जालन्यातील अंबडच्या भाजप नगराध्यक्ष्यांचं पद तिसऱ्या अपत्यामुळे धोक्यात

जालना : जालना जिल्ह्यातील अंबड नगरपरिषदेच्या भाजपच्या नगराध्यक्षा संगीता कुचे यांचं नगराध्यक्षपद तिसऱ्या अपत्याच्या तक्रारीमुळे धोक्यात आलं आहे. अंबड नगरपरिषदेच्या भाजप नगराध्यक्षा संगिता कुचे यांना तीन अपत्य असून त्यांचं तिसरं अपत्य हे 12 सप्टेंबर 2001 या कट ऑफ डेटनंतर झाल्याची तक्रार कॉंग्रेसच्या पराभूत उमेदवार मंगल नारायणकर यांच्यासह त्यांच्या पतीने जिल्हाधिकाऱ्यांकडे केलीय. याबरोबरच संगीता कुचे यांचं अंबड आणि औरंगाबाद या दोन ठिकाणच्या मतदार यादीत नाव असल्याची तक्रार देखील जिल्हाधिकाऱ्यांकडे करण्यात आली आहे. नोव्हेंबर 2016 मध्ये जालना जिल्ह्यातील अंबड नगरपरिषदेची निवडणूक पार पडली. या निवडणुकीत भाजपचे 6 नगरसेवक निवडून आले होते. त्यानंतर राष्ट्रीय समाज पक्षांच्या दोन नगरसेवकांना सोबत घेऊन भाजपने या नगरपरीषदेत सत्ता स्थापन करत संगीता कुचे अंबड नगरपालिकेच्या नगराध्यक्षपदी विराजमान झाल्या. भाजपच्या दोन नगरसेवकांचं पद तिसऱ्या अपत्याच्या कारणावरून जिल्हाधिकाऱ्यांनी रद्द केल्यानंतर नगराध्यक्षा संगीता कुचे यांना देखील कट ऑफ डेटनंतर तिसरं अपत्य झाल्याची तक्रार त्यांच्या प्रतिस्पर्धी उमेदवार मंगल नारायणकर यांच्यासह त्यांच्या पतीने जिल्हाधिकाऱ्यांकडे केली. या तक्रारीत संगीता कुचे यांचं पद रद्द करुन काँग्रेसच्या उमेदवार मंगल नारायणकर यांना विजयी घोषित करावं अशी मागणी प्रकाश नारायणकर यांनी केली आहे. कॉंग्रेसकडून जिल्हाधिकाऱ्यांकडे करण्यात आलेल्या तक्रारीमुळे अंबडच्या भाजप कार्यकर्त्यांमध्ये अस्वस्थता पसरली आहे.