मनोज जरांगेंच्या दबावाला सरकार झुकले तर ओबीसी रस्त्यावर उतरणार, बबनराव तायवाडेंचा इशारा  

Babanrao Taywade : मनोज जरांगे पाटील (Manoj Jarange Patil) यांच्या दबावापुढं सरकार झुकणार नाही असे मत राष्ट्रीय ओबीसी महासंघाचे अध्यक्ष बबनराव तायवाडे (Babanrao Taywade) यांनी व्यक्त केले.  

Babanrao Taywade on Manoj Jarange Patil

Source : Babanrao Taywade on Manoj Jarange Patil

Babanrao Taywade : मनोज जरांगे पाटील (Manoj Jarange Patil) यांच्या दबावापुढं राज्य सरकार झुकणार नाही. कोणत्याही मराठ्याला सरसकट कुणबी प्रमाणपत्र देणार नाही याचा आम्हाला पूर्ण विश्वास असल्याचे मत राष्ट्रीय ओबीसी महासंघाचे अध्यक्ष बबनराव तायवाडे (Babanrao Taywade) यांनी व्यक्त केले.  मात्र राज्य सरकार मनोज जरांगे यांच्या समोर झुकले तर ओबीसी समाज रस्त्यावर उतरल्याशिवाय राहणार नसल्याचा इशारा देखील बबनराव तायवाडे यांनी दिला आहे. 

कोणत्याही समाजाची जात बदलवण्याचा अधिकार सरकारला नाही. त्यामुळं ओबीसी आपल्या संविधानिक अधिकाराच्या रक्षणासाठी उभा असल्याचे बबनराव तायवाडे म्हणाले. मराठा समाजाला सरसकट कुणबी प्रमाणपत्र देण्याला ओबीसी महासंघाचा विरोध आहे. जर कुणबी प्रमाणप्तर दिले तर आंदोलनाचा इशारा त्यांनी दिला आहे.  

मनोज जरांगे पाटलांच्या आमरण उपोषणाला आजपासून सुरुवात 

मराठा आंदोलक मनोज जरांगे पाटील यांनी  मराठा समाजाला सरसकट कुणबी प्रमाणपत्र मिळावं यासह इतर मागण्यांसाठी अंतरवाली सराटीत आजपासून आमरण उपोषणास सुरुवात केली आहे. मनोज जरांगे पाटील हे सातव्यांदा आंदोलनाला बसले आहेत. उपोषणाची सुरुवात करताच मनोज जरांगे पाटील यांनी मराठ्यांच्या मागणीशी मुख्यमंत्री गद्दारी करणार नाहीत, असे म्हणत मुख्यमंत्री देवेंद्र फडणवीस (Devendra Fadnavis) यांच्यावर निशाणा साधला. तसेच, संतोष देशमुख (Santosh Deshmukh) यांना न्याय मिळेपर्यंत लढणार, असेही मनोज जरांगे यांनी म्हटले आहे.

जरांगे पाटलांच्या नेमक्या मागण्या काय?

आज 25 जानेवारीपासून आमरण उपोषण सुरू केले आहे. उद्या 26 जानेवारीला सगेसोयरेची अधिसूचना काढून एक वर्ष पूर्ण होत आहे. एक वर्ष झालं, मात्र समाज रस्त्यावर आहे. मराठ्यांना सरसकट कुणबी जीआर काढून त्याचे तात्काळ वाटप करण्यात यावे. ज्या मराठ्यांची कुणबी नोंद निघाली त्यांच्या सर्वच सगेसोयऱ्यांना कुणबी प्रमाण पत्र द्यावे. शिंदे समितीचे काम पुन्हा सुरू करून नोंदी सापडून देण्याचे काम करावे. आंदोलनातील दाखल गुन्हे मागे घ्यावेत. हैदराबाद, सातारा, बॉम्बे गॅझेट लागू करावे, या सह आठ-नऊ मागण्या आम्ही सरकारकडे सादर केल्या आहेत. संतोष देशमुख यांची हत्या करण्यात आली, यासाठी सुद्धा आपण लढायचे आहे. यातील सर्वच आरोपींना फाशीची शिक्षा करण्याची मागणी आपण या आंदोलनात केली आहे. संतोष भैयाला न्याय मिळेपर्यंत आपण लढणार आहोत. सरकारने मराठ्यांच्या मागण्यांची तातडीने अंमलबजावणी करा. मराठ्यांच्या मागणीशी मुख्यमंत्री गद्दारी करणार नाहीत, असे त्यांनी म्हटले.