Kerala Election 2021: केरळमध्ये 'डाव्यां'ना स्पष्ट बहुमत, चर्चेत आलेल्या 'मेट्रो मॅन' ई श्रीधरन यांचा पराभव
Kerala Election 2021: केरळमध्ये पिनराई विजयन यांच्या नेतृत्वाखालील एलडीएफ अर्थात डाव्या पक्षाच्या सरकारला पुन्हा एकदा स्पष्ट बहुमत दिलं आहे.मतमोजणी आता अंतिम टप्प्यात असून एलडीएफला बहुमत मिळाल्याचे जवळपास शिक्कामोर्तब झाले आहे
तिरुवनंतपुरम: केरळमध्ये पिनराई विजयन यांच्या नेतृत्वाखालील एलडीएफ अर्थात डाव्या पक्षाच्या सरकारला पुन्हा एकदा स्पष्ट बहुमत दिलं आहे. सध्याचे कल आणि हाती आलेल्या निकालानुसार LDF ला 99 जागांवर आघाडी आहे. तर विरोधी UDF ला 41 जागांवर आघाडी आहे. मतमोजणी आता अंतिम टप्प्यात असून एलडीएफला बहुमत मिळाल्याचे जवळपास शिक्कामोर्तब झाले आहे. केरळमध्ये भाजपला अद्याप खातंही उघडता आलेलं नाही. केरळमध्ये 140 जागांवर निवडणुका झाल्या. इथं बहुमतासाठी 71 जागांची गरज असते. दरम्यान केरळमध्ये स्पष्ट बहुमताने आपलं सरकार पुन्हा सत्तेत आलं असल्याचा दावा एलडीएफच्या नेत्यांनी केला आहे.
'मेट्रो मॅन' ई श्रीधरन यांचा पराभव
या निवडणुकीत सर्वांचं लक्ष असलेले 'मेट्रो मॅन' ई श्रीधरन यांचा पराभव झाला आहे. पलक्कड विधानसभा मतदारसंघातून 'मेट्रो मॅन' ई श्रीधरन यांचा पराभव झाला आहे. सुरुवातीला ते आघाडीवर होते मात्र नंतरच्या फेरीत ते चांगलेच पिछाडीवर गेले. त्यांच्या विरोधात काँग्रेसचे शफी परामबिल यांनी विजय मिळवला.
परमबिल यांना 42534 (38.71%) वोट मिळाले तर श्रीधरन यांना 41561 (37.83%) मतं मिळाली. निवडणुकीच्या आधी ई श्रीधरन यांनी भाजपमध्ये प्रवेश केला होता. त्यांचं मुख्य लक्ष्य केरळमध्ये भाजप सत्तेवर आणण्याचं आहे असं त्यांनी सांगितलं होते. ते स्वत:ला मुख्यमंत्रीपदाचे दावेदार मानत होते. केरळमध्ये भाजपनं विजयासाठी खूप मेहनत घेतली होती. पंतप्रधान मोदी, गृहमंत्री अमित शाह यांच्यासह अनेक बड्या नेत्यांनी केरळमध्ये प्रचार केला होता मात्र तिथे भाजप अद्याप खातंही उघडू शकलेला नाही.
मुख्यमंत्री पिनराई विजयन आपली सत्ता कायम ठेवण्यात यशस्वी होताना दिसत आहेत. भाजपने या निवडणुकीसाठी प्रचंड मेहनत घेतली होती. केरळमध्ये भाजपची जादू चालली नाही हे आता स्पष्ट झालंय.
महत्त्वाच्या बातम्या
ट्रेंडिंग न्यूज
