(Source: ECI/ABP News/ABP Majha)
Maharashtra Live Updates 1st August 2022 : राज्यासह देश-विदेशातील महत्त्वाच्या बातम्यांचा आढावा
Maharashtra News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये...
LIVE
Background
Maharashtra News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये...
राष्ट्रीय-आंतरराष्ट्रीय तसेच स्थानिक पातळीवरील घडणाऱ्या सर्व घडामोडींची सर्वात पहिली बातमी 'एबीपी माझा' आपल्या प्रेक्षक-वाचकांना देण्याचा प्रयत्न करत आहे. त्यामध्ये आज राजकीय, सामाजिक, आर्थिक घडामोडींपासून ते खेळ आणि मनोरंजनाच्या बाबतीत अपडेट्स देण्याचा प्रयत्न असतो. आपल्या प्रेक्षक-वाचकांना अप-टू-डेट ठेवण्याचा एक भाग म्हणून आम्ही आज दिवसभरात काय-काय महत्त्वाच्या घडामोडी घडणार आहेत याची माहिती देत आहोत.
शिवसेना खासदार संजय राऊत यांना अटक
Sanjay Raut Arrest : शिवसेनेची तोफ, उद्धव ठाकरेंचे (Uddhav Thackeray) अत्यंत जवळचे आणि विश्वासू नेते अशी ओळख असलेले संजय राऊत (Sanjay Raut Case) यांना अखेर ईडीकडून अटक करण्यात आलं आहे. काल दिवसभराच्या चौकशीनंतर संजय राऊत यांना ईडीकडून अटक करण्यात आली. संजय राऊत यांना आज सकाळी 9:30 वाजता जे जे हॉस्पिटलमध्ये मेडिकलसाठी घेऊन जाणार आहेत. सकाळी 11:30 वाजता संजय राऊत यांना कोर्टात हजर करण्यात येणार आहे. काल सकाळी सात वाजल्यापासून ईडीचं पथक संजय राऊतांच्या भांडुपमधील मैत्री बंगल्यात ठाण मांडून होतं. दिवसभर चौकशी केल्यानंतर राऊतांना रात्री उशिरा 11.38 वाजता अटक करण्यात आलं.
आदित्य ठाकरे यांच्या शिव संवाद यात्रेचा दुसरा टप्पा आजपासून
शिवसेना नेते आणि आमदार आदित्य ठाकरे (Aaditya Thackeray) यांच्या 'शिव संवाद' यात्रेचा (Shiv Samvad Yatra) दुसरा टप्पा आजपासून (1 ऑगस्ट) सुरु होत आहे. सिंधुदुर्गातल्या कुडाळ, वेंगुर्ला सावंतवाडी आणि कोल्हापूर शहर, शिरोळ ते कात्रज चौक दरम्यान 1 आणि 2 ऑगस्ट रोजी ही 'शिव संवाद' यात्रा निघणार आहे. पहिल्या टप्प्यात मुंबई, ठाणे, औरंगाबाद, पैठण, शिर्डी अशी यात्रा केल्यानंतर आदित्य ठाकरे 1 ऑगस्टपासून सिंधुदुर्ग, कोल्हापूर आणि पुण्यात शिव संवाद यात्रेच्या दुसऱ्या टप्प्यासाठी जाणार आहेत.
