Breaking News LIVE : पालघर : चिंचणी बीचवर मद्यपी पर्यटकांनी पोलिसांवर हल्ला केल्याची माहिती
Breaking News LIVE Updates, 11 July 2021: दिवसभरातील ताज्या घडामोडी, महत्त्वाचे अपडेट्स, देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर महत्वाचे अपडेट लाईव्ह ब्लॉगमध्ये...
रायगड : मुरूड तालुक्यातील काशीद येथील नाल्यावरील लहान पूल कोसळला, अपघातात पाण्याच्या प्रवाहात वाहून गेलेल्या मोटारसायकलस्वाराचा मृत्यू, विजय चव्हाण याचा मृत्यू
नांदेड जिल्ह्यात मुसळधार पावसात बैलगाडीसह शेतकरी गेला वाहून, बिलोली तालुक्यातील घटना.
पालघर जिल्ह्यात सध्या कोरोनाच्या पार्श्वभूमीवर पर्यटन स्थळांवर पर्यटकांना बंदी असून आज रविवारची सुट्टी असल्याने चिंचणी बीचवर काही पर्यटक बाहेरून पर्यटनासाठी आले होते. हे पर्यटक मद्यप्राशन करून धिंगाणा घालत असल्याचे पोलिसांना आढळून आल्यावर पोलिसांनी कारवाई करायला सुरुवात केली. मात्र, ह्या मद्यपी पर्यटकांनी पोलिसांवरच हल्ला केल्याचे समोर आले आहे. सध्या चिंचणी खाडी नाका पोलीस चौकीमध्ये कारवाई सुरू आहे.
बीड जिल्ह्यात सर्वदूर पावसाची हजेरी.. बीड जिल्ह्यातील काही भागात पावसाअभावी दुबार पेरणीचे संकट ओढवलं होतं, मात्र मागच्या दोन दिवसापासून बीड जिल्ह्यात काही ठिकाणी पावसाने हजेरी लावल्याने दुबार पेरणीचे संकट टळले आहे. आज दुपारपासून बीड जिल्ह्यात पुन्हा दमदार पावसाने सुरुवात केली आहे. बीड शहरामध्ये मध्यम स्वरूपात तर अंबाजोगाई तालुक्यात परळी आणि माजलगाव परिसरामध्ये जोरदार पावसाने हजेरी लावली आहे
कोल्हापूर : व्यापाऱ्यांमुळे कोल्हापुरातील कोरोना वाढत नाही हे सिद्ध झालं आहे. पाच दिवस दिलेल्या परवानगीमध्ये जिल्ह्यातील रुग्ण संख्या वाढली नाही. राज्य सरकारने व्यापाऱ्यांची परीक्षा न बघता लवकरात लवकर आदेश काढावेत. व्यापाऱ्यांची उद्यापासून दुकाने सुरू करण्याची सर्व तयारी झाली आहे. महाराष्ट्र चेंबर ऑफ कॉमर्सचे उपाध्यक्ष ललित गांधी यांचं आवाहन
रत्नागिरी : हवामान खात्याने वर्तवण्यात आलेल्या अंदाजानुसार पावसाने जिल्ह्यात जोरदार सुरुवात केली आहे. चिपळूणमधल्या वाशिष्टी नदीच्या पाणी पातळीत वाढ झाली आहे. शहरातील बाजारपुलाला पाणी लागले आहे..
मुसळधार पडणाऱ्या पावसामुळे मुंबई-गोवा महामार्गावरील परशुराम घाटात रस्त्यावर माती आल्याने वाहतूक ठप्प झाली आहे. वाहनांच्या लांबच्या लांब रांगा लागल्या आहेत.
