नेत्यांना धमकीचे कॉल मेसेज करतंय कोण?

महाविकास आघाडीच्या  प्रमुख नेत्यांना धमकीचे फोन आणि मेसेज का येत आहेत असे प्रश्न राजकीय वर्तुळात सुरू झाले आहेत.

calling

मुंबई : महाविकास आघाडीचे सरकार या ना त्या कारणावरून मागच्या काही दिवसांपासून चर्चेमध्ये आहे. मग ही चर्चा कोविड काळातल्या भ्रष्टाचाराची असो किंवा मग अधिकाऱ्यांच्या बदल्यासंदर्भात असो. वा मग ईडीच्या फेऱ्यात अडकलेल्या नेत्यांची असो. मात्र सध्या चर्चा आहे ती महाविकासआघाडीतील नेत्यांना येणाऱ्या धमकीच्या फोनची आणि अश्लील भाषेत शिवीगाळ करणाऱ्या मेसेजची. 

18 फेब्रुवारी 2021 रोजी काँग्रेसचे महाराष्ट्र प्रदेशाध्यक्ष नाना पटोले यांच्या शासकीय निवासस्थानी एक बैठक आयोजित केली होती. या बैठकीला मोबाईल फोनचा व्यत्यय नको म्हणून नाना पटोले यांनी आपला मोबाईल फोन आपल्या पीएकडे दिला होता. मीटिंग सुरू होती. याच दरम्यान नाना पटोले यांच्या मोबाईल फोनवर एका मेसेजची रिंग वाजली. पीएनं तो मेसेज पाहिला मेसेज मध्ये नाना पटोले यांना अर्वाच्च भाषेमध्ये शिवीगाळ करण्यात आली होती. घडला प्रकार गंभीर होता. कोणीही सभ्य व्यक्ती या शिव्या ऐकल्यानंतर शरमेने मान खाली घालेल. परिस्थितीचे गांभीर्य लक्षात घेता घडल्या प्रकाराची तक्रार सायबर विभागाकडे देण्यात आली. सायबर विभागाने आपला तपास सुरू केला. आतापर्यंत करण्यात आलेला तपास आणि हे संपूर्ण प्रकरण सध्या सायबर विभागाने मरीन ड्राईव्ह पोलीस स्टेशनकडे वर्ग केला आहे. या प्रकरणाचा तपास सध्या मरीन ड्राईव्ह पोलीस स्टेशन करत आहे. 

या अगोदर देखील अशा स्वरूपाच्या शिवीगाळ करणारे मेसेज आणि  धमकीचे फोन महाविकास आघाडीच्या नेत्यांना आले होते. मागच्या वर्षी पलाश बोस नावाच्या एका व्यक्तींना राज्याचे मुख्यमंत्री उद्धव ठाकरे यांना अंडरवर्ल्डच्या नावे धमकी दिली होती.  याच महाशयांनी राष्ट्रवादी काँग्रेस पक्षाचे सर्वेसर्वा शरद पवार तसेच तात्कालीन गृहमंत्री अनिल देशमुख यांना देखील धमकीचे फोन मेसेज केले होते.या प्रकरणाची तक्रार गांभीर्याने घेत जुहू एटीएसने या व्यक्तीला अटक केली. 

सर्वात आश्चर्याची बाब म्हणजे महाविकास आघाडीच्या  प्रमुख नेत्यांना असे फोन आणि मेसेज काय येत आहेत असे प्रश्न राजकीय वर्तुळात सुरू झाले आहेत. मात्र या प्रश्नांची उत्तरे अजूनही अनुत्तरीतच आहेत आणि याचे उत्तर शोधण्याचा काम सध्या मुंबई पोलीस करत आहेत. प्रकरण शमले असं दिसत असताना पुन्हा एकदा अशा प्रकारचे शिवीगाळ करणारे धमकी देणारे मेसेज आणि फोन महाविकासआघाडी  नेत्यांना येऊ लागल्याने चिंता व्यक्त केली जाते..