वाढदिवस साजरा करणार नाही, अजितदादांनंतर फडणवीसांचा निर्णय
इर्शाळवाडीच्या घटनेनंतर परिस्थितीचे गांभीर्य लक्षात घेता अजित पवार आणि देवेंद्र फडणवीस यांनी आपला वाढदिवस साजरा न करण्याबाबत सांगितले. दोन्ही नेत्यांचा वाढदिवस 22 जुलैलाच असतो.
मुंबई: रायगड जिल्ह्यातील इर्शाळगडाच्या (Irshalwadi Landslide) पायथ्याशी असलेल्या वाडीवर बुधवारी रात्री काळाने घाला घातला अन् काही क्षणात होत्याचं नव्हतं झालं. रात्रीतून दरड कोसळली आणि 16 जणांनी जीव गमावला. या पार्श्वभूमीवर राज्याचे उपमुख्यमंत्री देवेंद्र फडणवीस यांनी 22 जुलै असणारा आपला वाढदिवस साजरा न करण्याचा निर्णय घेतला आहे. वाढदिवसाबद्दल कोणीही होर्डिंग (hoarding), बॅनर (banner) लावू नये तसेच जाहिरातीदेखील देऊ नये, असे आवाहन त्यांनी केले आहे. तर काल उपमुख्यमंत्री अजित पवार (Devendra Fadnavis and Ajit Pawar Birthday) यांनीही त्यांचा वाढदिवस साजरा न करण्याचा निर्णय घेतला. परिस्थितीचे गांभीर्य लक्षात घेता त्यांनीही आपला वाढदिवस साजरा न करण्याबाबत सांगितले. दोन्ही नेत्यांचा वाढदिवस 22 जुलैलाच असतो.
उपमुख्यमंत्री देवेंद्र फडणवीस आणि अजित पवार यांचा उद्या (22 जुलै) वाढदिवस आहे. उपमुख्यमंत्र्यांच्या वाढदिवशी त्यांना शुभेच्छा देण्यासाठी कार्यकर्ते व हितचिंतकांनीही गर्दी जमवणारे कोणतेही कार्यक्रम आयोजित न करता त्यासाठी खर्च होणारा निधी इर्शाळवाडीसाठी वापरण्यात यावा, असे आवाहनही उपमुख्यमंत्री देवेंद्र फडणवीस यांनी केले आहे. तसेच देवेंद्र फडणवीस यांचा वाढदिवस हा भाजपकडून सेवा दिन साजरा करण्यात येणार आहे. फडणवीस यांच्या वाढदिवशी भाजपचे नेते कार्यकर्ते लोकांना सेवा देणार असल्याची माहिती बावनकुळे यांनी दिली आहे. तसेच इर्शाळवाडी घटनेनेमुळे कुणीही वाढदिवस साजरा करू नये, मोठे होर्डिंग लावू नयेत असे आदेश भाजप कार्यकर्त्यांना देण्यात आले आहेत.
अजित पवारांचा वाढदिवस साजरा न करण्याचा निर्णय
'निधी इर्शाळवाडी गावाच्या पुनर्उभारणी आणि ग्रामस्थांच्या मदतीसाठी उपयोगात आणा'
या घरांवर दरड कोसळून झालेल्या दुर्घटनेबद्दल उपमुख्यमंत्री अजित पवार यांनी तीव्र दु:ख व्यक्त केलं आहे. सोबतच यावर्षी वाढदिवस साजरा न करण्याचा निर्णय घेतला आहे. उपमुख्यमंत्री अजित पवार यांचा 22 जुलै रोजी वाढदिवस असून राज्यभरातील त्यांचे चाहते, कार्यकर्ते, हितचिंतक दरवर्षी मोठ्या प्रमाणावर हा वाढदिवस साजरा करतात. परंतु इर्शाळवाडी दुर्घटनेच्या पार्श्वभूमीवर कुणीही आपला वाढदिवस साजरा करु नये. पुष्पगुच्छ, होर्डिंग, जाहिरातींवर खर्च न करता तो निधी इर्शाळवाडी गावाच्या पुनर्उभारणी आणि ग्रामस्थांच्या मदतीसाठी उपयोगात आणावा, असं आवाहन अजित पवार यांनी केलं आहे.
अवघ्या काही क्षणांत होत्याचं नव्हतं झालं
बुधवारी रात्री शांत निजलेल्या इर्शाळवाडीत अवघ्या काही क्षणांत होत्याचं नव्हतं झालं आणि सारा महाराष्ट्र हादरुन गेला. रायगड जिल्ह्यातल्या मुसळधार पावसात दरड कोसळून झालेल्या दुर्घटनेत इर्शाळवाडीतली 48 पैकी 17 घरं गाडली गेली. या दुर्घटनेत जवळपास 20 घरांचं गंभीर नुकसान झालं असून, उरलेली दहा घरं वाचली आहेत. या दुर्घटनेची माहिती मिळताच बचाव पथकं तासाभरात घटनास्थळी दाखल झाली. पण पाऊस आणि अंधारामुळे बचावकार्य सकाळीच सुरु करावं लागलं. गुरुवारी दिवसभरातही पाऊस आणि जोरदार वाऱ्यानं बचाव पथकाची परीक्षा घेतली. या दुर्घटनेत 16 जणांचा मृत्यू झाला असून 98 जणांना वाचवण्यात बचाव पथकाला यश आलं आहे.
महत्त्वाच्या बातम्या
