Maharashtra News Updates 01 March 2023 : देश-विदेशातील महत्त्वाच्या बातम्यांचा आढावा एका क्लिकवर...

Maharashtra News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये...

Background

ब्रेकिंग न्यूज कधी पूर्वसूचना देऊन येत नाहीत.. हे खरं असलं तरी..पण आज दिवसभरात घडणाऱ्या काही पूर्वनियोजित घटना,कार्यक्रम असतातच.. त्याचाच दिवसभरात विस्तार होतो... 

विधिमंडळ अधिवेशनाचा आज तिसरा दिवस आहे. राज्यापालांच्या अभिभाषणावर सभागृहात चर्चा सुरू आहे. आज मुख्यमंत्री एकनाथ शिंदे उत्तर देतील. विधीमंडळाच्या अर्थसंकल्पीय अधिवेशनाच्या तिसऱ्या दिवशी विरोधक आक्रमक राहणार आहेत. शेतकऱ्यांचा प्रश्न, कायदा आणि सुव्यवस्था, लोकप्रतिनिधींना आलेल्या धमक्या या सगळ्या मुद्द्यांवरून विरोधक सभागृहाच्या बाहेर आणि सभागृहात आक्रमक राहणार आहेत. राज्यपालांच्या अभिभाषणावर झालेल्या चर्चेवर मुख्यमंत्री आज उत्तर देतील. यावेळी राजकीय आरोप प्रत्यारोप सुद्धा होण्याची शक्यता आहे. 

 

मुंबई काँग्रेसतर्फे नॅशनल स्टॉक एक्सचेंज (NSE) विरोधात आंदोलन 
 
मुंबई – मुंबई काँग्रेस अध्यक्ष भाई जगताप आणि कार्याध्यक्ष चरणसिंग सप्रा यांच्या नेतृत्वाखाली मुंबई काँग्रेसतर्फे नॅशनल स्टॉक एक्सचेंज (NSE) विरोधात आंदोलन करण्यात येणार आहे. अदानी समुहाने जो आर्थिक घोटाळा आणि भ्रष्टाचार केलेला आहे त्यामध्ये नॅशनल स्टॉक एक्सचेंजने त्यांना मदत केलेली आहे, त्या निषेधार्थ हे आंदोलन करण्यात येणार आहे, सकळी 11 वाजता. 

नवाब मलिकांच्या जामीनावर आज कोर्टात सुनावणी

नवाब मलिकांच्या जामीनावर आजही कोर्टात सुनावणी सुरू राहील. मलिकांच्या वैद्यकीय स्थितीवर त्यांच्या वकिलांचा युक्तिवाद सुरू आहे. त्याचसोबत मलिकांवर तपासयंत्रणेनं केलेल्या आरोपांत तथ्य नसल्याचंही त्यांच्या वकिलांनी हायकोर्टात सांगितलंय.

सत्तासंघर्षाच्या सुनावणीचा आज दुसरा दिवस

सलग तिसऱ्या आठवड्यात मंगळवारपासून सुनाणीला सुरूवात झालीये. ठाकरे गटाच्या वकिलांचा युक्तिवाद झाल्यावर शिंदेंकडून नीरज कौल यांनी युक्तीवादास सुरूवात केली. पक्षांरबंदी कायदा आणि राज्यपालांच्या भूमिकेवरून कोर्टात घमासान. तर राज्यपालांनी त्या परिस्थितीत जे निर्णय घेतले ते त्यांचं कर्तव्य होतं असा दावा नीरज कौल यांनी केला. तसेच बोम्मई केसनुसार तो राज्यपालांचा अधिकार आहे असा दावा कौल यांनी केलाय. 

आजपासून या नियमांमध्ये बदल होणार 

• ग्राहकांना एटीएममधून 2 हजाराच्या नोटा मिळणार नाही.
• आरबीआयने एमसीएलआर दर वाढवल्याने त्याचा परिणाम कर्ज आणि ईएमआयवर होणार.
• घरगुती सिलेंडर, सीएनजी, पीएनजी दरात वाढ होण्याची शक्यता आहे. 
• रेल्वे प्रवासी आणि मालगाड्यांच्या वेळेत बदल करण्याची शक्यता. 
• ट्विटर, फेसबुक, यूट्यूब, इन्स्टाग्राम या सोशल मीडिया साईट्सना नियमांचे पालन करावे लागणार

आरटीईच्या राखीव जागांवरील प्रवेशासाठीची नोंदणी प्रक्रिया बुधवारी 1 मार्चपासून सुरू

बालकांना मोफत आणि सक्तीच्या शिक्षण अधिकार कायद्यानुसार राज्यातील खाजगी शाळांमध्ये असलेल्या 25 टक्के आरटीईच्या राखीव जागांवरील प्रवेशासाठीची नोंदणी प्रक्रिया बुधवारी 1 मार्चपासून सुरू होणार आहे. यासाठीची माहिती प्राथमिक शिक्षण संचालनालयाकडून देण्यात आली असून प्रवेशासाठी आवश्यक प्रमाणपत्रांची यादी आणि कार्यवाही ही देण्यात आली आहे. लॉटरीसाठी अर्ज विचारात घेतला जावा यासाठी अनेक पालक एकापेक्ष अधिक अर्ज भारतात मात्र एका विद्यार्थ्यांचे एकापेक्षा अधिक अर्ज भरल्याचे निदर्शनास आल्यास अर्ज लॉटरीसाठी विचारात घेतला जाणार नाही, हे प्राथमिक संचालनालयाने स्पष्ट केले आहे. 

