एक्स्प्लोर

Supriya Sule : सुट्टीला दुबईला न जाता अजिंठा वेरुळला जा आणि कपडे सोलापूरचे घाला, सुप्रिया सुळेंचा 'मेड इन इंडिया' वस्तू वापरण्याचा सल्ला

खासदार सुप्रिया सुळे यांनी आज पोलीस अधीक्षक तेजस्वी सातपुते यांच्या संकल्पनेतून सुरु असलेल्या ऑपरेशन परिवर्तन उपक्रमास भेट दिली. यावेळी त्यांनी तेथील महिलांचे कौतुक केले.

Written By : आफताब शेख, एबीपी माझा | Edited By: गणेश लटके | Updated at : 20 Apr 2022 02:56 PM (IST)

Supriya Sule

Supriya Sule : राष्ट्रवादी काँग्रेसच्या खासदार सुप्रिया सुळे हे आज सोलापूर दौऱ्यावर आहेत. यावेळी त्यांनी पोलीस अधीक्षक तेजस्वी सातपुते यांच्या संकल्पनेतून सुरु असलेल्या ऑपरेशन परिवर्तन उपक्रमास भेट दिली. यावेळी सुळे यांनी बंजारा समाजाच्या महिला शिवणकाम, विणकाम, नक्षीकाम करतात याची पाहणी करत त्यांच्या पाठीवर शाबासकीची थापही दिली. दरम्यान या महिलांच्या कामाचं कौतुक करताना सुप्रिया सुळेंनी 'मेड इन इंडिया' वस्तू वापरण्याचा सल्ला दिला आहे. तसेच सुट्टीला दुबईला न जाता वेरुळ अजिंठाला जा आणि कपडे सोलापूरचे घाला असेही त्या म्हणाल्या.

Supriya Sule : सुट्टीला दुबईला न जाता अजिंठा वेरुळला जा आणि कपडे सोलापूरचे घाला, सुप्रिया सुळेंचा 'मेड इन इंडिया' वस्तू वापरण्याचा सल्ला

सोलापुरातल्या मुळेगाव तांड्यामध्ये सुरु केलेल्या 'ऑपरेशन परिवर्तन' उपक्रमाच्या ठिकाणी भेट देऊन महिलांना सुप्रिया सुळे यांनी प्रोत्साहन दिले. मुळेगाव तांडा येथील अनेक जणांचे व्यवसाय हे दारु निर्मिती आणि विक्री होते. मात्र, त्यांचे समुपदेशन करुन पोलीस अधिक्षक सातपुते यांनी ऑपरेशन परिवर्तन राबविला. या माध्यमातून त्यांनी विविध संस्थांना सोबत घेऊन अवैध व्यवसाय सोडलेल्या नागरिकांना रोजगार उपलब्ध करुन दिला. याच उपक्रमाची पाहणी आज खासदार सुळे यांनी केली. यावेळी सुळेंनी 'मेड इन इंडीया' वस्तू वापरण्याचा सल्ला दिला. सुट्टीला दुबईला न जाता वेरुळ आणि अजिंठाला जा मात्र कपडे सोलापूरचे घाला. मी स्वतः फॉरेनचे कोणतेच कपडे वापरत नाही. मी जे वापरते ते सर्व मेड इन इंडिया आहे असे सुप्रिया सुळेंनी यावेळी सांगितले.

दरम्यान, सोलापुरात राबविलेला उपक्रम ऑपरेशन परिवर्तन हा दिशादर्शक आहे. या उपक्रमाची माहिती गृहमंत्री तसेच वस्त्रद्योग मंत्रालयाला देणार असून, या महिलांच्या उद्योगाला चालना मिळवून देण्याचे प्रयत्न करणार असायल्याची प्रतिक्रिया सुप्रिया सुळे यांनी दिली. दरम्यान, राष्ट्रवादी काँग्रेसच्या खासदार सुप्रिया सुळे या आज सोलापूर दौऱ्यावर आहेत. यावेळी त्यांनी सुरुवातीला सोलापूरचे ग्रामदैवत सिद्धेश्वर महाराजांना अभिषेक करुन दर्शन घेतले.