आषाढी यात्रेपूर्वीच बंद विठ्ठल मंदिराबाहेर शेकडो वारकरी, आषाढी पूर्वीच केली आषाढी यात्रा पोच
राज्यातील दुर्गम आणि अतिदुर्गम आदिवासी जिल्ह्यांत काम करणाऱ्या मानसेवी वैद्यकीय अधिकाऱ्यांनी चक्क मुख्यमंत्री उद्धव ठाकरे यांना पत्र लिहून आत्महत्येची परवानगी मागितली आहे. या पत्रात मानसेवी वैद्यकीय अधिकाऱ्यांनी आपल्या प्रलंबित मागण्यांचाही उल्लेख केला आहे. वैद्यकीय अधिकाऱ्यांनी लिहिलेल्या या पत्रामुळे एकच खळबळ उडाली आहे.
लस मिळत नसल्याने विडी कामगार महिलांचा रस्त्यावर उतरून आंदोलन, सोलापुरातील अक्कलकोट रोडवरील मुद्रा सन सिटी आरोग्य केंद्र येथील प्रकार,
पहाटे पासून रांगा लागून थांबल्यानंतर देखील लस मिळत नसल्याचा आरोप,
दुसरीकडे लसीकरण झाल्याशिवाय किंवा कोरोना चाचणीशिवाय कामास परवानगी नाही,
शहरात मागील महिन्याभरात अंत्यत तुरळक आणि अनियमित लसीकरण,
त्यामुळे संतापलेल्या महिलांनी रस्त्यावर उतरून केलं आंदोलन, पोलिसांनी मध्यस्थी करून महिलांची समजूत काढल्याने आंदोलन मागे,
पालघर : मुंबई-अहमदाबाद राष्ट्रीय महामार्गावर मेंढवण येथे कंटेनरचा भीषण अपघात चालकाचा कंटेनर खाली दबून मृत्यू. मेंढवन जवळ नेहमीच्या धोकादायक वळणावर काच वाहून नेणाऱ्या कंटेनर वरील चालकाचा ताबा सुटल्याने हा भीषण अपघात घडला असून चालकाने केबिन मधून उडी मारल्यावर तो कंटेनरखाली दबून त्याचा जागीच मृत्यू झाला तर कंटेनरची केबिन जवळपास तीनशे मीटर दूर जाऊन रोडच्या खाली गेली सध्या गुजरात वरून मुंबईकडे जाणारी वाहतूक बायपास रोड निवडण्यात आली आहे घटनास्थळी वाहतूक पोलिस यंत्रणा दाखल असून कंटेनर बाजूला करण्याचे काम सुरु आहे.
कोकणात गणेशोत्सवासाठी जाणाऱ्या चाकरमान्यांना सोडण्यात आलेल्या 72 विशेष रेल्वे गाड्या फुल झाल्या असून रेल्वेने अजून अधिकच्या गाड्या सोडाव्यात अशी मागणी भाजपा नेते आमदार अँड आशिष शेलार यांनी पुणे दौऱ्यात रेल्वे राज्य मंत्री रावसाहेब दानवे यांची भेट घेऊन केली. कोकणात गणेशोत्सवाठी मुंबई, ठाणे, नवी मुंबई, वसई, विरार या भागातून मोठ्या प्रमाणात चाकरमानी आपल्या कोकणातील गावी जातात.
आज सकाळी हिंगोली जिल्ह्यातील 8.35 मिनिटांनी औंढा, कळमनुरी, वसमत तालुक्यातील अनेक गावांत सौम्य भूकंपाचे धक्के बसले आहेत. दहा सेकंद तर कुठे 30 सेकंदापर्यंत या भूकंपाचे धक्के जाणवले आहेत. त्यामुळे अनेक गावांमध्ये भीतीचे वातावरण पसरले आहेत काही गावात तर आवाजही झाल्याची माहिती मिळते आहे.
