महाराष्ट्र आरोग्य विज्ञान विद्यापीठाच्या यशस्वी विद्यार्थ्यांमध्ये देशद्रोही गद्दार जाकीर नाईकचे नाव तात्काळ हटवा : आमदार अतुल भातखळकर

वेबसाईटवर यशस्वी माजी विद्यार्थ्यांच्या यादीत देशद्रोही जाकीर नाईक याचे नाव झळकत असून ते राज्य सरकारने तात्काळ हटवावे अशी मागणी आमदार अतुल भातखळकर यांनी केली आहे.

मुंबई : गद्दार आणि गद्दारीचा विसर पडू नये असे म्हणतात परंतु नाशिकच्या महाराष्ट्र आरोग्य विज्ञान विद्यापीठाने जिहादी भामटा जाकीर नाईकची आठवण वेगळ्या अर्थाने जपली आहे. विद्यापीठाच्या, वेबसाईटवर यशस्वी माजी विद्यार्थ्यांच्या यादीत देशद्रोही जाकीर नाईक याचे नाव झळकत असून ते राज्य सरकारने तात्काळ हटवावे अशी मागणी भाजपचे नेते व कांदिवली पूर्वचे आमदार अतुल भातखळकर यांनी राज्याच्या मुख्यमंत्र्यांकडे पत्राद्वारे केली आहे.

दहशतवादी कारवायांत प्रत्यक्ष अथवा अप्रत्यक्ष सहभागाप्रकरणी झाकीर नाईक आरोपी असून चौकशी टाळण्यासाठी तो फरार झाला आहे. करोडो रुपयांची अफरातफर व हवाला रॅकेट प्रकरणी अंमलबजावणी संचालनालयाकडून त्याच्याविरुद्ध गंभीर स्वरूपाचे गुन्हे दाखल करण्यात आलेले आहेत. बांग्लादेश, इंग्लंड यांसह अनेक देशांमध्ये जाकीर नाईकला प्रवेशास व ऑनलाइन भाषण देण्यास सुद्धा बंदी घालण्यात आलेली आहे. अशा त्याने केलेल्या देशद्रोह्याचे नाव एखाद्या विद्यापीठाच्या वेबसाईटवर यशस्वी विद्यार्थ्यांच्या यादीत नोंदवणे ही अत्यंत आक्षेपार्ह व लाजिरवाणी बाब असून राज्य सरकारने महाराष्ट्र आरोग्य विज्ञान विद्यापीठ, वेबसाईटवरून जाकीर नाईक याचे नाव हटविण्यासाठी आदेश द्यावेत अशी आग्रही मागणी आ. अतुल भातखळकर यांनी केली आहे.

या संदर्भात पुढील 24 तासांत कारवाई न केल्यास आंदोलन करणार असल्याचे व आगामी अधिवेशनात या विरोधात आवाज उठविणार असल्याचे सुद्धा आमदार भातखळकर म्हणाले.