"लॉकडाऊन नियमावलीचा सरकारनं पुनर्विचार करावा अन्यथा..."; उदयनराजे भोसले यांचा ठाकरे सरकारला इशारा
भाजप खासदार उदयनराजे भोसले यांनीही आता राज्यात लागू करण्यात आलेल्या लॉकडाऊन नियमावलीचा सरकारनं पुनर्विचार करावा अन्यथा जनतेतून उद्रेक होईल असा इशारा ठाकरे सरकारला दिला आहे.

मुंबई : राज्यात कोरोनाचा प्रादुर्भाव दिवसेंदिवस वाढताना दिसत आहे. तसेच कोरोना बाधितांच्या संख्येतही झपाट्यानं वाढत आहे. याच पार्श्वभूमीवर राज्यात कठोर निर्बंध लावण्यात आलं आहेत. राज्यात 30 एप्रिलपर्यंत कठोर निर्बंध आणि विकेंड लॉकडाऊनची घोषणा करण्यात आली आहे. परंतु, अनेक घटकांमधून राज्य सरकारनं लावलेल्या या निर्बंधांना विरोध होत आहे. तसेच विरोधी पक्षांकडूनही निर्बंध शिथील करण्याची मागणी केली जात आहे. अशातच भाजप खासदार उदयनराजे भोसले यांनीही आता राज्यात लागू करण्यात आलेल्या लॉकडाऊन नियमावलीचा सरकारनं पुनर्विचार करावा अन्यथा जनतेतून उद्रेक होईल असा इशारा ठाकरे सरकारला दिला आहे.
उदयनराजे भोसले यांनी फेसबुक पोस्ट शेअर केली आहे. त्यामध्ये त्यांनी लिहिलं आहे की, "संपूर्ण महाराष्ट्रात कोरोनाचा प्रादुर्भाव मोठ्या प्रमाणावर वाढत असून मुंबई-पुण्यासारख्या शहरातील रुग्णांची संख्याही झपाट्याने वाढत आहे. त्या पार्श्वभूमीवर राज्य सरकारने घातलेल्या निर्बंधांना छोटे व्यावसायिकांसह विविध क्षेत्रातून जोरदार विरोध होत आहे. कोरोना काळात लावण्यात आलेल्या कठोर निर्बंधांमुळे सर्वसामान्य माणसांमध्ये कमालीची अस्वस्थता निर्माण झाली आहे. जर लॅाकडाऊन सारखी परिस्थिती कायम राहणार असेल तर या दरम्यान बुडणाऱ्या रोजगाराची भरपाई सरकारने थेट लाभार्थ्यांच्या बॅंक खात्यात जमा करून जनतेला किमान दिलासा द्यावा. अन्यथा जनतेत उद्रेक झाल्याशिवाय राहणार नाही."
पुढे बोलताना ते म्हणाले की, "राज्यात ज्याप्रकारे लॉकडाऊनसदृश्य परिस्थती निर्माण झाल्यामुळे जनतेत कमालीची अस्वस्थता आहे. हे निर्बंध घालताना सरकारने विविध क्षेत्रांतील परिणामांचा अजिबात विचार केलेला दिसत नाही. त्यामुळे काही ठिकाणी लोक रस्त्यावर उतरुन त्याचा विरोध करत आहेत. अनेक क्षेत्रांना या लॉकडाऊनचा मोठा फटका बसत असून अर्थव्यवस्थेलाही त्याचा मोठा फटका बसत आहे. त्यामुळे रिटेलर्स, छोटे दुकानदार, छोटे हॉटेल्स, केश कर्तनालय, फेरीवाले, गॅरेजवाले, या सर्वांच्या रोजीरोटीचा प्रश्न निर्माण झाला आहे. त्यांना विशिष्ट नियमावली घालून देवून त्यांचा रोजगार सुरू ठेवावा."
"गेल्या वर्षी मार्चमध्ये अचानकपणे लॉकडाऊन झाल्यामुळे देशाच्या अर्थव्यवस्थेला मोठा फटका बसला. लाखो लोकांचा रोजगारही गेला होता. त्यामुळे अनेक लोक दारिद्र्य रेषेखाली ढकलले गेले. ही बाब लक्षात घेवून सरकारने अर्थव्यवस्थेचे कमीत-कमी नुकसान होईल आणि कोरोनाची साखळी मोडण्यास मदत होईल असे नियोजन करणे आवश्यक आहे कोरोनामुळे विद्यार्थ्यांचेही मोठे शैक्षणिक नुकसान झाले आहे. त्याचाही सरकारने तज्ञांची समिती नेमून गांभीर्याने विचार करावा. शैक्षणिक फी बाबतसुद्धा शासन कोणताही ठोस निर्णय घेताना दिसत नाही. ही बाब चिंतेची आहे." असंही त्यांनी फेसबुक पोस्टमध्ये म्हटलं आहे.
"माझी सरकारला कळकळीची विनंती आहे की, सरकारने पुन्हा विचार करून तसेच व्यापारीवर्गाशी चर्चा करुन त्यांना दिलासा देण्याबाबत निर्णय घ्यावा. सर्वांना विश्वासात घेऊन, गरीबांचे जीवन आणि अर्थकारणाला बाधा होणार नाही याचा विचार करावा. शेतमाल तसेच औद्योगिक मालाचा पुरवठा कायम ठेवण्यासाठी वाहतूक सुरू ठेवावी. तसेच संपूर्ण लॅाकडाऊन नियमावलीमध्ये सुसूत्रता आणून सर्वसामान्य जनतेचे दैनंदिन जीवन पूर्वपदावर आणावे.", असं उदयनराजे भोसले यांनी आपल्या फेसुबक पोस्टमध्ये म्हटलं आहे.
महत्त्वाच्या इतर बातम्या :
- CoronaVaccine | मुंबईत लशींचा तुटवडा, केवळ 3 दिवस पुरेल इतकाच साठा
- 'ब्रेक द चेन' अंतर्गत लावलेले निर्बंध शिथिल करा,' यशोमती ठाकूर यांचे मुख्यमंत्र्यांना पत्र
Before You Go
Dawood house Musafir Khana in bhendi bazar: अंडरवर्ल्ड डॉन दाऊदच्या मुंबईतील घरावर हातोडा पडला तो क्षण, आकाशात ड्रोनच्या घिरट्या, कडेकोट पोलीस बंदोबस्त
महत्त्वाच्या बातम्या





