हिंगोली जिल्हात उन्हाची तीव्रता लक्षात घेता परिषद शाळेच्या वेळेत बदल 

उन्हाची तीव्रता लक्षात घेता आज पासून जिल्ह्यातील जिल्हा परिषद शाळेच्या वेळेत बदल केलाय. सकाळी सात ते दुपारी बारा वाजेपर्यंत सुरू असणार जिल्हा परिषद शाळा.

कुणाल भंडारी यांच्यावर झालेल्या जीवघेण्या हल्ल्याच्या निषेधार्थ आज नगर शहरात निषेध मोर्चा 

अहमदनगर – बजरंग दलाचे संयोजक कुणाल भंडारी यांच्यावर काल झालेल्या जीवघेण्या हल्ल्याच्या निषेधार्थ आज नगर शहरातून निषेध मोर्चा निघणार आहे. छत्रपती शिवाजी महाराजांच्या पुतळ्यापासून मोर्चाला सुरुवात होणार आहे तर दिल्ली गेटपर्यंत मोर्चा जाणार आहे. विश्व हिंदू परिषद, बजरंग दल आणि सखल हिंदू समाजच्या वतीने हा मोर्चा होणार आहे, दुपारी 3 वाजता.

जळगाव जामोद येथे उद्धव बाळासाहेब ठाकरे गटाच्या शिवसेनेची सभा 

बुलढाणा – जळगाव जामोद येथे उद्धव बाळासाहेब ठाकरे गटाच्या शिवसेनेची सभा होणार आहे. या सभेसाठी उद्धव गटाच्या नेत्या सुषमा अंधारे, शुभांगी पाटील संबोधित करणार आहेत, संध्याकाळी 6 वाजता

सचिन तेंडुलकरची एबीपी माझाला एक्सक्लुझिव्ह मुलाखत 
 
मुंबई – सॅव्हलॉन कंपनीकडून स्वच्छ भारत मिशन अंतर्गत योगदान देण्यात येत आहे. अशात सचिन तेंडुलकर याला ब्रॅंड ॲम्बॅसिडॉर नेमण्यात आलं आहे. यासंदर्भात सचिन एबीपी माझाला एक्सक्लुझिव्ह मुलाखत देणार आहे, सकाळी 11 वाजता. 

भारत-ऑस्ट्रेलिया सामना  

टीम इंडिया आणि ऑस्ट्रेलिया यांच्यातील चार सामन्यांच्या कसोटी मालिकेतील तिसरा सामना आजपासून इंदूरच्या होळकर क्रिकेट स्टेडियमवर खेळवला जाणार आहे.

23:39 PM (IST)  •  01 Mar 2023

Thane News : ठाणे:  मुख्यमंत्र्यावर आक्षेपार्ह वक्तव्य केल्याप्रकरणी ठाकरे गटाच्या राजूल पटेल यांच्यावर ठाण्यातील नौपाडा पोलीस ठाण्यात गुन्हा दाखल 

Thane News : ठाकरे गटाच्या 'शिवगर्जना' मेळाव्यात मुख्यमंत्री शिंदेवर टीका करणाऱ्या राजुल पटेल यांच्यावर गुन्हा दाखल करण्यात आला आहे. राजुल पटेल यांनी केलेल्या वक्तव्याची दखल घेत ठाण्याचे माजी नगरसेवक, शिंदे यांचे कट्टर समर्थक विकास रेपाळें यांनी पोलिसात तक्रार केली. त्यानंतर नौपाडा पोलिसांनी राजुल पटेल यांच्यावर समाजात तेढ निर्माण करणे आणि आक्षेपार्ह विधान केल्याप्रकरणी गुन्हा दाखल करण्यात आला आहे.

22:04 PM (IST)  •  01 Mar 2023

मुख्यमंत्र्यांना चक्क 'सोन्याचा धनुष्यबाण' भेट!

 मुख्यमंत्री एकनाथ शिंदे यांना निवडणूक आयोगानं शिवसेना हे नाव आणि धनुष्यबाण चिन्ह दिल्यानंतर आता शिंदेंना चक्क सोन्याचा धनुष्यबाण भेट देण्यात आलाय. अंबरनाथच्या माजी नगराध्यक्षा आणि युवती सेना राज्य कार्यकारिणी सदस्या प्रज्ञा बनसोडे यांनी हा एक तोळे वजनाचा अस्सल सोन्याचा धनुष्यबाण मुख्यमंत्री एकनाथ शिंदे यांना भेट दिला. हा सोन्याचा धनुष्यबाण पाहून मुख्यमंत्री एकनाथ शिंदे हेदेखील काही काळ अचंबित झाले.

