Dombivli Fire : डोंबिवलीत दोन कंपन्यांना भीषण आग, दोन्ही कंपन्या जळून खाक, मोठं आर्थिक नुकसान 

Dombivli Fire : डोंबिवली एमआयडीसी (Dombivli MIDC) मधील खंबाळपाडामध्ये दोन कंपन्यांना मध्यरात्री भीषण आग लागल्याची घटना घडली.

Dombivli Fire

Dombivli Fire : डोंबिवली एमआयडीसी (Dombivli MIDC) मधील खंबाळपाडामध्ये दोन कंपन्यांना मध्यरात्री भीषण आग लागल्याची घटना घडली. या आगीमध्ये दोन्ही कंपन्या जळून खाक झाल्या आहेत. प्राज टेक्सटाइल कंपनी आणि परफ्यूम बनवणारी रॅमसन्स अशी या कंपन्यांची नावे आहेत. घटनेची माहिती मिळताच कल्याण डोंबिवली मनपा, भिवंडी, उल्हासनगर, बदलापूर येथून अग्निशमन दलाच्या जवळपास 10 पेक्षा अधिक गाड्या घटनास्थळी दाखल झाल्या होत्या. अथक प्रयत्नानंतर आगीवर नियंत्रण मिळवण्यात अग्निशमन दलाच्या जवानांना यश आलं आहे.

आग इतकी भीषण होती की, प्राज टेक्सटाइल कंपनी आणि परफ्यूम बनवणारी रॅमसन्स या दोन्ही कंपन्या आगीत जळून खाक झाल्या. सुदैवाने यामध्ये कोणत्याही प्रकारची जीवितहानी झाली नाही. मात्र, मोठं आर्थिक नुकसान झालं आहे. विशेष म्हणजे याच कंपनीच्या बाजूला गॅस पंप असल्याने आजूबाजूच्या परिसराला मोठा धोका निर्माण झाला होता. अग्निशमन  दलाकडून गॅस पंपाला कुलिंग करण्याचे काम सुरु केले होते. गॅस पंपकडे आग येऊ नये यासाठी अग्निशमन दलाचे शर्थीचे प्रयत्न सुरू होते. अखेर ही आग नियंत्रणात आल्यानं आणखी होणारा धोका टळला.  ही आग रात्री एक वाजण्याच्या सुमारास लागली होती.

आग लागलेल्या कंपनीच्या आजूबाजूला मोठ्या प्रमाणामध्ये नागरी वस्ती आहे. आग विझवण्यासाठी आजूबाजूच्या शहरातील कल्याण डोंबिवली मनपा, भिवंडी, उल्हासनगर, बदलापूर येथून अग्निशमन दलाच्या 10 गाड्या दाखल झाल्या होती. अखेर आगीवर नियंत्रणात मिळवण्यात यश मिळालं आहे.