Anil Parab ED Raids Live : अनिल परबांच्या घरी ईडीचे छापे; मनी लाँड्रिंग प्रकरणी एकूण 7 ठिकाणी छापे

ED Raids On Shiv Sena Leader Anil Parab : परिवहनमंत्री अनिल परब यांच्या घरी ईडीची छापेमारी. मनी लाँड्रिंग प्रकरणी एकूण 7 ठिकाणी छापे.

पार्श्वभूमी

ED Raids On Shiv Sena Leader Anil Parab : शिवसेना नेते आणि राज्याचे परिवहन मंत्री अनिल परब यांच्या निवासस्थानासह सात ठिकाणी ईडीने आज छापेमारी केली. त्यानंतर अनिल परब यांनी बॅग भरण्याची तयारी करावी अशी उपरोधिक प्रतिक्रिया सोमय्या यांनी व्यक्त केली. त्यानंतर आता ईडीकडून अनिल परब यांना अटक होणार का, अशी जोरदार चर्चा सुरू झाली आहे. अनिल परब यांना अटक झाल्यास मुंबई महापालिका निवडणुकीआधीच शिवसेनेला मोठा धक्का बसणार असल्याची चर्चा सुरू झाली आहे. शिवसेनेसाठी प्रतिष्ठेची असलेल्या मुंबई महापालिका निवडणुकीसाठी अनिल परब हे महत्त्वाचे नेते आहेत. >> अनिल परब शिवसेनेसाठी महत्त्वाचे का?मागील अनेक वर्षांपासून अनिल परब शिवसेनेत सक्रिय आहेत. शिवसेना पक्षप्रमुख उद्धव ठाकरे आणि ठाकरे कुटुंबीयांच्या जवळचे समजले जातात. मुंबई महापालिका निवडणुकांच्यादृष्टीने अनिल परब यांची महत्त्वाची भूमिका असते. अनिल परब हे अनेक वर्ष शिवसेनेप्रणित केबल सेनेचे अध्यक्ष होते. अनिल परब यांची मुंबईतील वॉर्ड निहाय समीकरणावर विशेष पकड आहे. मुंबई महापालिका निवडणुकीत विजय मिळवण्यासाठी शिवसेनेच्या रणनीतीमध्ये परब यांची मोठी भूमिका असते. मागील 2017 मध्ये मुंबई महापालिकेची निवडणूक अतिशय अटीतटीची झाली होती. राज्यातील सत्तेत एकत्र असताना शिवसेना आणि भाजपने ही वेगवेगळी निवडणूक लढवली होती. काही समीकरणे शिवसेनेच्या विरोधात असतानाही शिवसेनेने ही निवडणूक जिंकली. या निवडणुकीच्या विजयात अनिल परब यांचा मोठा वाटा होता.अनिल परब यांना पक्षाकडून 2012 मध्ये विधान परिषदेवर पाठवण्यात आले होते. त्याआधी वांद्रे येथील पोटनिवडणुकीत तत्कालीन काँग्रेस नेते आणि सध्याचे केंद्रीय मंत्री नारायण राणे यांचा पराभव करण्यात परब यांची मोठी भूमिका होती. परब हे 2017 मध्ये शिवसेनेचे विधान परिषदेतील गटनेते झाले होते. त्यानंतर त्यांना पक्षाने पुन्हा 2018 मध्ये विधान परिषदेवर पाठवले.  राज्यात महाविकास आघाडीचे सरकार आल्यानंतर अनिल परब यांना परिवहन मंत्री म्हणून जबाबदारी देण्यात आली.>> शिवसेना लक्ष्य?केंद्रीय तपास यंत्रणांकडून राज्यातील महाविकास आघाडीच्या नेत्यांना लक्ष्य केले जात असल्याचा आरोप करण्यात येत आहे. शिवसेनेचे काही मातब्बर नेतेही केंद्रीय तपास यंत्रणांच्या निशाण्यावर आहेत. मुंबई महापालिकेतील सत्ता कोणत्याही परिस्थितीत ताब्यात घ्यायची असा चंग भाजपने बांधला असताना दुसरीकडे शिवसेनेच्या मुंबईतील नेत्यांवर कारवाई सुरू झाली आहे. त्यामुळे शिवसेनेच्या अडचणीत वाढ होत असल्याची चर्चा सुरू आहे. अनिल परब यांना ईडीने अटक केल्यास मुंबई महापालिका निवडणुकीला सामोरे जाण्याआधीच शिवसेनेला मोठा धक्का बसण्याची शक्यता आहे.  