पंढरपूर : कोरोना संकटामुळे सलग दुसऱ्या वर्षी आषाढीला पायी वारी काढण्यास शासनाने मज्जाव केल्यावरही शेकडो वारकरी ८ दिवसात देहू आणि आळंदी येथून पायी वारी करीत पंढरपूरला पोचले असून बंडातात्या कराडकर याना जरी शासनाने स्थानबद्ध केले असले तरी त्यांची पताका व ताल घेऊन समर्थक वारकरी पंढरपूर मध्ये दाखल झाले आहेत . कोरोना संकटामुळे पायी वारी नाही असा आदेश शासनाने काढला असून 17 ते 25 जुलै कालावधीसाठी संचारबंदी लागू केली आहे . मात्र शेकडो वर्षांपासून घरात वारी असणारे पारंपरिक वारकर्यांनी आपला पायी वारीचा नियम न मोडता देहू आणि आळंदी येथून पायी वारी चालत पंढरपूर गाठले आहे . हे निष्ठावान वारकरी आळंदी आणि देहू येथून आठ दिवसात पायी चालत पंढरपूरमध्ये पोचले आहेत . पायी वारीसाठी आग्रही असणाऱ्या बंडातात्या कराडकर याना प्रस्थानादिवशी प्रशासनाने नजरकैद केल्याचा आरोप करीत त्यांचे समर्थक वारकर्यांनी बंडातात्या यांची पताका आणि टाळ पायी चालत पंढरपूर पर्यंत आणून त्यांचा पायी वारीचा संकल्प पूर्ण केल्याचे भानुदास वैराट यांनी सांगितले . रोज ४९ ते ५० किलोमीटरची पायपीट करीत आणि कोरोनाचे नियम पाळत हे वारकरी आषाढीपूर्वीच आपली वारी पोच करीत असल्याने वारकर्यांनाही वारी केल्याचा आनंद आणि समाधान मिळत आहे . पंढरपुरात शिखराचे दर्शन घेऊन हे वारकरी परत आपल्या गावाकडे परतत आहेत
Gold Silver Price Today : सलग तीन दिवासांच्या घसरणीनंतर चांदीच्या दरात आज 500 रुपयांची वाढ झाली आहे. त्यामुळे आज एक किलो चांदीसाठी 69,300 रुपये मोजावे लागणार आहेत. तुलनेत सोन्याच्या भावात कोणताही बदल झाला नाही. मुंबई आणि पुण्यात 10 ग्रॅम 24 कॅरेट सोन्याचा भाव हा 47,810 रुपये इतका आहे तर 22 कॅरेट सोन्याचा भाव हा 46,810 रुपये इतका आहे.
रत्नागिरी : रत्नागिरी जिल्ह्यातील रिफायनरीचा मुद्दा मागील तीन ते चार वर्षापासून गाजतोय. पण, नाणार ऐवजी राजापूर तालुक्यातील बारसू - सोलगांवचा मुद्दा चर्चेत आला आणि याबाबतच्या घडामोडी वेगानं घडत आहेत. दरम्यान, रिफायनरी विरोधकांनी आपला विरोध आणखी तीव्र केला असून गावागावात तसे फलक लावले गेले आहेत. या फलकावर आमचे गाव कट्टर रिफायनरी विरोधी आहे. 'रिफायनरी समर्थनार्थ जमीन दलाल, राजकीय नेते वा अन्य कुणीही प्रचार करण्यास येऊ नये. कोणी जबरदस्तीनं आल्यास त्या कृतीस ती व्यक्ती सर्वस्वी स्वत: जबाबदार असेल' असा सुचना वजा इशारा देणारा मजकूर लिहिण्यात आला आहे. त्यामुळे येणाऱ्या काळात रिफायनरी या विषयावरून कोकणातील वातावरण आणखी गरमागरमीचं होणार आहे.