देशात आणि महाराष्ट्रातच जिथे जिथे चांगली कामे होतात त्याची आपण नोंद घेतली पाहिजे. सातत्याने त्याचा प्रचार आणि प्रसार झाला पाहिजे. आज जे पाहिले ते अप्रतिम होते. या महिलांचे खूप सुंदर काम असल्याचे सुप्रिया सुळे म्हणाल्या. महाराष्ट्राच्या पोलिसांचा मला सार्थ अभिमान आहे. मला कधीही एकटीला जाताना भिती वाटत नाही. महाराष्ट्राचे पोलीस हे जबाबदार पोलीस आहेत. त्यांच्याबद्दल मला विश्वास, आदर आणि वर्दीवर प्रेम असल्याचेही सुळे म्हणाल्या.

महत्त्वाच्या बातम्या:

About the author आफताब शेख, एबीपी माझा

आफताब शेख हे एबीपी माझा वृत्त वाहिनीत सिनिअर करस्पॉन्डट म्हणून कार्यरत आहेत. मागील 9 वर्षांपासून एबीपी माझाच्या माध्यमातून कार्यरत असून आपल्या संवेदनशील आणि निष्पक्ष पत्रकारितेने त्यांनी स्वतंत्र ओळख निर्माण केली आहे. 3 जुलै 2017 रोजी मुंबई येथील एबीपी माझाच्या मुख्य कार्यालयातून त्यांनी पत्रकारितेच्या प्रवासाला सुरुवात केली. फेब्रुवारी 2019 पासून ते सोलापूर येथे सिनिअर करस्पॉन्डन्ट म्हणून कार्यरत आहेत. सध्या ते सोलापूर श्रमिक पत्रकार संघाचे सरचिटणीस म्हणूनही जबाबदारी सांभाळत आहेत.

सोलापूरच्या राजकीय घडामोडींपासून सामाजिक, शैक्षणिक, प्रशासकीय, औद्योगिक, मनोरंजन, क्रीडा आणि व्यावसायिक क्षेत्रांतील महत्त्वाच्या विषयांना त्यांनी एबीपी माझाच्या माध्यमातून राज्यस्तरीय व्यासपीठ मिळवून दिले आहे. ‘कामगारांचे शहर‘ म्हणून ओळखल्या जाणाऱ्या सोलापूरमधील कामगारांचे प्रश्न, सर्वसामान्य नागरिकांच्या समस्या आणि उपेक्षित घटकांचा आवाज शासनदरबारी पोहोचवण्याचा त्यांचा सातत्यपूर्ण प्रयत्न राहिला आहे. बहुभाषिक आणि समृद्ध सांस्कृतिक वारसा लाभलेल्या सोलापूरचा इतिहास, परंपरा आणि वर्तमानही त्यांनी आपल्या वार्तांकनातून प्रभावीपणे मांडले आहे. कोरोना काळात कोविड वॉर्डमध्ये प्रत्यक्ष जाऊन रुग्णांच्या व्यथा आणि आरोग्य व्यवस्थेतील वास्तव समोर आणला तर महापूर-दुष्काळातील रिपोर्ट्समधून त्यांनी आपल्या संवेदनशील पत्रकारितेचा प्रत्यय दिला. सोलापूरसह मुंबई, पुणे, धाराशिव, लातूर, बीड, नांदेड आणि छत्रपती संभाजीनगर जिल्ह्यांतही त्यांनी वार्तांकन केले आहे.

त्यांनी सोलापूरच्या दयानंद कला व शास्त्र महाविद्यालयातून कला शाखेची पदवी, तर मुंबई विद्यापीठातून मास्टर ऑफ मास कम्युनिकेशन अँड जर्नलिझम ही पदव्युत्तर पदवी प्राप्त केली आहे. पत्रकारितेसोबतच सामाजिक कार्याचीही त्यांना विशेष आवड आहे. महाविद्यालयीन जीवनातील सामाजिक योगदानासाठी 2016 मध्ये तत्कालीन राष्ट्रपती प्रणव मुखर्जी यांच्या हस्ते त्यांना इंदिरा गांधी राष्ट्रीय सेवा योजना पुरस्काराने (Indira Gandhi NSS Award-2016) सन्मानित करण्यात आले. याशिवाय, पत्रकारितेतील योगदानासाठी त्यांना विविध संस्था आणि संघटनांकडून अनेक पुरस्कारांनी गौरविण्यात आले आहे.

Published at : 20 Apr 2022 02:56 PM (IST)

Tags :

Solapur News MP Supriya Sule Made In India Supriya Sule News