राष्ट्रकुल स्पर्धेत भारताच्या अचिंता शेऊलीने इतिहास रचला, वेटलिफ्टिंगमध्ये सुवर्णपदक
Commonwealth Games 2022 : बर्मिंगहॅम येथे सुरू असलेल्या 2022 च्या राष्ट्रकुल स्पर्धेत भारतीय वेटलिफ्टर अचिंता शेऊलीने (Achinta Sheuli) आश्चर्यकारक कामगिरी केली. त्याने वेटलिफ्टिंगमध्ये (Weight Lifting) 313 किलो वजन उचलून सुवर्णपदक जिंकले. अचिंताने पहिल्या स्नॅच फेरीत 137 किलो वजन उचलले. दुसऱ्या लिफ्टमध्ये त्याने 139 किलो वजन उचलले. यानंतर अचिंताने तिसऱ्या लिफ्टमध्ये 143 किलो वजन उचलले. अशाप्रकारे त्याने स्नॅचमध्ये 143 किलो वजन उचलले. 2022 च्या राष्ट्रकुल स्पर्धेत सुवर्णपदक जिंकणारा अचिंता शेउली हा भारतातील तिसरा ऍथलीट आहे. त्याने वेटलिफ्टिंगमध्ये सुवर्णपदक पटकावले.
व्यावसायिक LPG सिलेंडरच्या दरात कपात, जाणून घ्या कोणत्या शहरात कितीने स्वस्त झाले LPG सिलेंडर?
LPG Price Reduced: व्यावसायिक LPG सिलेंडरच्या (19 किलो) किमती आज कमी झाल्यामुळे LPG सिलेंडर वापरणाऱ्या ग्राहकांना दिलासा मिळाला आहे. इंडियन ऑइल कॉर्पोरेशनने (IOC) व्यावसायिक एलपीजी सिलेंडरच्या किमतीत कपात केली आहे. यानंतर दिल्लीत एलपीजी सिलेंडर 36 रुपयांनी स्वस्त झाला आहे. तर मुंबईत एलपीजी सिलिंडरच्या किमतीत 36 रुपयांनी कपात केल्यानंतर आता 1936.50 रुपये प्रति सिलेंडर झाला आहे, जो पूर्वी 1972.50 रुपये प्रति सिलेंडर होता
Monkeypox : भारतात मंकीपॉक्सचा पहिला बळी? केरळमध्ये एका रुग्णाचा मृत्यू
Monkeypox Suspected Dies in Kerala : केरळमध्ये मंकीपॉक्स सदृश्य लक्षणं असलेल्या एका रुग्णाचा मृत्यू झाल्याने खळबळ माजली आहे. संयुक्त अरब अमिरातीहून (UAE) केरळमध्ये परतलेल्या एका रुग्णाचा मृत्यू झाला आहे. या रुग्णामध्ये मंकीपॉक्स विषाणू सदृश्य लक्षणं आढळली होती. केरळच्या आरोग्य मंत्री वीना जॉर्ज (Kerala Health Minister Veena George) यांनी रविवारी माहिती दिली की, युएईहून परतलेल्या 22 वर्षीय तरुणाचा मृत्यू झाला आहे. या रुग्णामध्ये मंकीपॉक्स विषाणू सदृश्य लक्षणे आढळली होती. या रुग्णाचा मृत्यू मंकीपॉक्समुळे झाल्याचा संशय आहे. या रुग्णाला इतर कोणताही आजार नव्हता. रुग्णाचे नमुने तपासणीसाठी पाठवण्यात आले आहेत. आरोग्य विभाग तरुणाच्या मृत्यूचं कारण शोधण्याचा प्रयत्न करत आहे.
नाशिकमध्ये ट्रॅक्टर पलटी होऊन विद्यार्थी ठार
नाशिकच्या बागलाण तालुक्यातील दोधेश्वर घाटात ट्रॅक्टर पलटी होवून एक विद्यार्थी ठार झाला आहे. तर 20 हून अधिक जण जखमी झालेत. जखमींवर सरकारी आणि खासगी रुग्णालयात उपचार सुरू असून प्रकृती स्थिर आहे.
