VIDEO : मध्य प्रदेशात ट्रकखाली चिरडून पत्रकाराची हत्या

वाळूमाफिया आणि पोलीस अधिकाऱ्याचं स्टिंग ऑपरेशन केल्याच्या रागातून संदीप शर्मांची हत्या झाल्याचं बोललं जात आहे.

भोपाळ : मध्य प्रदेशात वाळू माफियांविरोधात आवाज उठवणाऱ्या एका पत्रकाराची निर्घृण हत्या करण्यात आली. ट्रकखाली चिरडून पत्रकार संदीप शर्मा यांचा जीव घेण्यात आला. संदीप शर्मा 'न्यूज वर्ल्ड चॅनेल' या वृत्तवाहिनीसाठी स्ट्रिंजर म्हणून काम करत होते. मध्य प्रदेशातील भिंड शहरात झालेला हा प्रकार सीसीटीव्ही कॅमेरात कैद झाला आहे. वाळूमाफिया आणि पोलीस अधिकाऱ्याचं स्टिंग ऑपरेशन केल्याच्या रागातून संदीप शर्मांची हत्या झाल्याचं बोललं जात आहे. दुचाकीस्वार संदीप शर्मा यांना ट्रकने धडक देऊन चिरडलं. अपघातात गंभीर जखमी झालेल्या संदीप यांचा उपचारादरम्यान मृत्यू झाला. आपल्या जीवाला धोका असल्याचं सांगत संदीप चव्हाण यांनी पोलिस सुरक्षेची मागणीही केली होती. बेकायदेशीर वाळू उत्खनन करणाऱ्या माफियांसोबत पोलिसांचं साटंलोटं असल्याचा आरोपही त्यांनी केला होता. मध्य प्रदेशचे मुख्यमंत्री शिवराजसिंह चौहान यांनी दोषींवर कठोर कारवाई करण्यात येईल, असं आश्वासन दिले आहे.

#WATCH:Chilling CCTV footage of moment when Journalist Sandeep Sharma was run over by a truck in Bhind. He had been reporting on the sand mafia and had earlier complained to Police about threat to his life. #MadhyaPradesh pic.twitter.com/LZxNuTLyap

— ANI (@ANI) March 26, 2018