Akhil Bhartiya Marathi Chitrapat Mahamandal : अखिल भारतीय चित्रपट महामंडळाच्या निवडणुकीचा कार्यक्रम घोषित; 5 फेब्रुवारीला मतदान
मराठी कलाकार, तंत्रज्ञ आणि इतर भागधारकांची सर्वोच्च संस्था असलेल्या अखिल भारतीय मराठी चित्रपट महामंडळाच्या निवडणुकीचे वेळापत्रक कोल्हापूरच्या उप धर्मादाय आयुक्त कार्यालयाने जाहीर केले आहे.
Akhil Bhartiya Marathi Chitrapat Mahamandal : मराठी कलाकार, तंत्रज्ञ आणि इतर भागधारकांची सर्वोच्च संस्था असलेल्या अखिल भारतीय मराठी चित्रपट महामंडळाच्या निवडणुकीचे वेळापत्रक कोल्हापूरच्या उप धर्मादाय आयुक्त कार्यालयाने जाहीर केले आहे. अधिकार्यांनी दिलेल्या माहितीनुसार मतदारांची प्रारूप यादी प्रसिद्ध करून निवडणुकीची प्रक्रिया जानेवारीच्या पहिल्या आठवड्यात सुरू होईल.
5 फेब्रुवारीला मतदान होणार असून 8 फेब्रुवारीला निकाल जाहीर होणार आहेत. यामुळे उमेदवारांना महाराष्ट्रभर पसरलेल्या मतदारांपर्यंत पोहोचण्यासाठी पुरेसा वेळ मिळेल. संस्थेची नवीन घटना अद्याप स्वीकारली जाणे बाकी असल्याने, पूर्वीच्या घटनेनुसार आणि ठरावाद्वारे निश्चित केलेल्या मतदारांची संख्या केवळ निवडणुकीसाठी वैध असेल.
दरम्यान, अखिल भारतीय चित्रपट महामंडळातील तमाशा सुरु आहे. दावे प्रतिदावे करत दोन्ही गटाकडून निवडणूक जाहीर करण्यात आल्यानंतर धर्मादाय आयुक्तांनी तगडा हादरा देत निवडणूक रद्द केली होती. धर्मादाय आयुक्त प्रदीप चौधरी यांनी निवडणूक निर्णय अधिकारी म्हणून धर्मादाय निरीक्षक आसिफ शेख यांची नियुक्ती केली आहे. निवडणूक नियंत्रक म्हणून शिवराज नाईकवाडे यांची नियुक्ती केली आहे.
दोन्ही गटांकडून निवडणूक कार्यक्रम जाहीर
चित्रपट महामंडळातील दोन गटातील धुसफूस सुरुच असल्याने मेघराज राजेभोसले यांनी आपणच महामंडळाचे अध्यक्ष असल्याचा दावा करत महामंडळाच्या निवडणुकीचा कार्यक्रम घोषित केला. निवडणूक अधिकारी नियुक्त केले. त्यानंतर घोषित केलेली निवडणूक अमान्य असल्याचे सांगत धनाजी यमकर यांनीही स्वतंत्रपणे निवडणूक कार्यक्रम जाहीर करत त्यांनीही निवडणूक अधिकारी नियुक्त केले होते.
दोन्ही गटाकडून दावा केल्याने सभासदांमध्येही संभ्रम
यामुळे अधिकृत निवडणूक कोणती यावरून संभ्रम निर्माण झाला होता. एकाच संस्थेच्या एका महिन्यात दोन निवडणुका तसेच दोन्ही बाजूंनी आमचीच निवडणूक अधिकृत असल्याचा दावा करत धर्मादाय उपायुक्त कार्यालयाकडे एकमेकांविरोधात तक्रार केली होती. त्यावर सुनावणी होऊन धर्मादाय उपायुक्त प्रदीप चौधरी यांनी दोन्ही बाजूंची निवडणूक बेकायदेशीर ठरवली होती.
दरम्यान, चित्रपट महामंडळाची नवीन घटना अजून मंजूर झालेली नाही. त्यामुळे जुन्या घटनेनुसारच निवडणूक पार पडणार आहे. त्यामुळे पुणे, मुंबई आणि कोल्हापूर या तीन केंद्रांवर मतदान होईल. त्यात 18 हजार सभासद मतदानाचा हक्क बजावतील.
गेल्या दीड वर्षांपासून निवडणूक नाही
अखिल भारतीय मराठी चित्रपट महामंडळाची मुदत संपून दीड वर्षे झाली आहेत. कोरोना आणि महामंडळातील अंतर्गत राजकारणामुळे निवडणूक घेण्यात आली नव्हती. मुदत संपल्यानंतर कार्यकारिणीकडून मेघराज यांना बाजूला करत बहुमताने सुशांत शेलार यांना अध्यक्ष म्हणून निवडण्यात आले होते. त्यामुळे वाद विकोपाला गेला होता. याचा महामंडळाच्या कामावरही परिणाम झाला होता.
इतर महत्वाच्या बातम्या
महत्त्वाच्या बातम्या