26/05/2022 12:29:42

Anil Parab Update : अनिल परब यांचा निकटवर्तीय संजय कदम यांच्या घरीही सकाळी सहा वाजेपासून ED अधिकाऱ्यांकडून रेड

राज्याचे परिवहन मंत्री अनिल परब यांचा निकटवर्तीय असलेले अंधेरी पश्चिम शिवसेना विभाग संघटक संजय कदम यांच्या घरी सुद्धा आज सकाळी सहा वाजेपासून ED अधिकाऱ्यांकडून रेड सुरू आहे. संजय कदम यांच्या घरी ED ची रेड ची माहिती मिळताच आता हळूहळू शिवसैनिक संजय कदम यांचा घराखाली जमा व्हायला सुरुवात झाले आहेत. 

26/05/2022 11:58:41

Sanjay Raut on Anil Parab ED Action : अनिल परबांवरील ईडी कारवाईवरुन संजय राऊतांचा संताप; म्हणाले...

Sanjay Raut On Anil Parab : राज्याचे परिवहन मंत्री  अनिल परब यांच्या निवासस्थानी ईडीने छापा टाकला आहे. सकाळीच ईडीच्या पथकाने अनिल परब यांच्या शासकीय आणि वांद्रे येथील खासगी निवासस्थानी छापा मारला आहे. अनिल देशमुख यांनी केलेल्या मनी लाँड्रिंग प्रकरणी ही कारवाई झाली असल्याचे म्हटले जात आहे. या कारवाईनंतर शिवसेनेकडून संताप व्यक्त केला जात आहे. शिवसेना खासदार संजय राऊत यांनी अनिल परबांची बाजू घेताना म्हटलं आहे की,  अनिल परब हे आमचे सहकारी आहेत, कॅबिनेट मंत्री आहेत, पक्षाचे कडवट शिवसैनिक आहेत. अशा प्रकारच्या कारवाया गेल्या काही दिवसापासून राजकीय सूडबुद्धीने सुरू आहेत. याच प्रकारचे आरोप अनिल परब आणि आमच्या इतर सहकाऱ्यांवर लावले जात आहेत. त्यापेक्षा गंभीर प्रकारचे गुन्हे भारतीय जनता पक्षाच्या लोकांवर आहेत. परंतु त्यांच्यावर कोणी हात लावत नाही. आम्ही सर्व पक्ष आणि सरकार अनिल परब यांच्या पाठीशी ठामपणे उभे आहोत, असं राऊत म्हणाले. 

सविस्तर वृत्त वाचण्यासाठी येथे क्लिक करा

26/05/2022 11:57:25

Anil Parab : अनिल परबांशी संबंधित 7 ठिकाणी ईडीची छापेमारी

Anil Parab:  शिवसेना नेते आणि राज्याचे परिवहन मंत्री अनिल परब यांच्या निवासस्थानासह त्यांच्याशी संबंधित असलेल्या ठिकाणांवर व्यक्तींवर ईडीने छापेमारी सुरू केली आहे. ईडीने आतापर्यंत सात ठिकाणी छापेमारी केली आहे. ईडीने केलेल्या कारवाईमुळे अनेक चर्चा सुरू झाल्या आहेत. 

आज सकाळी ईडीने अनिल परब यांचे शासकीय निवास्थान 'अजिंक्यतारा' आणि वांद्रेतील खासगी निवासस्थानासह त्यांच्याशी संबंधित सात ठिकाणांवर छापा मारला आहे. आज सकाळी 6.30 वाजण्याच्या सुमारास ईडीने छापा मारला. या  कारवाईमध्ये ईडीचे वरिष्ठ अधिकारीदेखील सहभागी आहेत. अनिल देशमुख यांच्या तपासातील मुख्य तपास अधिकारी ईडीचे  सह-संचालक तासीन सुलतानदेखील अनिल परब यांचे शासकीय निवासस्थान 'अजिंक्यतारा' येथे चौकशीसाठी दाखल झाले आहेत. 

सविस्तर वृत्त वाचण्यासाठी येथे क्लिक करा 

26/05/2022 11:56:15

Maharashtra And ED Conection : आतापर्यंत शिवसेनेचे कोणते नेते ईडीच्या रडारवर?

Maharashtra And ED Conection : गेल्या काही दिवसांपासून राज्यात राज्य सरकार विरुद्ध केंद्रीय तपास यंत्रणा हा सामना रंगल्याचं पाहायला मिळत आहे. अनेक दिवसांपासून राज्य सरकारमधील आणि प्रामुख्यानं शिवसेनेमधील अनेकांना केंद्रीय तपास यंत्रणांकडून लक्ष्य केलं जात आहे. अशातच आज शिवसेना (Shiv Sena) नेते आणि परिवहन मंत्री अनिल परब (Anil Parab) यांच्यावर ईडीकडून (ED) कारवाई करण्यात आली. अनिल परब यांच्या शासकीय निवास्थानावर ईडीकडून छापेमारी करण्यात आली असून त्यांच्या वांद्र्यातील निवास्थानीही धाड टाकण्यात आली. तसेच, अनेक निकटवर्तीयांच्या घरीही ईडीनं धाडी टाकल्याचं समोर आलं आहे. 

