Kolhapur : कोल्हापूरच्या प्रेमवीराचा विषय हार्ड, थेट हायवेवर होर्डिंग लावून प्रपोज, इंजिनिअर प्रेयसी हारकून टुम्म!
Kolhapur Hording Propose : कोल्हापुरातल्या एका तरुणाने चक्क होर्डिंग लावत त्याला आवडत असलेल्या मुलीला प्रपोज केलं. त्याच्या या 'होर्डिंग प्रपोज'ची चर्चा सर्वत्र रंगली आहे.
कोल्हापूर: तांबड्या- पांढऱ्या रस्स्यासाठी आणि रांगड्या स्वभावासाठी कोल्हापूरची ओळख सर्वत्र आहे. इथले सगळेच विषय एकदम हार्ड असतात, मग त्या शर्यती असो वा मारामारी. मग कोल्हापूरकर प्रेमात कसं मागं राहतील? कोल्हापुरातल्या एका तरुणाने मोठं होर्डिंग लावून त्याच्या प्रेयसीला प्रपोज केलं आहे. प्रेमाच्या या होर्डिंगची सध्या सर्वत्र चर्चा आहे.
मुलाने आपल्याला अशा पद्धतीने प्रपोज करावं की याआधी कुणी तसं केलंच नसेल अशी इच्छा अनेक मुली बोलून दाखवतात. तसा प्रयत्नही अनेकजण करतात, त्यामध्ये काही अनोख्या पद्धतीने केलेले प्रपोज अनेकांच्या लक्षात राहतात. अशाच अनोख्या पद्धतीने कोल्हापुरातल्या सौरभ कसबेकरने उत्कर्षा हीला चक्क मोठं होर्डिंग लाऊन प्रपोज केलं आहे. महत्त्वाचं म्हणजे त्या मुलगीने सुद्धा त्याला होकार दिला आहे. एव्हढंच काय तर त्या मुलीच्या आणि मुलाच्या घरचे सर्वजणसुद्धा यांच्या नात्यासाठी तयार झाले आहेत.
कोल्हापुरातील सौरभ कसबेकर आणि सांगलीमधील मुलगी उत्कर्षा दोघेही बुधगाव-सांगली येथील वसंतरावदादा पाटील इन्स्टिट्यूट ऑफ टेक्नॉलॉजी या इंजिनिअरिंग कॉलेजमध्ये सिव्हिल डिपार्टमेंटमधून शिक्षण घेत होते. सौरभची आणि उत्कर्षाची शेवटच्या वर्षापर्यंत सुद्धा काही खास ओळख नव्हती. मात्र जेव्हा इंजिनिअरिंग पूर्ण झाली तेव्हा सौरभच्या घरच्यांनी त्याला त्याच्या मनात कोणी असेल तर सांग आम्ही रीतसर मागणी घालू असं त्याला सांगितलं.
मग या पठ्ठ्याने तात्काळ कॉलेजमधील उत्कर्षा नावाची मुलगी होती, आणि ती त्याला आवडायची असं सांगितलं. त्यामुळे त्यांनी रीतसर तिच्या घरी लग्नासाठी मागणी घालायचे ठरवले. त्यानुसार सौरभच्या वडिलांनी उत्कर्षाच्या घरी मागणी घातली. उत्कर्षाच्या घरच्यांचे सुद्धा काही दिवस होय नाही, होय नाही हेच सुरू होते.
उत्कर्षाकडून सुद्धा अद्याप होकार आला नव्हता. अनेक प्रयत्नानंतर शेवटी घरचे सुद्धा तयार झाले. मात्र लग्नासाठी अनोख्या पद्धतीने तिला प्रपोज करायचे असे सौरभने ठरवले होते. त्यानुसार त्याने कोल्हापूर-सांगली रोड वर एका होर्डिंगद्वारे प्रपोज करायचे ठरवले. या नियोजनानुसार सौरभने चक्क हायवेच्या शेजारीच भलामोठं होर्डिंग लावलं आणि उत्कर्षाला प्रपोज केलं.
या होर्डिंगचे आणि सौरभ-उत्कर्षाचे प्रपोज करतानाचे फोटो सध्या सोशल मीडियावर व्हायरल होत आहेत. त्याच्या या अनोख्या प्रपोजची चर्चा सर्वत्र रंगली असून अनेक प्रेमवीरांनाही नवीन आयडीया मिळाली आहे.
संबंधित बातम्या:
महत्त्वाच्या बातम्या
ट्रेंडिंग न्यूज