पहिल्या श्रावण सोमवार निमित्त दोधेश्वर तीर्थस्थळी भावीकांची मोठी गर्दी होत असते. गर्दी नियंत्रणात ठेवण्यासाठी पोलीस बंदोबस्तासह बागलाण ॲकेडमीच्या सैनिक आणि पोलीस प्रशिक्षणार्थी विद्यार्थ्यांना दरवर्षी बोलवले जाते. आजही विद्यार्थी दोधेश्वर मंदिराच्या बंदोबस्तसाठी गेले होते. सायंकाळी ट्रॅक्टरमधून विद्यार्थी सटाणाकडे जाताना घाटातील पहिल्याच वळणावर ट्रॅक्टर पलिटी होवून विद्यार्थी घाटातील दगडावर, रस्त्यावर आदळून जखमी झाला. नंतर त्याचा मृत्यू झाला.
नागपुरातील विद्यार्थ्याचा तलावात बुडून मृत्यू
नागपूर : मित्रांसोबत पोहायला गेलेल्या 19 वर्षीय विद्यार्थ्याचा अंबाझरी तलावात बुडून मृत्यू झाला आहे. आज दुपारी 4 वाजताच्या सुमारास ही घटना घडली. कुणाल बर्वे असे मृत्यू झालेल्या तरुणाचे नाव असून तो बीकॉम प्रथम वर्षाचा विद्यार्थी होता.
आज दुपारी महाविद्यालय संपल्यावर कुणाल मित्रांसह अंबाझरी तलावाजवळ फिरायला गेला होता. यावेळी त्याचे मित्र पोहण्यासाठी पाण्यात उतरले. त्यांच्या पाठोपाठ कुणाल ही तलावात पोहोण्यासाठी गेला. पण काही वेळातच तो बुडाला.
मुंबईबाबत केलेल्या वक्तव्यावर राज्यपालांकडून माफी
मुंबईबाबत केलेल्या वक्तव्यावर राज्यपालांकडून माफी मागण्यात आली आहे. माझ्याकडून कदाचित चूक झाली असेल, राज्यसेवकाला क्षमा करावी असे म्हणत राज्यपालांनी महाराष्ट्राची माफी मागितली.
Nagpur Covid Update : जिल्ह्यात 1565 कोरोना बाधित सक्रिय, 92 नव्या बाधितांची नोंद
नागपूरः जिल्ह्यात सध्या 1565 कोरोना बिधत सक्रिय असून सोमवारी प्राप्त अहवालानुसार 92 नव्या बाधितांची नोंद झाली आहे. तर 82 बाधितांनी कोरोनावर मात केली आहे. जिल्ह्यातील 54 बाधितांवर रुग्णालयात उपचार सुरु आहेत. तर 1511 बाधित गृहविलगीकरणात आहेत. सोमवारी 755 जणांची रॅपिड अॅन्टीजेन चाचणी करण्यात आली.
उद्धव ठाकरे यांनी सर्व काही दिले असताना यांनी का गद्दारी केली? : आदित्य ठाकरे
उद्धव ठाकरे यांनी सर्व काही दिले असताना यांनी का गद्दारी केली? असा प्रश्न शिवसेना नेते आदित्य ठाकरे यांनी उपस्थित केला आहे. आदित्य ठाकरे आज कोल्हापूर दौऱ्यावर आहेत. शिवसंवाद यात्रेदरम्यान आदित्य यांनी बंडखोरी केलेल्या आमदारांवर हल्लाबोल केला. "यांच्या लायकी पेक्षा जास्त दिले असेल त्यामुळे यांनी गद्दारी केली. प्रकाश आबिटकर यांच्यावर डोळे झाकून विश्वास ठेवला. 567 कोटी त्यांच्या मतदार संघात दिले आहेत. असे असताना या प्रकाश आबिटकर यांनी असे का करावे? या गद्दार गटात दोन गट आहेत. अनेक जण स्वतःच्या भुकेसाठी गेले तर दुसरा गट फसवून नेला आहे. सर्व गद्दार लोकांना सांगतो जिथे आहात तिथे राहा, पण आमदारकीचा राजीनामा द्या आणि निवडणुकीला समोर या, असे आव्हान यावेळी आदित्य ठाकरे यांनी केले.
महत्त्वाच्या बातम्या
ट्रेंडिंग न्यूज