- मुंबईमध्ये आज पेट्रोल 106.92 रुपये आणि डिझेल 97.46 रुपये प्रति लिटर
- चेन्नईत आज पेट्रोल 101.67 रुपये आणि डिझेल 94.39 रुपये प्रति लिटर
- कोलकातात आज पेट्रोल 101.01 रुपये आणि डिझेल 92.97 रुपये प्रति लिटर
- बंगळुरुमध्ये आज पेट्रोल 104.29 रुपये आणि डिझेल 95.26 रुपये प्रति लिटर
- चंदीगडमध्ये आज पेट्रोल 97.04 रुपये आणि डिझेल 89.51 रुपये प्रति लिटर
- लखनौमध्ये आज पेट्रोल 98.01 रुपये आणि डिझेल 90.27 रुपये प्रति लिटर
- रांचीत आज पेट्रोल 95.96 रुपये आणि डिझेल 94.84 रुपये प्रति लिटर
- पाटनात आज पेट्रोल 103.18 रुपये आणि डिझेल 95.46 रुपये प्रति लिटर
- भोपाळमध्ये आज पेट्रोल 109.24 रुपये आणि डिझेल 98.67 रुपये प्रति लिटर
Petrol Diesel Price Today 11 July : देशात इंधन दरवाढीचं सत्र सुरु असतानाच आज काहीसा दिलासा मिळाला आहे. सरकारी तेल कंपन्यांनी रविवारी इंधन दरांमध्ये कोणतीही वाढ केलेली नाही. एका दिवसापूर्वी दिल्लीमध्ये पेट्रोल-डिझेलच्या किमतींमध्ये 35 पैसे आणि 26 पैसे प्रिती लिटर वाढ करण्यात आली होती.
नांदेड जिल्ह्यात आज सकाळी 8 वाजून 32 मिनिटांनी भूगर्भातील आवाजासह भूकंपाचे धक्के जाणवले. भूगर्भातून गडगडाट असा आवाज होत 6 सेंकंदाचा धक्का जाणवलाय तर दुसरा धक्का 8 वाजून 42 मिनिटांनी जाणवले. सकाळी अचानक सुरू झालेल्या या भूगर्भीय हालचालीमुळे व आवाजामुळे नागरीकांमध्ये भीतीचे वातावरण आहे.
जिल्ह्यात आज सकाळी 6 वाजल्यापासून सर्वच तालुक्यात पावसाला सुरुवात झाली असून, सकाळपासूनच काळं कुट्ट आभाळ जिल्हाभरात आहे. सर्वत्र रिपरिप पाऊस सुरू असून जोरदार पावसाची प्रतीक्षा मात्र जिल्हावासियांना अजूनही आहे.
Copa America 2021 final : अर्जेंटीनाने कोपा अमेरिका 2021 चा किताब आपल्या नावे केला आहे. अंतिम सामन्यात अर्जेंटिनाच्या संघानं आर्क रायवल्स ब्राझीलचा 1-0 नं परभाव केला. अर्जेंटीनाने जवळपास 28 वर्षांनी कोपा अमेरिकेच्या जेतेपदावर आपलं नाव पटकावलं आहे. यापूर्वी 1993 मध्ये अर्जेंटीनाने हा किताब आपल्या नावे केला होता.
बीड : सात तारखेला केंद्रीय मंत्रिमंडळाच्या विस्तारामध्ये खासदार डॉक्टर प्रीतम मुंडे यांना मंत्रीपदापासून डावलल्याने बीड जिल्ह्यामध्ये भाजपचे अनेक पदाधिकारी राजीनामे देऊ लागले आहेत. कालपासून जवळपास 36 पदाधिकाऱ्यांनी संतप्त होऊन आपल्या पदाचे राजीनामे दिले आहेत. या राजीनामा सत्रानंतर पंकजा मुंडे यांच्याकडून आता त्यांची समजूत काढली जात असल्याची माहिती भाजपचे जिल्हाध्यक्ष राजेंद्र मस्के यांनी दिली आहे. प्रीतम मुंडे यांचा मंत्रिमंडळात समावेश न झाल्याने अनेक कार्यकर्त्यांच्या आणि पदाधिकाऱ्यांच्या भावना तीव्र असल्या तरी मंत्रीपद बाबतचा निर्णय पक्षश्रेष्ठींनी घेतला असल्याची माहिती देखील त्यांनी दिली आहे.
