Maharashtra Breaking News 24 August 2022 : राज्यभरातील महत्त्वाच्या बातम्या एका क्लिकवर...

Maharashtra News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये...

Background

ब्रेकिंग न्यूज कधी पूर्वसूचना देऊन येत नाहीत.. हे खरं असलं तरी..पण आज दिवसभरात घडणाऱ्या काही पूर्वनियोजित घटना,कार्यक्रम असतातच.. त्याचाच दिवसभरात विस्तार होतो. त्या घटना-घडामोडींची पार्श्वभूमी-पूर्वपिठिका हाताशी असल्यावर या घटना-घडामोडी समजून घेणं सोपं होतं. आज दिवसभरातल्या कोणत्या महत्वाच्या बातम्यांवर आमचं लक्ष असेल किंवा महत्वाच्या घडामोडी आम्ही तुमच्यापर्यंत सविस्तर पोहोचवू याची ही थोडक्यात उजळणी...  या नियोजित-घटना कार्यक्रमांसोबतच आयत्यावेळी येणाऱ्या घडामोडीही आम्ही तुमच्यापर्यंत पोहोचवू..

सर्वोच्च न्यायालयात आरे कारशेड प्रकरणी सुनावणी

सर्वोच्च न्यायालयात आज आरे कारशेड प्रकरणी सुनावणी होणार आहे. एकूणच कारशेड प्रकरणातील याचिका निकालात निघण्याची शक्यता आहे. न्यायमूर्ती उदय लळित यांच्या खंडपीठासमोर याचिका आहे. आरे कारशेड परिसरातील काम थांबवावे आणि वृक्षतोड न होण्यासाठी याचिका दाखल आहे. याआधी प्रकरण 10 ऑगस्ट रोजी लिस्ट झालं होतं. मात्र वेळेअभावी सुनावणी झाली नव्हती. आज सकाळी 11.30 पर्यंत सुनावणी सुरु होऊ शकते. पर्यावरणप्रेमींकडून ज्येष्ठ वकील गोपाल शंकरनारायणन आणि प्रशांत भूषण याचिकाकर्त्यांची बाजू मांडतील.

औरंगाबादमध्ये ख्रिश्चन महासंघाचं भोंदूबाबाच्या बातमीविरोधात आंदोलन
एबीपी माझानं औरंगाबादमधील ख्रिश्चन बाबाचा भोंदूपणा उजेडात आणला होता. या बातमीनंतर भोंदूबाबा बाबासाहेब शिंदेवर कारवाई करण्याची मागणी होत होती. याचा निषेध करण्यासाठी ख्रिश्चन महासंघाच्या वतीनं आज आंदोलन करण्यात येणार आहे.

समर्थांच्या मंदिरातील चोरी प्रकरणी गावकऱ्यांचं अन्नत्याग आंदोलन
जालन्यातील जांब समर्थ येथे श्रीराम मंदिरात झालेल्या मूर्ती चोरी प्रकरणी निषेध म्हणून ग्रामस्थ सकाळपासून संध्याकाळपर्यत अन्नत्याग आंदोलन करणार आहेत. पोलीसांनी लवकरात लवकर आमच्या मूर्तीचा शोध लावावा असे अवाहन गावकऱ्यांनी केलंय.

पंतप्रधान मोदी बुधवारी हरियाणा आणि पंजाब दौऱ्यावर
पंतप्रधान नरेंद्र मोदी आज हरियाणा आणि पंजाबचा दौरा करणार आहेत. त्या दिवशी पंतप्रधानांच्या हस्ते दोन महत्त्वाच्या आरोग्य उपक्रमांचे उद्घाटन होणार आहे. सकाळी 11 वाजता पंतप्रधानांच्या हस्ते हरियाणातील फरिदाबाद येथे अमृता रुग्णालयाचे उद्घाटन होणार आहे. त्यानंतर पंतप्रधान मोहालीला जातील आणि दुपारी 02:15 वाजता मुल्लानपूर, न्यू चंदीगड, साहिबजादा अजितसिंग नगर जिल्हा (मोहाली) येथे ‘होमी भाभा कर्करोग रुग्णालय आणि संशोधन केंद्र’ राष्ट्राला समर्पित करतील.

आज बिहारमध्ये नव्या सरकारची बहुमत चाचणी 
बिहारमध्ये नितीश कुमार यांनी राजकीय भूंकप घडवत भाजपला धक्का दिला. त्यानंतर राष्ट्रीय जनता दलासबोत सत्ता स्थापन केली. नितीश कुमार यांनी मुख्यमंत्रीपदाची तर तेजस्वी यादव यांनी उपमुख्यमंत्रीपदाची शपथ घेतली. त्यानंतर आता या महागठबंधनच्या सरकारसमोर सभागृहात बहुमत सिद्ध करण्याचं आवाहन आहे. आज आणि उद्या विधीमंडळाचे अधिवेशन होणार आहे. आज नवीन सरकारला बहुमत सिद्ध करावं लागणार आहे. 

