एक्स्प्लोर

राष्ट्रपतीपदाचा अर्ज भरल्यानंतर लालकृष्ण अडवाणी एकाकी?

Written By : एबीपी माझा वेब टीम | Updated at : 23 Jun 2017 10:54 PM (IST)

नवी दिल्ली : एनडीएचे राष्ट्रपतीपदाचे उमेदवार रामनाथ कोविंद यांनी राष्ट्रपतीपदाचा अर्ज दाखल केला. यावेळी भाजपचे ज्येष्ठ नेते लालकृष्ण अडवाणी उपस्थित होते, मात्र ते काहीसे एकाकी पडल्याचं चित्र पहायला मिळालं. अर्ज भरल्यानंतर भाजपच्या नेत्यांची फौज बाहेर आली. यावेळी पंतप्रधान नरेंद्र मोदी, त्यांच्या शेजारी लालकृष्ण अडवाणी आणि त्यानंतर रामनाथ कोविंद अशा क्रमानं चालत होते. मोदींनी शेजारीच असलेल्या अडवाणींना वगळून थेट पलिकडे असलेल्या कोविंद यांचा हात हातात घेतला आणि उपस्थितांना अभिवादन केलं. शेजारीच चालत असलेल्या अडवाणींचा त्यांना विसर पडल्याचं दिसलं. अखेर कोविंद यांनी मोदींना त्याची आठवण करुन दिली आणि अडवाणींचा हात मोदींच्या हातात दिला. मात्र यामुळे काहीशा दुखावलेल्या अडवाणींनी हलकेच आपला हात सोडवून घेतला. याची जाणीव झालेल्या मोदींनी झटकन अडवाणींचा डावा हात हातात धरुन उंचावला आणि वेळ निभावून नेली. पाहा व्हिडिओ :

रामनाथ कोविंद यांचा राष्ट्रपती निवडणुकीसाठी अर्ज दाखल

खरं तर राष्ट्रपतीपदासाठी एनडीएतर्फे लालकृष्ण अडवाणी यांच्या नावाची चर्चा होती. मात्र ऐनवळी रामनाथ कोविंद यांचं नाव पुढे आलं. सुरुवातीपासून मोदी-शाह यांनी भाजपच्या ज्येष्ठ फळीतील नेत्यांना दूर राखल्याचं म्हटलं जातं. त्यामुळे अडवाणी आणि मोदी यांच्यातील दुरावा वारंवार समोर येताना दिसतो. प्रचंड शक्तीप्रदर्शनाद्वारे एनडीएचे राष्ट्रपतीपदाचे उमेदवार रामनाथ कोविंद यांनी आपला उमेदवारी अर्ज भरला. यावेळी पंतप्रधान नरेंद्र मोदी, भाजप अध्यक्ष अमित शाह, ज्येष्ठ नेते लालकृष्ण अडवाणी, मुरली मनोहर जोशी, महाराष्ट्राचे मुख्यमंत्री देवेंद्र फडणवीस, केंद्रीय मंत्री रामदास आठवले, राजू शेट्टींसह भाजपच्या मित्रपक्षांचे नेते आणि भाजपशासित राज्यांचे मुख्यमंत्री उपस्थित होते. यावेळी प्रकर्षाने जाणवणारी बाब म्हणजे शिवसेनेची अनुपस्थिती. या कार्यक्रमासाठी शिवसेना पक्षप्रमुख उद्धव ठाकरे यांना निमंत्रण देण्यात आलं होतं. मात्र शिवसेनेकडून कोणीही उपस्थित नव्हतं. कोविंद फॉर्म भरतेवेळी शिवसेना सोडून एनडीएचे सगळे घटक पक्ष उपस्थित होते. मात्र कोविंद यांच्या उमेदवारी अर्जावर शिवसेनेकडून अनंत गीते, संजय राऊत आणि आनंदराव अडसूळ या तिघांच्या सह्या आहेत.