शिकारीसाठी आलेल्या बिबट्याची गायींकडून शिकार

विशेष म्हणजे बिबट्यावर गायींनी हल्ला केला त्यावेळी गोठ्याबाहेर असलेल्या दुसऱ्या बिबट्याने तेथून धूम ठोकली. संगमनेरमध्ये या घटनेची जोरदार चर्चा सुरु आहे.

अहमदनगर : बिबट्याने गायीची अथवा मानवाची शिकार केल्याच्या घटना नेहमी घडत असतात. मात्र गायीच्या शिकारीसाठी आलेल्या बिबट्याला आपले प्राण गमावावे लागल्याची विलक्षण घटना समोर आली आहे. शिकारीसाठी गोठ्यात घुसलेल्या बिबट्याला 30 ते 35 गायींनी एकत्रित हल्ला करुन ठार केलं. संगमनेर तालुक्यातील उंबरी-बाळापूर येथील ही घटना आहे.

विशेष म्हणजे बिबट्यावर गायींनी हल्ला केला त्यावेळी गोठ्याबाहेर असलेल्या दुसऱ्या बिबट्याने तेथून धूम ठोकली. संगमनेरमध्ये या घटनेची जोरदार चर्चा सुरु आहे.

संगमनेर तालुक्यातील उंबरी-बाळापूर शिवारातील कारवाडी परिसरातील उंबरकर वस्तीत सूर्यभान रावसाहेब उंबरकर यांचा गायींचा मुक्त गोठा आहे. त्यामध्ये 30 ते 35 जनावरे आहेत. शनिवारी रात्री साडेआठच्या सुमारास या गोठ्यात एका बिबट्याने मागील बाजूने प्रवेश केला. त्यामुळे गायी सैरावैरा पळत सुटल्या. तसेच त्यांनी मोठमोठ्याने हंबरडा फोडत, बिबट्याचा प्रतिकार करण्यास सुरुवात केली.

या आवाजाने उंबरकर कुटुंबियांनी गोठ्याकडे धाव घेतली. यावेळी त्यांना एक बिबट्या या गायींच्या पायाखाली तुडवला जात असल्याचे, तर दुसरा गोठ्याबाहेर उभा असल्याचे दिसले. त्यांनी याबाबत तात्काळ वनविभागाला माहिती दिली.

वनकर्मचारी घटनास्थळी पोहोचले, तेव्हा गायीच्या पायाखाली दीड वर्षाचा नर जातीचा बिबट्या मृत झाल्याचे आढळले. या बिबट्याच्या हल्लात एक वासरुही जखमी झाले आहे.