भाजप नेते किरीट सोमय्या (Kirit Somaiya) गेल्या अनेक दिवसांपासून शिवसेना पक्षप्रमुख उद्धव ठाकरेंसह (CM Uddhav Thackeray) शिवसेनेच्या काही प्रमुख नेत्यांवर सातत्यानं घोटाळ्यांचे आरोप करत आहेत. काही दिवसांपासून राऊत विरुद्ध सोमय्या हा थेट सामना रंगल्याचंही आपल्याला पाहायला मिळालं. किरीट सोमय्यांकडून सातत्यानं संजय राऊतांनंतर अनिल परबांना लक्ष्य केलं जात होतं. तसेच, अनिल परबांनी केलेल्या घोटाळ्याचे सर्व पुरावे असल्याचा दावाही सोमय्यांनी वारंवार केला होता. अखेर आज ईडीकडून परबांशी संबंधित मालमत्तांवर धाडी टाकण्यात आल्या. दरम्यान, महापालिका निवडणुकांच्या पार्श्वभूमीवर भाजपकडून मुद्दाम सरकारमधील मंत्र्यांना आणि इतर महत्त्वाच्या नेत्यांना टार्गेट केलं जात असल्याचा आरोप सातत्यानं सत्ताधाऱ्यांकडून केला जात आहे. 

सविस्तर वृत्त वाचण्यासाठी येथे क्लिक करा

26/05/2022 11:54:41

ED Raids On Anil Parab : अनिल परबांनी बॅग भरावी : किरीट सोमय्या

ED Raids On Anil Parab : अनिल परब यांनी आता आपली बॅग भरावी अशी उपरोधिक प्रतिक्रिया भाजपचे माजी खासदार किरीट सोमय्या यांनी व्यक्त केली. अनिल परब यांच्यावर आता ईडीकडून अटकेची कारवाई होण्याचे संकेत सोमय्या यांनी दिले.

26/05/2022 11:54:07

ED Raids On Anil Parab : अनिल परबांचे साई रिसॉर्ट प्रकरण आहे काय?

ED Raids On Anil Parab : पर्यावरण मंत्रालय भारत सरकार यांनी 31 जानेवारी 2022 रोजी दापोली रत्नागिरी येथील साई रिसॉर्ट एन एक्स व सी कोच हे अनधिकृत असून तोडण्याचे आदेश दिले होते. 90  दिवसांमध्ये रिसॉर्ट मालक किंवा प्रशासनाने हे दोन्ही रिसॉर्ट तोडायचे होते. मात्र, 90 दिवस पूर्ण झाले असून अजूनही रिसॉर्ट पाडण्यात आले नाही. 

26/05/2022 11:53:41

ED Raids On Anil Parab : ईडीच्या छाप्यांमागे सचिन वाझे कनेक्शन?

ED Raids On Anil Parab : पोलीस बदल्यांप्रकरणी आरोपी सचिन वाझेंच्या जबाबामध्ये अनिल परबा यांचे नाव समोर आले होते. वाझेच्या जबाबानंतर ईडीकडून तपास सुरू झाला. त्याच अनुषंगाने ईडीने आज छापा मारला. 

26/05/2022 11:53:09

ED Raids On Anil Parab : अनिल परबांच्या शासकीय निवासस्थानी ईडीची धाड

ED Raids On Anil Parab : राज्याचे परिवहन मंत्री आणि मुख्यमंत्री उद्धव ठाकरे यांचे निकटवर्तीय अनिल परब यांच्या निवासस्थानी ईडीने छापा टाकला आहे. आज सकाळीच ईडीच्या पथकाने अनिल परब यांच्या शासकीय आणि वांद्रे येथील खासगी निवासस्थानी छापा मारला आहे. अनिल देशमुख यांनी केलेल्या मनी लाँड्रिंग प्रकरणी ही कारवाई झाली असल्याचे म्हटले जात आहे. त्याशिवाय, ईडीने अनिल परब यांच्याविरोधात मनी लाँड्रिंगचा गुन्हा दाखल केला असल्याचे वृत्त आहे. मुंबई महापालिका निवडणुकीच्या पार्श्वभूमीवर अनिल परब यांच्यावर ईडीने छापा टाकल्याने राजकीय वर्तुळात उलटसुलट चर्चा सुरू आहे. 

सविस्तर वृत्त वाचण्यासाठी येथे क्लिक करा