा नियम 101 अन्वये अल्पकालिन चर्चा उपस्थित करण्यात आली. या प्रस्तावावर विधानसभा सभागृहात 19 ते 20 डिसेंबर रोजी सर्वपक्षीय चर्चा करण्यात आली. राज्यात झालेली अत्तिवृष्टी, त्यानंतर पडलेल्या दुष्काळ व त्यानंतर अवकाळी पाऊस एकाच वर्षात अशा एका पेक्षा एक नैसर्गिक आपत्ती ओढविलेली असताना, अद्याप शेतकऱ्यांना मदत मिळालेली नाही. पीक विमा कंपन्यांच्या मुजोरपणामुळे शेतकरी पीक विम्यापासूनही वचित राहीला आहे. याबाबत तातडीने रोख मदत जाहीर करण्याची आवश्यकता असताना चर्चेच्या माध्यमातून शासनाकडे मागणी करण्यात आली. विधानसभेच्या प्रचलित प्रथा व परंपरेनुसार या प्रस्तावावर सभागृहात चर्चा संपल्याबरोबर संबंधित विभागाच्या मंत्री महोदयांनी त्यास ठोस उत्तर देणे अपेक्षित असते. तथापि, सदर प्रस्तावावर चर्चा होऊन चार दिवस उलटले असून शेतकरी हवालदील झालेला असतनाही आजमितीस शासनाकडून कोणतेही उत्तर सभागृहास देण्यात आलेले नाही अथवा कोणतीही मदत नुकसानग्रस्तांस करण्यात आलेली नाही. यावरुन शेतकऱ्यांप्रती शासनाच्या असलेल्या उदासिनतेचा हे सभागृह या ठरावाद्वारे तीव्र निषेध करीत आहे. उपरोक्त निदाव्यंजक ठराव स्वीकृत करुन, 18 डिसेंबर रोजी मला सभागृहात मांडण्याची परवानगी देण्यात यावी, असे वडेट्टीवारांनी विधानसभा अध्यक्षांना पाठवण्यात आलेल्या पत्रात म्हटले.
वडेट्टीवार आक्रमक होण्याची शक्यता?
राज्यातील शेतकऱ्यांच्या मुद्यावरून विरोधी पक्षनेते विजय वडेट्टीवार आज पुन्हा एकदा आक्रमक होण्याची शक्यता आहे. तसेच, सरकारला याच मुद्यावरून विरोधकांकडून घेरण्याचा प्रयत्न देखील केला जाऊ शकतो. विशेष म्हणजे हिवाळी अधिवेशनाच्या शेवटच्या आठवड्याचा आजचा पहिला दिवस असून, पहिल्याच दिवशी अवकाळी आणि दुष्काळामुळे शेतकऱ्यांच्या झालेल्या नुकसानीवर चर्चा होण्याची शक्यता आहे. तसेच, मुख्यमंत्री एकनाथ शिंदे यांच्याकडून आज यावर काही महत्वाची घोषणा देखील केली जाऊ शकते.
इतर महत्वाच्या बातम्या:
महत्त्वाच्या बातम्या
ट्रेंडिंग न्यूज
