भिवंडीत गर्भपात गोळ्यांचा अवैध धंदा तेजीत; वैद्यकीय यंत्रणेचं दुर्लक्ष

भिवंडीत गर्भपात गोळ्यांचा अवैध धंदा तेजीत सुरु असल्याचे समोर आले आहे.यात मेडिकल स्टोअर बरोबरच वैद्यकीय क्षेत्राशी जोडलेल्या खासगी व्यक्तींकडूनदेखील गर्भपाताच्या गोळ्यांची विक्री केली जात आहे.

भिवंडी : गर्भलिंगनिदाना बरोबरच असुरक्षित गर्भपात करण्यास कायद्याने बंदी घातली आहे. असे असताना मेडिकल स्टोअर बरोबरच वैद्यकीय क्षेत्राशी संबंधित असलेल्या अनेक व्यक्तींनी सध्या गर्भपाताच्या गोळ्या विकण्याचा गोरखधंदा सुरु केल्याची खळबळजनक बाब भिवंडीत समोर आली आहे. विशेष म्हणजे या गोरखधंद्यावर वैद्यकीय विभागासह पोलीस यंत्रणा व प्रशासनाचा कोणताही धाक नसल्याने सर्रासपणे गर्भपाताच्या गोळ्यांची विक्री भिवंडीत होत आहे.

300 रुपयांपासून ते 1500 रुपयांपर्यंत या गर्भपाताच्या गोळ्या माणूस बघून विकल्या जात आहेत. एका दक्ष नागरिकाने केलेल्या स्टिंग ऑपरेशनमध्ये ही खळबळजनक बाब समोर आली आहे. विशेष म्हणजे कायद्याची बंदी असतानाही मेडिकलमध्ये डॉक्टरांच्या कोणत्याही लेखी प्रिस्क्रिप्शन शिवाय या गोळ्या मिळत असल्याने गर्भपाताच्या संख्येत दिवसेंदिवस वाढ होत आहे. मात्र, यावर शासकीय यंत्रणांचे कोणतेही नियंत्रण नसल्याने अवैध गोळ्या विक्री करणाऱ्यांवर कारवाई होणार का? याकडे सर्वांचे लक्ष लागले आहे.

विजय जाधव असे दक्ष नागरिकाचे नाव असून ते सामाजिक कार्यकर्ता म्हणून भिवंडीत काम करीत आहेत. भिवंडीत गर्भपाताच्या गोळ्या डॉक्टरांच्या प्रिस्क्रिप्शन शिवाय मिळतात अशी माहिती मिळाल्यानंतर जाधव यांनी भिवंडीतील शास्त्री नगर परिसरातील एका मेडिकल दुकानात या गर्भपाताच्या गोळ्या खरेदी करताना स्टिंग ऑपरेशन केले. त्यातही खळबळजनक माहिती समोर आली. भिवंडीतील अनेक मेडिकलमध्ये अशा प्रकारे अवैधरित्या गर्भपाताच्या गोळ्या डॉक्टरांच्या प्रिस्क्रिप्शन शिवाय मिळत असल्याने यामुळे गर्भपात कायद्याचं सर्रासपणे उल्लंघन होत असून समाजात भ्रूणहत्या वाढण्याची शक्यता देखील जाधव यांनी वर्तविली आहे. या अवैध गोळ्या विकणाऱ्या मेडिकल चालकांसह खासगी व्यक्तींवर कारवाई करावी तसेच संपूर्ण रॅकेटचा पर्दाफाश करावा अशी मागणी देखील जाधव यांनी केली आहे.

या गोळ्या प्रसुती व स्री रोग तज्ञ डॉक्टरांच्या सल्ल्यानुसारच घेणे गरजेचे आहे. मात्र, भिवंडीत चणे फुटाणे विकतात तशा पद्धतीने सर्रासपणे या गर्भपाताच्या गोळ्या विकल्या जात आहेत. डॉक्टरांचा सल्ला न घेता या गोळ्या खाल्ल्याने स्त्रीला भविष्यात गर्भपिशवीसंदर्भतील त्रास होऊ शकतो. तर कधी कधी गोळ्यांमध्ये पूर्ण गर्भ पडत नसल्याने गर्भ पिशवी साफ करण्याची वेळ अथवा काढून टाकण्याची वेळ महिलेवर येते. यामुळे महिलांच्या जीवाला देखील धोका निर्माण होण्याची शक्यता तर कधी कधी जास्त रक्तस्राव होऊन महिलांचा जीव देखील जातो, अशी माहिती स्री रोग तज्ञ डॉ. सुप्रिया अरवारी यांनी दिली आहे.

भिवंडीत अनेक अवैध धंदे सुरु असताना आता महिलांच्या जीवाशी खेळून अवैध गर्भपाताच्या गोळ्या विकणाऱ्या रॅकेटवर अन्न व औषध प्रशासन नेमकी काय कारवाई करणार याकडे सर्वांचे लक्ष लागले आहे.

इतर महत्वाच्या बातम्या :