Ashish Shelar : हे म्हणजे अति झाले आणि हसू आले, उद्धव ठाकरेंच्या टीकेवर आशिष शेलारांचं खोचक ट्वीट

Ashish Shelar : उपमुख्यमंत्री देवेंद्र फडणवीस यांच्यावर टीका करताना उद्धव ठाकरे यांनी मोदींची लाट संपत आल्याचा उल्लेख केला होता. याला आता आशिष शेलार यांनी उत्तर दिले आहे.

ashish shelar

Ashish Shelar on Uddhav Thackeray : उपमुख्यमंत्री देवेंद्र फडणवीस यांच्या वक्तव्याचा समाचार घेताना उद्धव ठाकरे यांनी मोदींची लाट संपत आल्याचा उल्लेख केला होता. याला आता आशिष शेलार यांनी उत्तर दिले आहे. हिंदुहृदयसम्राट बाळासाहेब ठाकरे यांचे स्वप्न त्यांच्या सुपुत्रांना पूर्ण करण्यास जमले नाही. म्हणून त्यांना वंदनीय मानणाऱ्यांनी ते पुर्ण करु नये का? असा सवाल शेलार यांनी उपस्थित केला आहे. आशिष शेलार यांनी ट्वीट करत उद्धव ठाकरे यांच्यावर निशाणा साधला आहे.

हिंदुत्वाचा ज्वलंत विचार जगणाऱ्या वंदनीय हिंदुहृदयसम्राट बाळासाहेब ठाकरे यांचे स्वप्न त्यांच्या सुपुत्रांना पूर्ण करण्यास जमले नाही. म्हणून त्यांना वंदनीय मानणाऱ्यांनी ते पुर्ण करु नये का? ते इतरांनी पूर्ण केले म्हणून त्यांच्या मुलांनी एवढे चिडावे का? आपल्या वडिलांच्या विचारांनी झपाटून समाजातील लोक, आयुष्य खर्च करुन आपल्या वडिलांचे स्वप्न पूर्ण करतात. याचा, त्यांच्या सुपुत्रांना आनंदच व्हायला हवा ना? असा खोचक टोला आशिष शेलार यांनी उद्धव ठाकरे यांना लगावला आहे. 

शेलार म्हणाले की, पेला अर्धा भरला आहे, असेही म्हणता येते आणि पेला अर्धा रिकामा असेही म्हणता येते! फक्त भरला आहे म्हणायला मोठे मन लागते! उरला प्रश्न पंतप्रधान नरेंद्र मोदी यांचे पर्व संपत आले म्हणून वंदनीय बाळासाहेब ठाकरे यांचे नाव भाजप वापरते असे जे सुपुत्रांना वाटतेय. हे म्हणजे अती झाले आणि हसू आले...! पण काय करणार? आपण घरात बंद खोलीत बसून राहिलो की, बाहेरचे विशाल जग संपल्यासारखे वाटायला लागतेच!

उरला प्रश्न
मा. पंतप्रधान नरेंद्र मोदी यांचे पर्व संपत आले म्हणून वंदनीय बाळासाहेब ठाकरे यांचे नाव भाजप वापरते असे जे मा. सुपुत्रांना वाटतेय...

हे म्हणजे अती झाले आणि हसू आले...!

पण काय करणार?
आपण घरात बंद खोलीत बसून राहिलो की, बाहेरचे विशाल जग संपल्यासारखे वाटायला लागतेच!
3/3

— Adv. Ashish Shelar - ॲड. आशिष शेलार (@ShelarAshish) August 20, 2022

उद्धव ठाकरे काय म्हणाले होते?
फडणवीस यांनी बाळासाहेबांच्या नावाने मते मागणे म्हणजे मोदी पर्व संपत आल्याची कबूली दिल्याचा बोचरा पलटवार उद्धव ठाकरे यांनी केला. ते म्हणाले की, देवेंद्र फडणवीस यांनी आज मुंबईत भाषण करताना आपल्याला बाळासाहेबांच्या स्वप्नांना पूर्ण करण्यासाठी मुंबई महानगर पालिकेत सत्ता मिळवायची आहे म्हणत बाळासाहेबांच्या नावाने मते मागायचा केविलवाणा प्रयत्न केला. त्यांच्या या वक्तव्यामुळे आता मोदींच्या नावाने मते मागून उपयोग होणार नाही हेच एकप्रकारे अधोरेखित केले, मोदी पर्व संपल्याचीच ही नांदी आणि कबूली आहे. भाजपच्या धोरणानुसार वापर संपला की नवीन नाव शोधायचे आणि त्यांच्या नावाने मते मागायची आणि आपली सत्तेची तळी भरायची असाच हा प्रकार या निमित्ताने भाजपचा खरा चेहरा देवेंद्र यांनी समोर आणला. महाराष्ट्रातील जनता यांना मतपेटीतून याचे उत्तर देईल, असा घणाघात उद्धव ठाकरे यांनी केला.  

फडणवीस यांच्याकडून उद्धव ठाकरे यांच्यावर हल्लाबोल 
 देवेंद्र फडणवीस मुंबईत बोलताना म्हणाले की, तुम्ही सर्वांनी कालची मुंबई पाहिली का? तीच संस्कृती, तोच उत्साह, तोच जल्लोष, तीच परंपरा... पुन्हा एकदा आपलं सरकार आल्यानंतर काय घडतं, हे आपण सर्वांनी पाहिलं. दहीहंडी जोरात साजरी झाली. पुढील सणही जोरात साजरे करायचे आहेत. आताचे मुख्यमंत्रीही घरी बसणार नाहीत आणि तुम्हालाही घरी बसू देणार नाहीत, असे म्हणत त्यांनी ठाकरे यांना टोला लगावला होता.