पार्श्वभूमी
गडचिरोलीच्या जिल्हाधिकाऱ्यांची चिखलात उतरून भात रोवणी; आधुनिक पद्धतीने भात लागवड करण्याचे आवाहन
गडचिरोली : जिल्ह्यात समाधानकारक पावसाने हजेरी लावल्याने भात रोवणीच्या कामांना वेग आला आहे. शनिवारी जिल्हाधिकारी दीपक सिंगला साखरा येथील शेतकऱ्यांच्या बांधावर पोहोचले. यावेळी त्यांनी चक्क चिखलात उतरून भात (धान) लागवड केली. श्री पद्धतीने भात लागवड केल्यास शेतकऱ्यांना अधिक नफा मिळेल. त्यामुळे शेतकऱ्यांनी श्री पद्धतीचा अवलंब करावा, असे आवाहन जिल्हाधिकारी दीपक सिंगला यांनी यावेळी केले.
जिल्ह्याचे जिल्हाधिकारी दीपक सिंगला यांनी साखरा गावातील शेतकऱ्याच्या शेतात जाऊन प्रत्यक्ष भात रोवणी केली. जिल्ह्यातील दमदार पावसानंतर सर्वच शेतकऱ्यांनी भात रोवणीला जिल्ह्यात सुरुवात केली आहे. साखरा गावात कृषी विभागाने आयोजित केलेल्या रोवणी कार्यक्रमात जिल्हाधिकारी यांचे हस्ते शुभारंभ करण्यात आला. यावेळी त्यांनी शेतीमधील उत्पन्न वाढीसाठी आता यांत्रिकीकरण स्विकारले पाहिजे असे आवाहन शेतकऱ्यांना केले. परंपरागत शेतीमध्ये खूप मेहनत घ्यावी लागते, तसेच उत्पन्नही काही अंशी कमी राहते. यातून बाहेर पडून शेतकऱ्यांनी आधुनिक पद्धतीने शेती करावी जेणेकरून उत्पन्नही वाढेल आणि मेहनतही कमी करावी लागेल, असे ते यावेळी म्हणाले. साखरा येथे झालेल्या युवराज उंदीरवडे यांच्या शेतातील रोवणी कार्यक्रमाला जिल्हा अधीक्षक कृषी अधिकारी भाऊसाहेब बऱ्हाटे, नाबार्ड जिल्हा प्रमुख राजेंद्र चौधरी, कृषी अधिकारी अरूण वसवाडे, बालाजी कदम, पी.पी.वाहने आणि स्थानिक शेतकरी उपस्थित होते.
Maharashtra Corona Update : राज्यात काल (शनिवारी) 8296 नव्या कोरोना बाधित रुग्णांची नोंद, तर 6026 रुग्ण कोरोनामुक्त
राज्यात काल (शनिवारी) 8 हजार 296 नवीन कोरोना बाधित रुग्णांची नोंद करण्यात आली आहे. तर 6 हजार 26 रुग्ण कोरोनामुक्त झाले आहे. राज्यात आतापर्यंत 59 लाख 06 हजार 466 रुग्णांनी कोरोनावर मात केली आहे. त्यामुळे राज्यातील रुग्ण बरे होण्याचे प्रमाण 96.05 टक्के आहे.
राज्यात गेल्या 24 तासात 179 रुग्णांच्या मृत्यूची नोंद झाली आहे. त्यामुळे राज्याचा मृत्यूदर 2.04 टक्के झाला आहे. तब्बल 35 महापालिका क्षेत्र आणि जिल्ह्यांमध्ये आज एकही मृत्यूची नोंद झालेली नाही. राज्यात सध्या 1 लाख 14 हजार रुग्णांवर उपचार सुरु आहेत. चार जिल्ह्यामध्ये कोरोना अॅक्टिव्ह रुग्णसंख्या 100 च्या खाली आली आहे. यामध्ये यवतमाळ (20 ), हिंगोली ( 80 ), गोंदिया ( 81 ) नंदूरबार (97 ) या चार जिल्ह्यांचा समावेश आहे.
- - - - - - - - - Advertisement - - - - - - - - -