पंतप्रधान नरेंद्र मोदी पुण्यातील सिरम इन्स्टीट्यूटला भेट देण्याची शक्यता; सुमारे 100 देशातील राजदूतांची पुण्याला भेट निश्चित

हिंजवडी मधील लस निर्मीतीशी संबंधित जिनोव्हा बायोफार्माक्युटिक्लस लिमिटेड कंपनीत ते भेट देणार आहे. त्यानंतर ते लोहगाव विमानतळावर दाखल होऊन दिल्लीस रवाना होतील.

पुणे : ऑक्सफर्ड विद्यापीठ व अस्ट्राझेनका कंपनीसोबत पुण्यातील सिरम इन्सिटटयूटने लस निर्मितीचा करार केलेला असून ‘कोवीशिल्ड’ लस निर्मितीच्या अंतिम टप्प्यात आहे. याबाबतची माहिती जाणून घेण्याकरिता पतंप्रधान नरेंद्र मोदी 28 नोव्हेंबर रोजी सिरमला भेट देण्याची शक्यता वर्तविण्यात येत आहे. कोरोना लसीची माहिती घेऊन लस वितरणाचे तयारीचा आढावा ते घेतील.

कोविशिल्ड लसीचे उत्पादन सीरममध्ये होऊन ते जगभरात वितरित केली जाणार आहे. पंतप्रधान मोदी यांच्यासह दिल्लीतील सुमारे 100 देशांचे राजदूत सिरमला 4 आणि 5 डिसेंबर रोजी भेट देऊन यासंदर्भातील माहिती घेणार असल्याचे निश्चित झाले आहे. मात्र, पंतप्रधान यांचे दौऱ्याबाबत अद्याप पंतप्रधान कार्यालय किंवा प्रशासकीय अधिकारी यांनी अधिकृत माहिती दिलेली नाही. परंतु परराष्ट्र मंत्रालयाने यासंर्दभात पुणे पोलीस आणि जिल्हाधिकारी कार्यालय यांच्याशी संर्पक करुन आवश्यक ती माहिती घेतलेली आहे.

कोविशिल्ड लसीचे उत्पादन नेमके कसे सुरु आहे, कशाप्रकारे लस निर्माण करण्यात आली. चाचण्यांचे अहवालाचे निष्कर्ष, लसीचे वितरण, लसीची किंमत यासंर्दभात सविस्तर माहिती घेऊन या दौऱ्यात चर्चा केली जाणार आहे. भारतीय परराष्ट्र मंत्रालयाचे डेप्युटी चीफ ऑफ प्रोटोकॉल सर्वजीत सूदन यांनी राजदूतांचे अधिकृत दौऱ्याची माहिती जिल्हाधिकारी कार्यालय, पुणे, पोलीस आयुक्त अमिताभ गुप्ता व महाराष्ट्र राज्याचे सहसचिव (प्रोटोकॉल) यांना पत्राद्वारे कळवलेली आहे.

सुरुवातीला सदर राजदूतांचे शिष्टमंडळ 27 नोव्हेंबर रोजी सिरमला भेट देणार हाेते परंतु त्यात बदल करुन संबंधित दौरा 4 व 5 डिसेंबर रोजी ठरविण्यात आलेला आहे. चार डिसेंबर राजी दिल्लीतून विशेष विमानाने राजदूतांचे शिष्टमंडळ पुण्यातील विमानतळावर आगमन करतील. त्यानंतर हडपसर परिसरातील सिरम संस्थेला ते भेट देणार आहे. त्यानंतर हिंजवडी मधील लस निर्मीतीशी संबंधित जिनोव्हा बायोफार्माक्युटिक्लस लिमिटेड कंपनीत ते भेट देणार आहे. त्यानंतर ते लोहगाव विमानतळावर दाखल होऊन दिल्लीस रवाना होतील. अशा प्रकारे पाच नोव्हेंबर राजदूतांचे शिष्टमंडळाचे दुसरे पथक पुण्यात भेटीस येऊन पुन्हा दिल्लीस परतणार आहे. यादरम्यान कडेकोट सुरक्षा व्यवस्था पुणे विमानतळ व शिष्टमंडळाचे प्रवास मार्गावर ठेवण्यात येणार आहे. 40 आसनक्षमता असलेल्या चार लक्झरी बसमधून हे शिष्टमंडळ पोलीस बंदोबस्तात आपला पुणे दौरा पूर्ण करतील.