19:41 PM (IST)  •  01 Mar 2023

ठाण्यात राज्य उत्पादन शुल्क, विभागीय भरारी पथकाची मोठी कारवाई

नकली परराज्यातील मद्या विरुध्द कारवाई करण्यासाठी दिलेल्या निर्देशांच्या अनुषंगाने खानवेल-उथवा रोडवरुन परराज्यातील अवैध मद्याची वाहतूक होणार असल्याची माहिती मिळाल्यावरुन निरीक्षक, श्री. आनंदा कांबळे व त्यांच्या सहकान्यांनी उधवा पोलीस चौकीसमोर, खाणवेल उधवा पालघर येथे पाळत ठेवली असता टाटा कंपनीच्या टेम्पोमध्ये मोठ्या प्रमाणात फॉर सेल इन युटी दादरा व नगर हवेली आणि दमण व दीव या केंद्रशासीत प्रदेशामध्ये विक्रीकरीता असलेल्या व महाराष्ट्र राज्यात विक्रीस बंदी असलेला भारतीय बनावटीचे विदेशी मद्याचे 330 बॉक्स व बियरचे 70 बॉक्स जप्त केले आहे. सुरेशकुमार दयाराम यादव,वाहनचालक शैलेश मोहन वर्मा यांस अटक करून परराज्यातील अवैध मद्य वाहतुकीसाठी वापरलेला टाटा कंपनीच्या टेम्पो वाहनासह तसेच एकूण 400 बॉक्स, लाकडी भुशाच्या 200 गोण्या, दोन मोबाईल व एक वाहनासह  किंमत रु ४८,५६,०००/- किमतीचा मुद्देमाल जप्त केला.

 

19:37 PM (IST)  •  01 Mar 2023

हिंदुत्ववादी संघटनाकडून अहमदनगर शहरात मुक मोर्चा

बजरंग दलाचे संयोजक  कुणाल भंडारी यांच्यावर झालेल्या प्राणघातक हल्याचा निषेध म्हणून शहरात विश्व हिंदू परिषद आणि बजरंग दलाच्या वतीने मुक मोर्चा काढण्यात आला...माळीवाडा बस स्थानक परिसरातील छत्रपती शिवाजी महाराज पुतळ्यापासून दिल्लीगेटपर्यंत हा मोर्चा काढण्यात आला...हजारोंच्या संख्येने महिला पुरुष या मोर्चात सहभागी झाले होते...कुणाल भंडारी यांच्यावर शहरातील रामवाडी परिसरात धारदार शास्त्राने वार करण्यात आले होते...त्यानंतर त्यांना शहरातील एका खासगी रुग्णालयात उपचार सुरू आहेत...याप्रकरणी तोफखाना पोलिसात नऊ जणांविरोधात गुन्हा दाखल करण्यात आलाय...मात्र, रामवाडी परिसरात हिंदू कुटुंबावर झालेली दगडफेक, कुणाल भंडारी यांच्यावरील हल्ला, जिल्ह्यात वाढत असलेल्या गोहत्या या सर्व घटनांचा निषेधार्थ हा मूक मोर्चा काढण्यात आला...यावेळी मोठा पोलीस बंदोबस्त तैनात करण्यात आला होता.

19:37 PM (IST)  •  01 Mar 2023

बांधकाम करताना विहीर खचल्याने मजुर दबले ढिगाऱ्याखाली

वर्ध्याच्या सिंदी रेल्वे नजीक गौळ भोसा शेतात विहिरीचे काम सुरू असताना दोन मजूर मातीच्या ढिगाऱ्याखाली दबल्याची घटना घडली आहे. मातीच्या ढिगाऱ्याखाली दबून दोघांचा मृत्यू झाला असल्याचा अंदाज वर्तविन्यात येत आहे. दबलेल्या मजुरांमध्ये 40 वर्षीय अमोल दशरथ टेंभरे व 28 वर्षाच्या पंकज प्रभाकर खडतकर याचा समावेश आहे. अद्याप दबलेल्या मजुरांना काढणे शक्य झाले नाही, त्यामुळे महसूल विभागाने एन डी आर एफ च्या चमुला पाचारण केले आहे. सिंदी रेल्वे येथील शेतकरी सर्जेराव वरभे यांच्या शेतामध्ये विहिरीचे काम सुरू होते. यावेळी पाच मजूर कामावर कार्यरत होते. विहिरीत उतरलेल्या अमोल टेंभरे व पंकज खडतकर हे दोन मजुर विहिरीचा भाग खचल्याने खाली कोसळले. यात त्यांच्या अंगावर मोठ्या प्रमाणात मातीचा ढिगारा पडला आहे.  ढिगाऱ्याखाली दबल्याने मजुरांचा मृत्यू झाला असल्याचा अंदाज बांधला जात आहे. सायंकाळ पर्यत रेस्क्यू करण्याचे काम सुरू होते. पण सायंकाळी शेतात अंधार झाल्याने काम थांबले आहे. एस डी आर एफ चमू बोलावून मजूर काढण्यात येईल असे सांगण्यात आलेय.