21:31 PM (IST)  •  24 Aug 2022

Supreme Court : सुप्रीम कोर्टात उद्याच्या सुनावणीबद्दल पुन्हा अनिश्चितता

Supreme Court : सुप्रीम कोर्टात उद्याच्या सुनावणीबद्दल पुन्हा अनिश्चितता आहे. आत्तापर्यंत कामकाजाच्या दोन लिस्टमध्ये उद्या महाराष्ट्राचं प्रकरण समाविष्ट नाही. आता उद्या सकाळी ऐनवेळी हे प्रकरण सुनावणीस येणार का याची प्रतीक्षा आहे. उद्या पाच न्यायमूर्तींचे खंडपीठ गठीत होऊन निवडणूक आयोगाच्या कार्यवाहीबद्दल निर्णय देणे अपेक्षित होतं पण अद्याप या घटनापीठाची रचना नाही

20:30 PM (IST)  •  24 Aug 2022

Nashik News : नाशिक महानगरपालिका वाजविणार ढोल, 15 सप्टेंबरपासून मनपाच्या वसुली मोहिमेला होणार सुरूवात

Nashik News : नाशिक महापालिकाच्या थकबाकीदाराच्या घरासमोर ढोल वाजवून वसुली करणार आहे. 15 सप्टेंबरपासून मनपाच्या वसुली मोहिमेला सुरूवात होणार आहे. 3245 बड्या थकबाकीदारच्या घरासमोर ढोल वाजवून वसुली होणार आहे. उत्पन्न वाढीसाठी महापालिकेनी ही मोहीम सुरू केली आहे. कोरोनानंतर मनपाची घरपट्टी, पाणीपट्टीची थकबाकी शेकडो कोटींच्या घरात गेल्यानं मनपा वसुली मोहिम राबविणार आहे.

20:07 PM (IST)  •  24 Aug 2022

आरबीआयनं द मलकापूर अर्बन को-ऑपरेटिव्ह बॅंकेवरील निर्बंध पुन्हा 3 महिने वाढवले

आरबीआयनं द मलकापूर अर्बन को-ऑपरेटिव्ह बॅंकेवरील निर्बंध पुन्हा 3 महिने वाढवले आहेत. आरबीआयनं आपल्या अखत्यारीत येणाऱ्या कलम 35 अ च्या अंतर्गत येणाऱ्या अधिकारांचा वापर करत बॅंकेला आर्थिक स्थिती सुधारण्याचे सांगितले आहे. मात्र आर्थिक स्थिती न स्थिरावल्यानं बॅंकिंग रेग्युलेशन ॲक्ट 1949 च्या कलम 56 अंतर्गत 24 नोव्हेंबर 2021 पासून बॅंकेचा व्यवसाय बंद केला होता. बॅंकेला आपली आर्थिक स्थिती सुधारण्यासाठी वेळोवेळी वेळ देण्यात येत आहे, ज्यात पुन्हा तीन महिन्यांचा कालावधी देण्यात आलाय. 

24 नोव्हेंबरपर्यंत पुन्हा एकदा आर्थिक स्थिती सुधारण्याचे बॅंकेला निर्देश देण्यात आले आहेत. दरम्यान, बॅंकेवर निर्बंध जरी असले तरी बॅंकेचा परवाना रद्द करण्यात आलेला नाही, त्यामुळे निर्बंधांसोबत बॅंक व्यवहार करु शकते. ज्यात ठेवी काढणे किंवा स्विकारण्यावर बॅंकेला मर्यादा आहे. 

20:05 PM (IST)  •  24 Aug 2022

मुंबईतील ललित हॉटेल उडवून देण्याची धमकी देणाऱ्या दोन आरोपीला अटक

मुंबईतील प्रसिद्ध ललित हॉटेल उडवून देण्याची धमकी देऊन पाच कोटींची मागणी करणाऱ्या दोन आरोपीलाला सहार पोलिसांनी अटक केली आहे. धमकी देणाऱ्याला मुंबई सहार पोलिसांनी गुजरात-वलसाड येथून अटक केली. तर या मुख्य आरोपीला सिम कार्ड पुरवणारा दुसरा आरोपीला वापी मधून अटक केली आहे. 

 

 

20:03 PM (IST)  •  24 Aug 2022

सार्वजनिक बांधकाम मंत्री रविंद्र चव्हाण यांचा रायगड जिल्हा दौरा

राज्याचे सार्वजनिक बांधकाम (सार्वजनिक उपक्रम वगळून), अन्न, नागरी पुरवठा आणि ग्राहक संरक्षण मंत्री रविंद्र चव्हाण हे शुक्रवार,‍ दि.26 ऑगस्ट 2022 रोजी रायगड जिल्हा दौऱ्यावर येत आहेत. 

सकाळी 7 वाजता पनवेल येथे आगमन व मुंबई-गोवा महामार्गाच्या दुरुस्ती कामाची पाहणी. सकाळी 8:45 वाजता कासू, जि.रायगड येथे आगमन व मुंबई-गोवा महामार्गाच्या दुरुस्ती कामाची पाहणी. सकाळी 9:45 वाजता नागोठणे, जि.रायगड येथे आगमन व मुंबई-गोवा महामार्गाच्या दुरुस्ती कामाची पाहणी. सकाळी 11:15 वाजता वाकड फाटा येथे आगमन व मुंबई-गोवा महामार्गाच्या दुरुस्ती कामाची पाहणी. दुपारी 12:30 वाजता खांब, जि.रायगड येथे आगमन व मुंबई-गोवा महामार्गाची दुरुस्ती कामाची पाहणी. दुपारी 1:30 वाजता वरसगाव फाटा, जि.रायगड येथे आगमन व मुंबई-गोवा महामार्गाच्या दुरुस्ती कामाची पाहणी. दुपारी 2 ते 2:30 वाजेपर्यंत राखीव. दुपारी 3:30 वाजता इंदापूर, जि.रायगड येथे आगमन व मुंबई-गोवा महामार्गाच्या दुरुस्ती कामाची पाहणी व त्यानंतर रत्नागिरीकडे प्रयाण.