पुण्यात उपमुख्यमंत्री अजित पवार आणि खासदार उदयनराजे यांची भेट

राज्याच्या भुवया उंचावणारी राजकीय घडामोड पुण्यात घडली आहे. भाजपचे राज्यसभा खासदार उदयनराजे भोसले यांनी आज उपमुख्यमंत्री अजित पवार यांची भेट घेतली.

udayanraje - Ajit pawar

पुणे : भाजपचे खासदार उदयनराजे भोसले यांनी आज उपमुख्यमंत्री अजित पवारांची भेट घेतली. पुण्यातील विश्रामगृह येथं ही भेट झाली. यावेळी विकासकामांबाबत चर्चा झाल्याचं उदयनराजेंनी सांगितलंय. मात्र राष्ट्रवादी काँग्रेसमध्ये जाणार का या प्रश्नावर उदयनराजेंनी सूचक वक्तव्य केलंय. छत्रपती शिवाजी महाराज यांचं सर्वधर्म समभाव धोरणं होतं, तसं आपलं सर्वपक्ष समभाव धोरण आहे असं वक्तव्य उदयनराजेंनी केलंय. त्यामुळे उदयनराजेंच्या या वक्तव्यामुळे चर्चांना उधाण आलंय. 

या भेटीनंतर उदयनराजे भोसले यांनी फेसबुक पोस्ट लिहिली आहे की,  सातारा नगरपरिषदेच्या नवीन वाढीव हद्दीतील विकास कामांना प्राथमिक सोयी सुविधा अंतर्गत अनुदान मिळणेबाबत आज उपमुख्यमंत्री  अजित पवार यांची भेट घेऊन प्रस्तावाद्वारे मागणी केली  आहे.

सप्टेंबर 2019 मध्ये उदयनराजेंचा राष्ट्रवादीला रामराम 

लोकसभा निवडणुकीनंतर अवघ्या पाच महिन्यात उदयनराजे यांनी खासदारकीचा राजीनामा दिला. सप्टेंबर 2019 मध्ये उदयनराजेंनी राष्ट्रवादी काँग्रेसला सोडचिठ्ठी देत भाजपमध्ये प्रवेश केला. ऐन विधानसभा निवडणुकीच्या तोंडावर आधीच गळती लागलेल्या राष्ट्रवादीला उदयनराजे यांच्या राजीनाम्याने आणखी एक धक्का बसला.

शरद पवारांची पावसातली 'ती' सभा आणि उदयनराजेंचा पराभव

 विधानसभा निवडणुकीच्या काळात सातारा लोकसभेची पोटनिवडणूक लागली आणि शरद पवारांनी ती प्रतिष्ठेची केली. 18 ऑक्टोबर 2019 रोजी सातारा जिल्हा परिषदेच्या मैदानात राष्ट्रवादीची जाहीर सभा होती. यावेळी पावसानेही हजेरी लावली. परंतु 80 वर्षांच्या शरद पवारांनी तरीही माईक हातात घेत उपस्थितांना शाब्दिक सल्ले दिले. पवारांच्या भाषणाने इतिहास घडला. लोकसभा पोटनिवडणुकीत उदयनराजेंच्या पराभाव झाला. त्यांच्या पराभवाला शरद पवारांचं हे भाषणच कारणीभूत ठरल्याचं म्हटलं गेलं. यानंतर भाजपने उदयराजेंना राज्यसभेवर पाठवलं.

महत्त्वाच्या बातम्या: