तरुणाचा हात मनगटापासून तोडला, तुटलेला हात आरोपीने सोबत नेला; लातूरमधली धक्कादायक घटना

काही कळायच्या आत आरोपीने मिरची पावडर त्याच्या डोळ्यात टाकली आणि धारदार शस्त्राने वार करण्यास सुरुवात केली. नंतर जमिनीवर पाडून छातीवर पाय देऊन डाव्या हाताच्या मनगटावर वार केला.

लातूर : तरुणाचा हात मनगटापासून तोडून, तुटलेला हात आरोपीने सोबत नेल्याची धक्कादायक घटना लातूर जिल्ह्यातील जळकोट तालुक्यात घडली आहे. चेरापाटीजवळ आरोपीने तरुणाच्या डोळ्यात मिरची पावडर टाकून धारदार शस्त्राने वार करुन त्याला गंभीर केलं. आरोपी इथेच थांबला नाही तर त्याने तरुणाचा हात मनगटापासून छाटला आणि कापलेला हात घेऊन पसार झाला. याप्रकरणी एकाविरुद्ध गुन्हा दाखल करण्यात आला आहे. हल्ल्यामागील नेमकं कारण अद्याप समजू शकलेलं नाही.

या घटनेतील जखमी तरुण प्रकाश मानेच्या तक्रारीनुसार, "तो चेरापाटी इथल्या एका हॉटेलवर जेवणासाठी गेला होता. जेवणानंतर चालत गावाकडे जात असताना, गावातील पिराजी व्यंकटी पिकलेने बाईक त्याच्याजवळ थांबवली. काही कळायच्या आत आरोपीने मिरची पावडर त्याच्या डोळ्यात टाकली आणि धारदार शस्त्राने वार करण्यास सुरुवात केली. नंतर जमिनीवर पाडून छातीवर पाय देऊन डाव्या हाताच्या मनगटावर वार केला. डावा हात मनगटापासून तोडून बाजूला काढला. तुटलेला हात आपल्या सोबत घेऊन गेला. तसंच खिशातील 13 हजार रुपये सोबत घेऊन पसार झाला.

गावकऱ्यांनी तरुणाला गंभीर जखमी अवस्थेत सुरुवातील अहमदपूरच्या शासकीय रुग्णालयात दाखल केलं. तिथे प्राथमिक उपचार करुन लातूरमधील खाजगी रुग्णालयात उपचारांसाठी दाखल करण्यात आलं. प्रकाश माने 18 डिसेंबर रोजी शुद्धीवर आल्यानंतर पोलिसांनी त्याचा जबाब घेतला. या प्रकरणी जळकोट पोलिस ठाण्यात गुन्हा दाखल करण्यात आला आहे.